TUOLSUNG CHANCHIN Vol.8. Issue No.30 28 Oct.-3 Nov. 2013 ** 31st Oct/13 khan Songpijang ah Kuki Students Organisation (KSO) Conference hmang a ni a, hi huna Chief Guest chu Pu Haokhothang Kilong, IRS, Dy. Commissioner of Income Tax, Guwahati a ni a, Guest of Honour chu Pu S.T Jem Hrangkhol, EM, NCHAC le Pu Lamhao Doungel, APS, Add. SP (HQ) Tinsukia hai an nih. A zingah 1st Nov/13 khan Chavang kut Silver Jubilee Programme phuisui taka hmang a ni a, sun huna Chief Guest chu J.B. Patniak, Assam Governor a ni a, Guest of Honour hai G.C. Langthjasa, MLA & ASTC Chairman le Debojeet Thaosen, CEM, NCHAC hai an nih. Zan huna Chief Guest chu CEM bawk a ni a, CEM hin 17 lakhs Songpijang playground siemna dingin pek an tiem. Guest of Honour hai Flaming Rupsi, EM, NCHAC hai le Ngamrothang Hmar, Chairman, NCHAC hai an ni a, Pu Ngamrothang Hmar hin sumfaiin a thangpui bawk. Hi Chavang Kut um ding lei hin kar khat kar hni lo liemtaa inthawk khan Chavang Kut Silver Jubilee Celebration Committee bakah PWD Deptt. khawm an lo insingsa nasa hle a, Haflong khawpui sunga lamlien sietna hai siemthat a nih. ** Sodou Asom Karmachari Parishad, Guwahati thusuok dungzuiin tuta kar Nilaini khan district dang danga D.C. office tuol tinah SAKP haiin thla 33 a mi revised arrear pay & allowances ngenna le inzawmin Dharna nei a nih. Hi ni hin SAKP Haflong unit khawmin DC office tuolah arrear bakah master-roll employees hai hlaw sukpung ngenna leiin nuor inentirna an nei a, state thawktu a za tel an fekhawm. Hi nia dharna hin kawngro a suk naw chun hmatieng khawm dharna la nei pei ning a tih tiin SAKP Haflong unit thuoituhai chun chanchinbu mihai an inhriettir. Hi ni hin duthusamin thawktu an inthawk suok tha naw a, thla 33 arrear hi hei hmu chie inla chu dharna-a thangnawtuhai hin lak hmasak tum ding an na ti chu thuoituhai thlirdan a nih. Chuleichun, hmatieng peia chu sawrkar laka dharna/strike nei chang hai hin thawktu thang rawn thei ta hlak inla ti chu ditdan a nih. ** Tarik 27/10/13 khan Pu Malsawm Tuolor, Gen. Secy. a in ah HPU huoihawtna hnuoiah ei hnam sunga organisation HPU, HYA, HSA, Hmar Arasi hai Joint Meeting nei a nih. Hung tlung ding Nov.6/13 khin khuo hmun ding Hmar haiin ramthar ei lak enfelna nei ding ti a nih, hi taka a fe hai in an tulnaa hmang dingin Pu Zakham Zate, HPU Committee Member in Rs.3000 a pek. Hi huna fe le hungnaa motor hmang dinghai chu Pu Ngamrothang Hmar, Chairman, NCHAC, Pu Laltlansang Hmar, EM, Pu L. Hlima Keivom MAC le Pu Khawvelthang Hmar MAC haiin tum an tih ** Muolhoi Valupa huoihawtna hnuoia ‘Tlawmngaina’ ti thupui hmanga “Aw mi sang tamtak” ti hlaa inruolsiekna result chu November 1 zan khan puong a ni a, lawmman pakhatna cheng 10,000/- dawngtu chu Zion & Venghlui an ni a, pahnina cheng 5,000/- dawngtu Ramtha veng & Bethel veng, chun pathumna cheng 3000/- dawngtu chu Kargil & Mission veng hai an nih. Vengbuk