MORNING REPORT : 2nd AUGUST 2013 ZIRTAWPNI (Zonet Zing Daifim, 7:30 a.m.) Police Report : Tukin hian kan biak thin pangngai Police Station te chu kan be kim thei a, kan hriat theih chinah chuan nizan lamah thil thleng duhawm lo sawi tham a awm lova. Lock Up 13 zinga 7 chu a ruak a ni. Aizawl Police Station ah tang mipa 8 leh hmeichhia 1 kawlin narcotic case nei te, zurui leh traffic case a tangte an ni hlawm a. Serchhip PS ah mipa 3 kawlin an zinga 1 chu pawngsual case a man a ni a, 2 te chu rukruk leh rinhlelh mante an ni. Saiha PS ah zuruih vanga man mipa 3 kawlin Vaivakawn PS ah rukruk vanga man mipa 2 an kawl a. Champhai PS ah zuruih vanga man mipa 1 kawlin Mamit PS ah family case a hren mipa 1 an la nei bawk. Traffic Report : Nimina Aizawl a Traffic Rules bawhchhia man zat : Two Wheeler 20, Taxi 9, LMV 8, HMV 3, Bus 1, fine tlingkhawm Rs 8,500/- Excise Report : Aizawl District Excise ten rakzu litre 48 leh whiskey um 81 bakah taxi 1 leh scoooty 1 manin Lock Up ah tang mipa 3 leh hmeichhia 2 an kawl a ni. Hospital Report : Nimin tlai dar 5 atanga tukin dar 7 thleng khan Aizawl Civil Hospital Casualty ah emergency case 70 an nei a, mitthi 3 an nei a. An mitthi zinga 1 chu Kelsih khua, bike accident vanga thi a ni a, 1 dang chu Aizawl veng pakhat ami zurui lum hlum nia sawi a ni. OD hmeichhia 1 chu an chhan thei bawk. Nizana Civil Hospital Casualty pantu zingah hian Malaria refer case an tam hle a, a dawtah chuan pumna leh luak an an tam deuh ber a ni. Zurui medical 1 a awm bawk. Khum ruak a awm lova, Casualty bikah hian khum 15 ah damlo 18 an admit a ni. Labour Room ah nau piang 9 awmin mipa 6 leh hmeichhia 3 an ni a, an zinga mipa 1 chu zai chhuah a ni a, vawiina nei tur 8 an awm bawk. Synod Hospital Durtlang ah nizan khan emergency case 9 neiin heng zinga 4 chu admit an ni a, mitthi an nei lo. Nizana Synod Hospital pantu zingah hian naupangah khawsik leh puitlingah luna luhai an tam a, khum ruak tlem an nei. ICU ah na zual enkawl lai 2 an awm a. Lawmna Ward ah nau piang 9 awmin mipa 3 leh hmeichhia 6 an ni. Aizawl Hospital ah mitthi 1 leh nau piang 2 neiin Cabin an full a. New Life Hospital ah nau piang 1 neiin khum an full a. BN Hospital ah nau piang 2 an nei a; Greenwood Hospital leh Care Hospital ah te khum an full bawk a. Nazareth Hospital Ramhlun North ah te, Grace Nursing Home ah te, Bethesda Hospital ah te, Adventist Hospital ah te Cabin an full a. Lunglei Civil Hospital ah nau piang 2 an nei a, khum ruak tlem an nei a ni. Power : Nizan dar 7 a phai lam atanga power kan hmuh tam lai berin 63.8 MW kan hmu a, Serlui B atanga siamchhuah 7.8 MW nen kan hman zawng zawng chu mega watt 70 chuang a ni a. Load shedding awm lovin eng pek kim theih a ni. Line chhia report a awm lo bawk.
Posted on: Fri, 02 Aug 2013 02:12:58 +0000
Trending Topics
Recently Viewed Topics
© 2015