Chin Ralbawi Col. Solomon Thang Ding Malaysia Tlawnnak le Chin Mipi Hna Biaruahnak Malaysia CNF Regional Committee hruainak in December27,2014 ah tuahmi CNF Live Show Kual lian Chief Guest caah Chin ralbawi CNF/CNA Col. Solomon Thang Ding cu sawm a si I, December23,2014 ah Thailand in Malaysiaram khualipi Kuala Lumpur ah Pathian thawngin dam tein a rak phan. CRC rian ttuantu, Chin Khrihfa upa le Pastor,pengtlang upa hna,Chin lengdawh hna le Malaysia CNF-RC rian ttuantu hna le Malaysia CNF Chairman anupi le fale dih lak he minung40 nih bus pakhat in Kuala Lumpur International Airport ah sung lawi tak tak kan va don kho. December24,2014 ah Malaysia CNF RC upa le Chin ralbawi Col. Somolon Thang Ding cu zing 10:00am in 1:00pm tiang Malaysia CNF RC Office zung ah tonbiaruahnak kan ngei. Mi-E Christian Fellowship ah Chin mipi hna he 2:00pm-5:00pm tiang biaruahnak tuah a si I, biaruahnak ah a chuahmi dih lak nih Chinland Club ah min an pek colh. Zan 8:00pm ah Maluri sang um mi Chin mipi hna he Khuahring Christian Fellowship ah biaruahnak tuah a si I, Chinland club ah tampi an lut. December25,2014,X’mas ni ah Chin ralbawi Col. Solomon Thang Ding cu a khuami a si mi Hriphi tefa hna nih Christmas hmunkhat te hmanti dingin an sawm caah X’Mas cu Hriphi tefa hna he a va hman I, Hriphi tefa nih sunglawi tak tak in an don. Hriphi tefa hna he X’mas an hman khawh hnu zaanlei 4:00pm ah Jalan Ipoh sang um mi Chin mipi le Hriphi khua mi hna he biaruahnak ngeih a si I, Chinland Club ah tampi an lut. December26,2014 ah Chin leaders a si mi hna CRC,ACR,pengtlang upa, Chin khrih kip upa le pastor hna he Senthang Christian Fellowship ah 10:00am in 1:00pm tiang biaruah tuah a si I, Chinland Club ah tampi an lut. Puchong um Chin mipi hna he Chin Christian Fellowship ah 3:00pm in5:00pm tiang biaruah tuah a si I,mi tampi nih Chinland club ah an lut. Puchong CCF Chairman Pu Van Bawi Lian hruai nak in Puchong CCF mino nungak, tlangval, CCF upa hna nih kan ralbawi Col. Solomon Thang Ding cu sunglawi tak tak an don I, CCF mino nih hlarem dawh le ramhla an kan sak piak. Zaan 8:00pm ah Kepong um Chin mipi hna he Mara Christian Fellowship ah biaruahnak pehzulh a si I, Chinland club ah tampi an lut rih. December27,2014 cu Malaysia CNF- RC nih kumkhat chung timh tuahnak kan ngei mi CNF Live Show cu tuah a si I, Chin mipi 800 hrawng an chuah khawh. CNF Live Show ah Speacial deuh in sawm mi Chief Gust Col. Solomon Thang Ding, Kawlram hlasak thiam Kachin kan unau Naw Naw, le CNA Camp ah ministry a ttuan mi Pastor John F Thawng hna nih a kan tel pi khawh.CNF Live Show ah hlasaktu Malaysia Chin hlasak thiam singer chungin Tiddim,Falam,Hakha,Thangtlang,Mara,Zophei,Mindate etc… Chin miphun an tling ngai caah a ropui tak tak ko. CNF Live Show ah a rak tel ve mi pakhat nih Malaysia CNF- RC nih dohthlennak caah Show nan tuahmi hi a tha tuk hrin hrang. Kawl cozah nih Chin miphun hi an phan nak kip ram in an kan doh peng ti an theih lai I, Chin miphun ramdang a phan mi an kan theih deuh nak a si ping ah Malaysia um mi Chin mipi zong nih Show puai nan tuahnak thawngin ram le miphun dawtnak thinlung a kan ngei ter deuh tiah a chim. Hakha,Thangtlang mipi pakhat nih Malaysia CNF nih Kawlcozah kan doh nan ti I, CNF Live Show ah kawl hla lawng te nan sak termi hna cu a tha bak lo tiah a ti ve. CNF Live Show kan tuahmi cu phaisa tam tuk kan sungh ko nak in dohthlennak kan tuah lio ah kawl cozah kan duh lo nak hla le bia in kan langhter khawh mi cungah kan I lung hmui ngai ngai ko. Mipi thinlung ah kawl cozah uknak ttha lo doh duh nak lungput le ram le miphun dawtnak theipar a chuah ter mi kan hmuh caah kan I lung hmui ngai ngai. A rau hlan ah CNF Live Show