HEL PAWLAH ‘HPC(D) PUANG TURIN HOME MINISTRY AH THLEN Home Minister, Pu R. Lalzirliana’n HPC(D) hel pawlte chu dan lo-a che thin pawla puang turin sorkar-in Home Ministry-ah a thlen niin a sawi. Assembly session neih meka MNF member, Pu Lalruatkima zawhna, ziaka a chhanna-ah Home Minister chuan, HPC(D)-te chu Unlawful Activities Prevention Act, 1967 hnuaia Unlawful Organisation-a puang turin sorkar laipui Home Ministry-ah Mizoram sorkarin a thlen niin a sawi a, an hruaitu pahnih, H. Zosangbera leh Lalropuia-te chu Mizoram police-te’n an man hnu-ah bail-a chhuah an ni a, mahse, Court-a an inlan that loh avangin manna tur thupek, Warrant of Arrest chhuah a ni a, tunah chuan man an la ni rih lo niin a sawi. Zawhna dang chhangin Home Minister chuan, HPC(D)-te chu Mizoram sorkar dodal zawngin an che a, mi ruk bo, inlambun, bomb tihpuah, tuk luih chhiah khawn leh thil dangah sorkar dan kalhin an che niin a sawi bawk. Pu Lalruatkima zawhna dang, ziak veka a chhanna-ah Home Minister chuan, kum 2011 atanga thun thleng hian Mizoramah hel hovin mi 37 an ru bo tawh a, heng mi 37 hi tum 9-a ruk bo an ni a, a ru botute zinga mi 10 man an ni tawh niin a sawi bawk. MNF member, Dr. K. Beichhua zawhna a chhan danin, kum hlui December thla atanga tunthleng hian silai leh a mu, dan lo-a tawlh ru mi 23 man an ni tawh a, ralthuam man leh a neitute lakah hian an manna atanga Police Station hnai berah thubuai ziah luh zel a ni a, thil chhui ngai chhui zawh a nih hnu-ah an thil mante nen anmahni enkawltu Court-ah thehluh vek tur a ni a, Court-in a tihral dan tura thupek a chhuah anga tihral thin niin a sawi bawk.
Posted on: Mon, 24 Nov 2014 10:42:46 +0000
Trending Topics
Recently Viewed Topics
© 2015