MORNING REPORT : 13.01.2015 (THAWHLEHNI) (Zonet Zing Daifim 7:30 AM) Police Report : Tukinah Serchhip tih loh kan biak thin Police Station dangte chu kan be kim thei a, kan hriat theih chinah nizan lamah thil thleng duhawm lo lian tham lutuk a awm lova. Lock Up ruak 4 a awm a. Tang belhkhawm 41 niin hmeichhia an tel loh zan a ni. Aizawl Police Station ah tang 14 kawlin, rinhlelh, khawm leh remand te an ni a. Bawngkawn PS ah tang 8 neiin rinhlelh leh remand an ni ber hlawm a. Mamit PS ah tang 5 neiin kumtlinglo pawngsualtua puh a tel a, tang dangte chu rukru leh zuruih vanga man te an ni hlawm. Lunglei PS ah tang 4 neiin zurui 2 leh family case a tantir 2 te an ni. Saiha PS ah tang 4 bawk neiin rukru 2 leh zurui 2 an ni a. Champhai PS ah rinhlelh man 3 kawlin, Vaivakawn PS ah rinhlelh man 2 an kawl bawk a. Lawngtlai PS ah mi bum ching 1 an kawl a ni. Hospital Report : Nimin tlai dar 5 atanga tukin dar 7 thlengin Aizawl Civil Hospital Casualty ah emergency case 50 vel an nei a, heng zinga 3 admit an ni a, khum awm loh vangin admit awm tak tak te pawh private hospital ah thawn nual an ni. Mitthi an nei lova; nizana Casualty pantu zingah hian pumna an tam ber a, road traffic accident vanga hliam nei 2 awmin uiseh 1 leh zurui medical 5 an awm bawk. Emergency & Labour Room ah nau piang 16 awmin, mipa 11 leh hmeichhia 5 an ni a, an zinga mipa 5 leh hmeichhia 2 chu zai chhuah an ni a, vawiina nei tur 10 an awm bawk. Synod Hospital Durtlang ah nizan khan emergency case 19 neiin heng zinga 11 chu admit an ni a, mitthi an nei lova. Nizana Synod Hospital Casualty pantu zingah hian puitlingah pumna, naupangah luak an tam a, Ward hrang hrangah khum ruak tlem tlem neiin Cabin a full a, ICU ah na zual enkawl 4 an awm a. Lawmna Ward ah nau piang 9 awmin mipa 4 leh hmeichhia 5 an ni a, vawiina nei tur 7 an awm bawk. Grace Nursing Home ah mitthi 1 neiin Cabin an full a, Greenwood Hospital ah thisaa lak 1 awmin Cabin an full bawk a. New Life Hospital ah nau piang 1 neiin khum an full a, Care Hospital ah khum an full bawk. Aizawl Hospital ah te, BN Hospital leh Bethesda Hospital ah te Cabin ruak an nei a, Aizawl a private hospital dangah Cabin an full hlawm a. Lunglei Civil Hospital ah nizan khan emergency case 20 neiin mitthi an nei lova, nau piang 2 awmin zurui medical 1 a awm a. Case tam ber pumna a ni a, khum a full a ni. Power Report : SLDC atanga thu kan dawn danin, nimina kawlphetha kan hman tlem lai ber, nimin zing dar 6 a kan hman zat 37.4 MW niin phai atanga kan hmuh tam lai ber, nizan dar 7 a kan hman zat 70.58 MW a ni a, tualchhunga siam chhuah 3.8 MW nen kan hman zawng zawng 74.38 MW a ni a. Nizanah Load shedding siam lovin eng pek theihna chinah chuan pek kim a ni a, Line chhia report dawn a ni lo bawk. Tukinah over draw vangin Load Shedding siam a ni. LPG REPORT : Mualkhang LPG Bottling Plant atanga nimina LPG pek chhuah dan report kan dawng lova: Ni 12.01.2015 zing dar 6:30 leh 13.01.2015 zing dar 6:30 inkar chhunga Borkhola, Assam atanga LPG phur motor, Vairengte Supply Check Gate a in report te : 1. Suakchhunga Gas, Aizawl ta tur Truck 1 phurh cylinders 288 2. V. Neihkunga Gas, Aizawl ta tur Truck 1 phurh cylinders 256 3. MIZOFED, Aizawl ta tur Truck 1 phurh cylinders 288 4. Zoram Indane, Aizawl ta tur Truck 1 phurh cylinders 288 5. Assam Rifles ta tur Truck 1 phurh cylinders 306 6. MIZOFED, Kolasib ta tur Truck 1 phurh cylinders 156 7. Guwahati atangin Mualkhang ami tur Bullet Truck 7 (pasarih) P.O.L REPORT : Guwahati to Mizoram 1. High Speed Diesel Truck 11 phurh Kilo Litre 148 2. Motor Spirit Truck 14 phurh Kilo Litre 168 3. Khawnvartui Truck 1 phurh Kilo Litre 12
Posted on: Tue, 13 Jan 2015 02:12:18 +0000
Recently Viewed Topics
© 2015