DVD coil a chuak colh lai caah ram kip um mi kan unau sin ah kuat a si lai. December28,2014 ah Cheras CCF ah kan ralbawi Col. Solomon cu a pumh I, pumh khawh in Cheras um Chin mipi hna he CCF biaruah tuah a si I, Chinland club ah tampi an lut. Zaan 8:00 ah Cho Christian Fellowship ah Chin mipi hna biaruah nak tuah a si than I, a chuahmi vialte nih Chinland Club ah min an pek dih. Dec 29, 2014 ah Chin ralbawi Col. Solomon Thang Ding cu Singapore um mi Chin miphun tlawng ding ah a thawk I, Malaysia le Singpaore ramri khua simi Johor Bahru tiang kan va tla I,Singapore leiin Pu Ro Thawng nih ramri tiang a rak don. Kan ralbawi Co. Solomon Thang Ding cu Singapore ah Dec29-Jan2 tiang a caan hnu ah Jannuary2,2015 ah dam tein Kuala Lampur a rak phan than. A phan zaan bak ah Sungai Besi um Chin mipi hna he biaruahnak kan ngei colh. January3,2015 ah UN holhleh Interpreter hna he Malaysia CNF-RC Office zung ah biaruahnak tuah a si.Cun Alliace Of Chin Regufee(ACR) nih Ralbawi biaruah kan duh an ti caah 2:00pm tonnak an ngei. Jan4,2015 ,Victoria Christian Fellowship(kanpelet) ah sml: 1:00pm in 3:30 tiang biaruah tuah hnu ah sml:4:30 in 6:00pm tiang Chin Christian Church of Malaysia(CCCM) ah biaruahnak peh zulh in tuah a si hnu ah sml:6:30pm in 8:30pm tiang Zophei Quarter ah Chin mipi hna he biaruahnak tuah a si. Cun hnu ah peh zulh in Sami Region Christian Fellowship ah sml:8:30 in 11:00pm tiang biaruah tuah a si. January5,2015, Zotung Christian Fellowship ah sml:3:00pm in 6:00pm tiang Chin mipi he biaruahnak ngeih hnu ah Hakha Khuahlun um nak Maluri sang Chin Christian Fellowship ah sml:8:00pm in 10:30pm tiang Chin mipi he biaruahnak ngeih a si. Malaysia Chin mipi nih kan ram le miphun caah meithal tlaih in ka ttuan kho lo zong ah Pathian nih thazaang a ka pekmi phaisa in kum khat ah RM.200 in ram le miphun caah rian ttuan nak Chinland Club ah ka tel ve tiah min a pekmi 830 hrawng nan si cang. Kachin, Karen, Shan te pawl cu an ram ah sui-ngun a chuak mi a tam I, mah an ram thil chuak cu an zuar I, dohthlennak an tuah. Kanmah Chin mi (CNF)cu kan ram thilchuak a um lo caah mah ramdang in kan Chin unau nih dawtnak in CNF nan kan bawmhnak Chinland Club cu kan suikhawr a si. Kachin le Karen pawl an sui khawr cu kawl ralkap nih a chuh khawh hna i, nikhat khat ah a dih kho. A sinain, kan Chin miphun lungthin chung in dawtnak le zawnruahnak he a ra mi kan Chin suikhawr Chinland Club cu zeitik hman ah a dih lai lo I, zei miphun hmanh nih an kan chut kho ti lai lo tiah CNF kan pule nih an chimh tawn mi cu a tak in a tling cuah mah cang. Kan ram le miphun dawtnak in a chuah lungput hi zeithil hmangin thlen khawh a si ti lo. Kan ralbawi Col. Solomon nih nikhat voi3,4 tiang mipi he biaruahnak a tuah I, a baa tak tak ko nain miphun le ram caah a tha baa nak zong theih lo le rawl zong ei manh lo in peh in Malaysia caan tawite a um chung ah biaruahnak a tuah peng. Cun thla4 chung nupi le fale kal tak in chun zaan mitku cim lo in ram le miphun caah a cawlcangh pengmi kan ralbawi Col. Solomon Thang Ding Chin miphun nih kan I ngeihmi hi cu kan van a ttha tuk. Kan ralbawi Col. Solomon Thang Ding cu January6, zaan sml9:00pm ah Kuala Lampur Intertional Airport in Thailand lei ah a thok cang. Bangkok in Kolkata, cun a chungkhar umnak Aizawl khuapi ah a lan te lai. Kumthar lawmhnak le daihnak nan cungah um ko she! Upatnak he, Salai Thawng Cin Lian(Pawlung) CNF Malaysia Regional Committee Public Info In-charge Kuala Lampur,Malaysia Note: Hi a chunglei ca hi Faiceu Weekly Vol.6,No.288 ah ka ttialmi a si I, zapi nih rel nan duh sual lai tiah zapi biaruahnak ka tlahmi a si.
Posted on: Mon, 12 Jan 2015 16:01:34 +0000
Trending Topics
© 2015