A FANU A MAN CHIANG E.. Siamtu malsawmna dawng ve zelin kan zirlaite midang phak silo, khum tho siin ka han zirchhuak ve ta poh chu ani a. Mahse zirna hi zawng, peih chhung hi chuan zirtur alo awm ve zel si a. Mahni lah nise a zira zir chhuak lem lovin “ BACHELOR” nihna hi chu ka pianken ve hrim hrim a nitur nge ni “KAWPLAI D” tih tura han koh leh auh eihtheih tur engmah ka nei ve der si lova. Chutia BACHELOR ni reng chung si chuan zirna lamah BACHELOR degree chu kan han zo ve leh hlawl bawk si a. Zirna sang z^el beiseiin ka thianpa MANUNA nen chuan Guwahati lam ah in ziah tlin ve ngei tumin NETWORK bus hmang ngei chuan kan han chhuk thla dun leh ta a. “Exam la hmachhawn tur kan ni e” tih chu sawi loh, kan khua Kolasib kan chhuah san dawn atang ringawt pawh khan a hmunpui lama kal tur kan nih avangin chhawl kha an hal tran em em ringawt phawt mai a! Vairengte kan han thlen thlak meuh kha chuan lirthei kan chuanna ah kan lo hah ve khang lang tawh bawk nen, chhuanlam tha tak hi ani tran nghal der tawh mai a! Chu kan chhawl hal tihreh nan chuan han leia han in mai tur a awm loh avangin chhawl hal diktak zawk chu tuifim tuiril tui tak mai chuan kan tireh ta zawk a. Tichuan Guwahati chu chhun pachangah chuan kan thleng ta a tiin thlep tawi tawh mai ang. Guwahati Mizoram house ah chuan hmel berh tawhsa nak alaiin lirthei chuan hah leh balh nen, hmel chhuan tham lo tak chuan kan han in thiar lut ve ta rawih a.Chawlhnia Exam pe tur chauh ni siin Zirtawpni chhun ah chuan Guwahati ah kan awm vang tawh mai a. Heta trang ringawt pawh hian Exam pe tur chauha zin kan nih lohzia chu a hrilhfiah chiang hle awm e. Kolasib atang daih tawha chhawl hal tawh tan chuan Guwahati ah phei chuan hal tek tek tak hi ani tawh a. Hmunpui hmun tha han thlen meuh chuan kan Kross put te lah hi a zang mai pawh nilovin kan then le le tawh mai si a. Thlemna kan hma lawka lo thleng tur pumpelh nan tiin keini lah chu min thlem hma hmain Manuna nen chuan kan lo tek chhuak leh daih hman tawh a.“ A tuk Inrinni ala awm alawm” tiin chu Zir-tawp-ni chu pawmpui thlapin kan zir ti tawpin chhawl hal leh lek lo turin kan han tlan ta kerh kerh a. A tuk Inrinni chu kan han chuang kai ve leh ta ngei a.A hma zana chhawl hal lek lova kan tlanna chuan lu lam ti rit burin tui in kuang kuang chu min leh chawh ta si a! Chu tui in ringawt chuan min chhawk dam thei dawn lo tih chu kei leh Manuna chuan kan inbual khat dan kan hriat chian dun ang bawkin kan hre chiang a. A damdawi awm chhun lah tap chhak lawkah lei sen loh a in hung tlar dual bawk nen, thlem dun kan nuam lai tak hian LEI HNUAIPA hi alo inrawlh ve sek bawk nen, kan tlu leh dual dual thin zawng anih hi. Kan vawikhat tih dunna ani lo chiang tih lantirin kan mit leh mit chu in melh kuauin kan pawisa bawm chu kan lek chhuak dun ta nghal vat a.Mihring hi zawng kan tum dan ngawt chuan a awm theihloh tih tichiang turin In-rin-ni pawh chu a tuk exam tur in-rin lawk nan hmang lovin, kan thil tih avanga House hruaitu te mit mei reng chungin in-ring takin kan awm dun ta zawk