PREMIER LEAGUE TAN TA ** Thu ngaihnawm lawrkhawm. Khawvel Football Legaue thar berah chuan kan chhal ngam chiah lo a nih pawhin League dang zawng zawng aia khawvel mipui en hlawh bik a ni tih erawh kan pawm thlap. August ni 16, 2014 hian 2014-15 English Premier League season tan a ni ta. Top-flight club 20 te hian tun nipui bazarah £647m chuang player lei nan an hmang tawh. Season hmasa summer transfer ai khan £17m laiin sum sen a tam tawh. Transfer window a la zo lo, £1bn thlenga sum sen a nih a rinawm. Manchester United chuan an khel hmasa ber anga, Old Trafford-ah Swansea City an mikhual dawn. Chelsea erawhin Thawhtan zanlaiah Burnley an hmachhawn dawn. Club lian dang Man City chuan Pathianni zanah Newcastle an tum dawn a, Liverpool pawhin player an chhuhsak Southampton an mikhual dawn. Community Shield la zo hlim Arsenal chuan Crystal Palace an mikhual anga, West Ham leh Tottenham inhmachhawn tur pawh en a chakawm tawh hle mai. English Premier League Fixtures 16th Aug, 2014 (Inrinni) 05:15 PM Man Utd vs Swansea 07:30 PM Leicester City vs Everton 07:30 PM Stoke City vs Aston Villa 07:30 PM West Brom vs Sunderland 07:30 PM West Ham vs Tottenham 10:00 PM Arsenal vs Crystal Palace 17th Aug, 2014 (Pathianni) 06:00 PM Liverpool vs Southampton 08:30 PM Newcastle vs Man City 19th Aug, 2014 (Thawhtanni) 12:30 AM Burnley vs Chelsea Manchester United chuan kum hnih manager thar nen bul an tanna a ni dawn a, Season hmasa khan David Moyes chuan 7-na a nihpui thei hram a. Holland coach Van Gaal chuan United Pre-season tha takin a hman pui a, an khingpui zawng zawng an hneh vek. Kum danga sum seng hnem ngailo Arsenal pawhin kumin chu sum sen an hreh lemlo, Alexis Sanchez chu Barcelona atangin £35m in an lalut a, tun nipui bazara Premier League club-in player a leina man to ber a ni nghe nghe. Season liamta khan Arsenal hian FA Cup an chawi a, Season khuh hawnnaah Man City 3-0 laiin Arsenal hian an hneh leh bawk. Beisei sang tak nen season bul an tan leh dawn. English Premier League TV Rights hi BT Sports leh Sky ten an nei a, season khat chhungin TV Rights atangin Premier League hian £1bn an chang a. Winner-in Prize money leh TV Revenue atanga an hlawh thei chu £100m vel a ni dawn a, season liamta khan Manchester City chuan £96.5m an hlawh a, pahnihna Liverpool aiin £1m chuahvin an chang tam (TV Rights bik atangin). Cardiff kha Premier League mawngphah niin, an relegate a, khati chung khan £62m an la chang tho ! Tun season hian thil danglam Premier league-ah hman a ni thar leh dawn. 2014 World Cup-a hlawhtling taka an hman Vanishing Spray chu Premier League referee ten an hmang dawn ta a. Tun season hian Team 5 lai chu Champion thei niin expert-te chuan an sawi. Jose Mourinho chuan season liamta khan cup pakhat tal pawh a chawi lo, kumin chu cup pakhat tal chawi tumin team a remkhawm. Tun Nipui bazarah khan player thar lei nan £80m a seng. Spain International pahnih Diego Costa leh Cesc Fabregas te a lalut a, tin, a player hlui Didier Drogba pawh free transfer-in a lalut leh bawk a ni. Tun Nipui Bazara player leina man to dan indawt Alexis Sanchez [Barcelona - Arsenal] £35m Diego Costa [Atletico Madrid - Chelsea] £32m Eliaquim Mangala [FC Porto - Manchester City] £32m Cesc Fabregas [Barcelona - Chelsea] £30m Ander Herrera [Athletic Bilbao - Manchester United] £29m Romelu Lukaku [Chelsea - Everton] £28m Luke Shaw [Southampton - Manchester United] £27m (Could rise to £31m) Adam Lallana [Southampton - Liverpool] £25m Dejan Lovren [Southampton - Liverpool] £20m Lazar Markovic [Benfica - Liverpool] £20m Manchester City hi season liamta khan Premier League champion ni mahse kumin hian enge an an dawn a sawi lawk theih hauh loh. UEFA Financial Fair Play vangin player lei nan sum tam tak an hmang thei ta si lova. £50m vel chu hmang tho mahse an mit it zawng an la thei ta lo. Kumin hian an title hi an humhim thei angem ? Holland boss nihna kalsana Man Utd enkawl thlang Van Gaal pawhin Spanish midfielder Ander Herrera lei nan £29m a hman bakah Southampton left back Luke Shaw lei nan £27m a hmang bawk a, player hrawl tak lei tumin hma a la leh mek. Liverpool chuan £75m -in an striker Suarez chu Barcelona lamah an hralh, player dang an chaw lut nual, Season hmasa a pahnihna dinhmun hauhtu hian Champion turin player an nei tha em tih chu zawhna a ni ta a. Brendan hi coach tha tak a ni a, Suarez nei tawh lo mahse a player lak tharte hian Liverpool chu sang takah a chawi kan theih a rinawm tho a ni. Kumin nipui bazara chanchin langsar ber pakhat chu Southampton-in an player pawimawh 5 an hralh chhuak kha a ni a. An manager Mauricio Pochettino chuan Spurs a zawm san a, Adam Lallana, Dejan Lovren leh Rickei Lambert te chuan Liverpool an pan a, heng player pathumte hian Pathianni zan hian an club hlui an hmachhawn nghal dawn a ni. Tin, Luke Shaw chuan Man Utd a pan a, Calum Chambers pawhin Arsenal a pan a. Dani Osvaldo chuan loan-in a chhuahsan bawk a ni. Club 7 te chuan European competition an hmachhawn dawn a. Man City, Liverpool leh Chelsea te chuan Champions League group stage an qualify tawh a. Arsenal hian play-off an khelh phawt a ngai dawn a, Turkey club Besiktas nen play-off an khel dawn a ni. Tin, Europa League lamah Everton, Tottenham leh Hull City te kan hmu dawn a, Championship division atangin club thar pathum, QPR, Leicester City leh Burnley te Premier League-ah kan hmu dawn a ni.
Posted on: Sat, 16 Aug 2014 12:59:03 +0000
Trending Topics
Recently Viewed Topics
© 2015