faitak lawmman cheng 1500/- chu Gilgal veng inhlan an nih. Chun Hlapawl best conductor dawngtu Mr. Joseph Lungtau a nih. Vengbuk dang dang hai khawm zangna dawmna inhlan seng an ni bawk. Hiengang hla kutpui hi nunghak-tlangval ha’n an zawngsak hlea hmatieng khawm nei hlak nisien an nuom thu an hril. Hieng lai zing hin kum nawk tieng chu Hla Kutpui a lo um nawk chun Judges hai chu Muolhoi khawsung mi ni ta naw hai sien ti hi tamtak ditdan a nih. ** Nulding Kut 2014 hmangna dinga lottery buotsaia um chu Nov.1 khan draw a ni a, chutaka result hai chu - 1st 1713, 2nd 3335, 3rd 1812. Consolation prize 3303, 2417, 3416, 2364, 3482. ** November 1 khan IPF le a hnuoia pawl hran hran hotuhai chun Haflong Circuit House ah Assam Governor J.B.Patnaik inhmupuina an nei a, N.C.Hills hi autonomous district pahnia the dinga ngenna memorandum inhlanna an nei.Hi huna hin IPF huomsunga hnam dang dang palai an fekhawm tha hle a, chun Governor chu hnam dang dang puon inhlan a nih. IPF thilngen hi Group of Ministers Committee in a ngaitha leia lungninaw zie inentirna in kar thar Thawtanni, November 4 zingkar dar 5:00 a inthawk khin Nilaini zingkar dar 5:00 chen NC Hills Bandh puong a nih.IPF chun GoM chu liem tah Oct.25 chen kha deadline a pek a, chuong sa khawm chun uksak a la hlaw chuong nawh.Chuleichun hi district sungah mihriem hringna le thuomhnaw tawksiet zawng thiltlung a lo um pal khawma mawphurtu ding chu sawrkar a nih tiin IPF chun vaulawkna thu an suo. ** Kuki Chavang Kut Silver Jubilee 2013 hmangna le inzawma Miss Chavang Kut 2013 a ding zawngnaah Miss Osin Lhouvum d/o. Rev. Lienmang Lhouvum, Songpijang khuo chu thlangtling a nih. EFCI N. C. Hills District NHP Silver Jubilee-cum- Annual Conference 2013 Hungtlung ding November 8-10, 2013 khin EFCI N. C. Hills District NHP Silver Jubilee-cum- 23rd Annual Conference 2013 chu Saron-ah ropuitaka hmang dingin an inbuotsai mup mup zing. Hi inkhawmpui thupui ding hin “Nuhmei |ha” (Thuvarhai 31:10-31) ti ning a ta, Speaker dingin Mrs. Lienkhawtling Thiek, Guwahati ni bawk a tih. Hi Silver Jubilee hmangna le inzawm hin Jubilee lungmawi Saron EFCI Biekin compound le DS Office, Muolhoi-ah phun ning a tih. Jubilee ruoi ropuitak buotsai ni bawk a ta, Jubilee Souvenir khawm buotsai ni bawk a tih. Jubilee kum a ni leiin thu le hla inruolsiekna kum dang nei ni ta naw sienkhawm tukum hin nei ning a ta, chutaka ding chun Unit tinhai nasatakin an inbuotsai thu hriet a ni bawk. Hi Silver Jubilee inkhawmpui hmang ding hin mitin fiel ei nih. ** Kar liemta sung khan Pu Maccabe Pena hai nupa inkar ah naupasalte hmel lawmum takel Haflong Civil Hospital ah an nei. Chun Pu Immanuel Darngawn hai nupa inkara khawm naunuhmei te hmeltha takel Haflong Civil Hospital ah an nei. Nau enkawl dan ding ngawt an ngaituo nia hriet a nih.
Posted on: Mon, 04 Nov 2013 15:23:42 +0000
Trending Topics
Recently Viewed Topics
© 2015