a! Tlai len harh pahin kan han tai chhuak ve mai mai a. Chutah vanneih asiamin kal lama kan hmelhriat, kum lamah chuan kan pa te rual hi kan hmu nawlh mai a. Ani lah kha motor thar la tura Guwahati kal ve mai anih avang leh mahni chauha haw hreh anih avangin keini thian dun chu haw rual puian min sawm ta a. Keini thiandun lah ngaih alo sam thla zen tawh bawk nen, haw lehna tur ticket kan la fel vek tawh pawh theihngilh thelhin kan han “AW” liam leh ta puat ringawt a. Chutah kan AW liam rual rualin ticket va cancel tur chuan ngaihtuahna nu phut chung chuan ticket lakna hmunpui chu kan va pan a. Kalkawngah chhuanlam kan siam dan tur kan ngaihtuah phei ta neuh neuh a. Manuna chuan fing inti takin, “ Kan GATE exam an sawn hla a, heta cham lovin mahni in lamah inzir kan duhzawk a” tiin a ngaihtuahna nut tawh zia a rawn pholang leh a. Kei nu reng chung pawha fim kar chuan ka fim bik zia lantirin, “ Bawiha, a tih chi lovang. Hetiang GATE exam pui an sawn hla trut trut tawh ngai lo. Chu ai chuan chhungte damlohna avang haw nghal thuai ngai angin sawi zawk ang” tiin Manuna aia ka san bik hretna chuan Manuna chu hnehin an bu leh ngauh a. Chu dawt thu phuahchawp hmang chuan ticket chu titawp lehin a tuk Chawlhni kan exam zawh ruala Pa Mama( Hming phuahchawp, hming diktak hria kan awm palh taka thup nan) Bolero thar ngei maia inti mitak leh milen nih fawm kawpa chhoh chu kan rel thlu dun thei ta a. Kan exam hun leh ni leh darkar chu alo thleng ta ngei a. A hma zan lama kan awm dan leh kan thiltih chuan exam laia hawi ralh ralh chunga “ Heta zinga a dik ber chu hei hi nirawh se, ni tak tak rawh se, lehzual dawn lawm mi a” tih ruk ser ser bak chu kan tan thatna tehchiam min chhuah pui lova. Exam hun chhung a tawp thlenga awm ve kher ngaihna chuan ka rilru hi hmun tin hmun tangah min lentir ta daih mai a. Ka bul chiaha thu in tihtak zeta zawhna a chhan laiin kei chuan, “1. Mahten ka dawn chawlhtui ning zu nen. Fam ta ten ka lunglen min awi e An thu leh hla ril mawi ten. Mahten ka kiu e, ka lunglen thu 2. Famta ten an chhui kir, hun mu hnu te. An di an ngai an kiu riau riau e. Keizawng mahten ka khua a har e. D ngaih tur kan tan an awm si lo. 3. Aw khaw nge i awm ve le? Siamtun ka tan Nang a duan ka hre si Ka hnenan in lar nang che. Chutin a kiam ngei ang ka lunglen hi.” Tiin ka lunglen thu leh ka riang bikzia chu chu lehkha var phek hlai puiah chuan ka thai kawi nuai ta zawk a. Chutiang reng renga rilru ka sen lai chuan hun tawp hun chu alo thleng ve ta mai a. Exam pek laia hla thu phuah tret trut tha taka pass anla awm ngailo tih hre reng chungin rilru hah a hnekin hla phuah theia ka awm kha ka hlim ta mah mah zawk a! Exam zawha haw mai tura pa Mama nen kan inbiak rem avangin hmanhmawh bak lengin House chu ka pan phei leh ta nawk nawk a. Manuna pawn thiam a neih bik lohzia lantirin a ha sen thrum mai min hmuh siah pah chuan, “ Tun kum chu zirzawm lo phawt mai ang” tiin engkimah kan inlungrual thinzia chu kan han nemnghet dun leh ta a. Pa Mama pawh kan exam zawh hun tur kan hrilh lawk ang ngeiin vai vawih aia rangin a rawn inlar ta nghal phat a. Tichuan Guwahati Mizoram House chhuahsana zan lama Shillong lama riak tur chuan kan in phur chhuak ta hlawm a. Guwahati leh Shillong inkar darkar 2-3 vel chhung zawng chu fiamthu leh titi puitling tak chuan a inkat nawk reng a. “ Tawng thei sabawp chang” tih hi sabawp han chang ta tak tak se zawng, Manuna hi a puar dawn bik teh e! Titi khawchang a hriat mai bakah thu sawichhawn leh hi a sawitu hmasa aimaha anga a sawi thei hi a malsawm dawnna kawng hi ani ve a.A lenna ina a Scooty ken theihngilh thak khawpa leng tui thei anih hrim hrimna pawh hian titi vuak vel dan leh nula han biak suam suam dan a thiam ani tih a lantirin ka hre teh tlat pek a.A titi khawchang hrim hrim hi lehkhabu khat tawpa chhuah tham chu a hmuam uih ve hm^an hrim hrim bawk a. Manuna titi ngaithla chung leh achanga lo tuihnih zeuh zeuh chung chuan Shillong khawpui chu kan lut hnai ta mai a. Shillong khawpui timawitu pakhat BARAPANI kan han thleng chu Pa Mama’n chawlh hahdam paha thlir khaw tlai tur chuan a lirthei chu a han chawlh lailawk tir ta a. Vawi tam hmutu te pawna an thlir nin theih loh chu kei leh Manuna, a vawikhat na veve tur atana kan han thlir dauh dauh mai chu(h)! Keizawng “ Kan Zotlang Ram Nuam” tih hla hi ka phuah theih ka ring hlawl love.Keini thiandun lah thil awm remchang apiang hman tangkai tum kan nih avangin kan ngaihtuahna chu alo thleng thui dun leh hman tawh khawp mai a. MAHNI CHAUH TE NENA lawng ah chuang dunin a lai takah han in-kawm fal dun heuh heuh mai ila tih thu lam hla hlir chuan Barapani luipui mawi chu kan thlir dun ta vauh vauh a. A sirah pa Mama lahin a chhawl hah tirehna tur a kensa chu a lo dawt kiang kiang bawk a. Kan hlim tlang ani ber e Shillong khawpui pan treuh te hi.Duhtawk nghaha kan thlira kan lem zawh hnu chuan zan lama kan riahna tur Synod House lam panin kan inphur tlang leh ta a. Engkim kan tihfel hnu chuan Pa Mama te chhung tlawh turin Happy Valley chu kan pan ho ta a. Pa Mama hi a hnathawhna avangin khawtam tak hmuin a zin vei vak deuh reng a. Shillong pawh vawi tam a awmna anih tawh avang leh a chhungte tak tak an awm avangin a mikhual lo hle a. A fanu naupang ber Mami( Hming thup, hria kan awm palh takin) chu zirna vangin Shillong ah dahin B.A 1st year ni mek ani a. Tun tuma Shillong kan chawlh chhan chu a fanu vang nilovin zanlaia motor khalh a hreh vang leh suamhmang tawh a hlauh vang ani a, chu thu chu keini thiandun pawh chuan kan hlauh vang ni kher lovin kan thu loh ve em avangin kan pawmpui ta mai zawk ani e. Hetia Shillong kan awm lai hian a fanu chu hostela a awm avangin tlawh en ah pawh en lovin phone hmang chuan an inbe ta zawk a. Chutia Happy Valleya a chhungte kan tlawhpui hnu chuan haw zai kan rel ta a. Hmelhriat leh chhungte a neih tam em avangin keini chu kal hmasa in a motor dahna lam kan pan ding nghal a. Chutah leh, tleirawl tituai tha tak mai leh taksa inremkhawm fuh dup nalh tak mai, mahse a mit meng leh a chet dan vel atanga ruih nei tih ka hriat kan tawh chiah chu ka rilru in, “ Khai aw, tlai lam lamah thla ava ti eng hma ve. Ka bulah chuan awm la, nuam KA va ti lehzual dawn takem” tiin chu tleirawl nalh tak mai chu ka rilru chuan ka lo khel bian bian a. Chutia ka khel buan buan lai chuan Pa Mama nen an intawk ve leh ta chiah mai chu(h)! Din an rual ta thawt mai! Keichuan motor bula atang chuan khur hlet hlet chung leh meizial pak khuk luk luk pah chuan ka mit mei reng a. A tirah chuan ngaih tithat lohna pakhatmah nei lovin,“ A naute ani anga, kam hnih khat velin a zilh hlek aniang” tiin thin thi diai chuan ka mei chu ka zu hlet hlet a. Shillong boruak vawt tak mai, chi thlahpun nan a itawm tak chu an titi chhung chu khur cher cherin kan lo tuar tlawk tlawk mai a. Chutah Pa Mama’n a phone lek chhuakin midang a be ta mawlh mawlh mai a. Tu a biak hrelo tan leh chhungkaw-pa ber pawh a tawm tet vek hnu chuan a ngeiawm duh lam chu ani e! Tichuan chu nula tleirawl a biak mawlh mawlh nen chuan in hlat tak, mahse in hnaih ru riau si chuan an rawn phei dun nghalh nghalh mai a. “ He nula tleirawl a rawn hruai phei hi a fanu, lehkha zir tura Shillonga a dah, hostela awm mek tia insawi kha ani thei an gem” tiin ka rilru chuan ka lo zawt mawlh mawlh a. Chu ka rilru chu Pa Mama chuan a hre chek aniang chu, “ Kan fanu hostela awm emaw kan tih kha alo awm aw zawng lo mai. Hei lu hai burin kan inhmuh pek hi” tiin Pa Mama hmelah khan thinrimna leh hmangaihna chuan a tuam up up ani tih chu kei leh Manuna chuan kan hrethiam ta nghal vat a. Motor ah chuan lut dialin boruak zang leh vawt tak, mahse rit leh uap tak nen chuan kan thu za tlang ta a. A tlar hnungah keini thian dun chu thuin a hma ah an pafa chuan an thudun ta a. Keini a chhungte pawh nilo, zan khat bus chuan ho vanga inhmel hriat chawp mai mai tan chuan thu thiam leh puitlin chhuaha, lo hnem vak kha thil tih chi ani ber tawh lova. Shillong kan rawn panna kawng tluan a nawm tehreng nen tunah chuan kan thaw ri ngam trawk tawh hi ani ber a. Rilru hah leh thinrim tih hriat reng, mahse a thisen zawmpui a fanu a hmangaih ber hnenah chuan aw thawp hniam raih hian, “ Boihte, hetianga I awm hi ka ring ngailo hrim hrim asin. Hetiang hi maw mi ten, an fa phaiah an dah a, an nun an hloh an tih thin chu ni. Neih thinglungkhawng meuhin helai hmunah kan dah che a, nang lah heti hian luhai chhawkin kan inhmu ta chu ani si a” an tih meuh chuan tlangvala pumpa, rilru hahna leh trap teilo ang hiala nui bawk bawk thin tan pawh kan hn^im ta ruih mai a.Sawi tur engmah kan hriat loh avangin a hma lawka pa te rual mah nise, thian anga nel taka kan lo kawm tawh Pa Mama lungngaihna leh rilru hahna chu tawmpuiin kan hnuk a ulh thelh ani ber e. Hemi avang hian a tuk maia Pa Mama ruala haw kan tumna pawh thulhin chawp leh chilhin Sumo Counter kan be kual ta nghal vat vat a. Mizo tawng hmang treuh na na chu thian dang te chharin a tuk tlai dar 6 a chhuak tur chuan Sumo chu kan hauh fel thei ta a. Zan chaw eikham thingpui sen hang in pah chuan a enkawltu te nen hlim takin kan inkawm tlang mial mial a. Chutah Pa Mama te pafa chu zanriah ei turin an lo phei ve ta a. Engkim min hrilh vek avang leh kan hriatpui ve vek avangin a fanu chuan keini thian dun leh alo awm mi dangte chu zahin pawn khaw vawtah chuan apa chaw ei chhung chu alo ding khur ta ngar ngar a. Pa Mama lah a rilru hah leh thinrim, keini min ngaihtuah ve tho avangin chaw eikhama chhuak nghal ta mai lo chuan kan han titi khaw tlai leh a. Zan khat leh ni chawhnu chauh a kan hmelhriat Pa Mama chuan a felna leh a puitlinna tilangin keini a fate rual lek chu ngaihtuah takin, “ Thiante u, pawi ka ti khawp mai. Ka fanu vangin thil engkim thlak danglam angai ta si a. Exam an sawn hlat avanga hostel atanga chhuak niin a insawi bawk a. Chuvang naktuk khaw en lamah a thawmhnaw te hostel atanga la chhuakin ka haw pui angai ta tlat mai.In duh chuan ka rualin in la haw thei thova, in hmanhmawha tihtur dang in nei chuan Sumo ka biak sak nghal ang che u” tiin kan thian dun chu min hrilh malh malh a. Keilah Thawhlehniah Exam ven angaih avangin Thawhtanni ah haw ngei ngei ka lo ngai kher bawk nen. A mi sawmna zahawm leh nuam tak chu kan thian dun chuan hnialin Sumo chu kan thlang ta zawk a. Keini thian dun min ngainatna leh min ngaihsakna chuan amah ah ngainatna leh khawngaihna tam tak min pe ve nghal a. Naupang te mah ni ila, “ Tawngkam tha in sial a man” tih chang chawiin Pa Mama hnenah chuan “ PaMam, rilru ti hah lutuk duh suh. Pathian rem ruatah ngai rawh. Shillonga kan han chawl kher leh Happy Valleya I chhungte tlawh tum lo, tih tur dang engmah kan neih loh vanga kan han tlawh te kha. Tlawh lo ila chuan ngaih tha takin I fanu chu hostelah awm angah ngaiin naktuk lamah I haw san daih dawn ania. A hring a hran ngeiia rui chunga I man chhuak te kha Pathian hnenah lawmthu sawi zawk a tha ka ti hle mai. Keini te chu Tlangval pumpa, thran tur ang thang fel vek tawh kan nia, min ngaihtuah lutuk suh. I fanu nun hloh chho tan mek khi I ngaihtuah angai zawk” tiin ka thusawi chu kawng engkimah a pawm ve ani tih lantir nan Pa Mama chuan, “ I sawi dik khawp mai. Inrinni te khan ka haw hman daih tawh ania. Tinge chawlhniah nangni ho tenen kan haw ho kher. Pathian rem ruat ani e” tiin kan in mangtha tlang ta a. ( He thu ah hian Pa Mama leh Mami hria leh chhungte kan lo awma, in pawi ka lo sawi palh anih chuan ngaihdamna sang ber ka dil nghal a. He thu ka ziahna chhan tak zawk chu a phena entir awm khi ani. Fate u, in nu leh pa te chu phone hmangin in bum thei ngei e. Mahse bum theihloh Pathianin a hmu reng che u a. In nu leh paten in tana an tawngtaina hi Pathian hian chhangin a tih mualpho hun che a thleng ngei ngei ang. Phai lama awm vanga nun hloh kher lovin in nunah ringlo tuten Pathian hmel hmu sela, chutin Malsawmna I chhiarsen loh, PA hnen atangin I dawng ngei ang le. Chutin Nu leh Pate u – In fate tan tawngtai bansan lo ula. In fate hmun hrang hmuh phak lovah pawh awm se in tawngtaina avangin in fate chu Vengtu tha leh Rinawm kan PATHIAN chuan a vensak tlat ang che u. )
Posted on: Mon, 05 Aug 2013 05:14:18 +0000
Trending Topics
Recently Viewed Topics
© 2015