Tuailai Day Message: Tuailai na hunzat ah Pathian a lungkim na diam? (T Damkhothang, Lecturer, GBC) Tukha Tuailaite ading a ni poimoh mahmah TUAILAI DAY muthei nawn dinga damna hon pia i biak Pathian tung ah kipahthu ka gen masa hi. Khristian Thukizakna simtu abik takin Tuailaite chibai ka hon buk hi. I gamsung ah siatna thupi taktak te’n tuailai tampitakte hon nuai ek lai in, lungsim hon khoih mahmah leh tuailai hichibang omthei i hi maw hon chisak mikhat thugen kontak lang masa ding “khatvei thu in, sepna (kam) nih ka mu a himahleh, a loh tawmzaw pen ka tel, chiin atelna ziak hichiin hon gen hi, a loh tamzaw pen ah Biakinn omlou, atawm zaw pen ah ka kikhop theih zelna ding Biakinn hoihtak a om ziakin a tawmzaw pen ka tel chi hi.” Thupi ka sa mahmah a hiai bang a tuailai thupi leh zahtakhuai mipa ziak in Pathian’ min ka phat hi. Eklijiasti 11:9 “Aw tangval, na tuailaiin kipak in: na tuailai nite ah na lungtang in hon kipak sak hen, na lungtang lampite ah leh, na mitte muh in om in: himahleh hiai thilte tengteng ziak in Pathian in nang vaihawmna a honpi ding ahi chih theiin”. Tuailai tampite’n hiai Bible tang in, utbang banga om theihna phalna pia kisa in, tuailai hun tomkha sung a nuam thei pen a zat ding chi bang in ngaihtuah khasek uhi. Tuailai hun sunga lungtang leh mit in a lunggulh peuhmah piak ding chiin poisakna om hetlou in ut bang bang in a hinkhua uh zang uhi. Tua banga lungtang hon kipak sak thei hi a i ngaihtuah khenkhatte: 1. Zu leh khamtheih tuamtuamte. Mikhat in, “Zu leh khamtheih te a om mahmah kipahhuai ka sa, i lungkhamnate leh i haksatnate hon mangngilh sak thei” chi hi. Hichi bang ngaihtuahna in, khangthakte zou mahmah ahih man in, zu leh khamtheihte a lungkimna zong tuailai tam mahmah in i gam sung ah pung mahmah a lungkham huai hi. Hiai bang ngaihtuahna pen Setan vanzat thupi mahmah ahi. Dr. Rod Mattoon in, "na kham sung in bangmah na phawk kei ahi maithei, na kham aven chiang in alehnih in na lungkham ding” chi hi, hiai bang thudik tuailai ten letkip ding in deihhuai mahmah hi. 2. Numei Pasal ut dandan a kipolhna: I gamsung ah tuailaite lak a siatna thupipente hiaite ahi chileng, gen khial ding in ka ki-um kei hi. Tuailaite lak a Setan vanzat thupi mahmah nawn tuh, “na hon it taktak leh na sapum leng na it kei ding” hiai bang thudik a ngaihsun in, tuailai tampite’n, a siangthouna uh na mansuahta uhi. Numei khat in, a lawmnu kiang ah, “naupai kha ka hi, chia a gen leh, a lawmnu’n, tulailai a naupai chih haihuai, damdawi atam tam maizen toh” chi hi. Tuailai aw, Pathian mai a na kisel zoh louh hun hong tung ding ahi, na hinkhua zatdan enpha thak in. “Na khelhna un ahon mukhe ngeingei ding chih thei un” (Nam. 32:23). Tua ahihman in, na khelhna in ahon muhkhiak ma in, nang na khelhna na muhkhiak a Pathian’ mel na zon ding poimoh mahmah hi. 3. Pathian sanga dawi leh kaute muang zaw: Tulai in i gamsung ah, dawi leh kaute nasepna tuailaite lak ah uang mahmah in, dawi leh kaute thilhih theihnate Pathian’ thilhih theihna sanga hatzaw ding a gintakna tuailaite lungsim a om in, Maibi/Maiba peuh naih a suveng dia kisa bang zong kiom ahihman in poi mahmah hi. Tangval khat in, “Kaisar thilte Kaisar kiang ah, Pathian thilte Pathian kiang ah pia un” (Mk 12:17) chih pansan in, dawi nasepte dawi thilhih theihna mah pansan a hihveng ding ahi chi hi. Makhai ah Kaisar lim tuang khamah inteh, tuailai nang pen Pathian lim leh mel suun a bawl na hi (Gen. 1:27). Pathian lim leh mel tuanna nang na hi chih mangngilh kei in. Pathian in nang ahi a hon deih. Leitung in hoihlam sang in siatlam a manoh a, a manoh lai ding hi. himahleh tuailai aw, na hunzat ah Pathian a lungkim na diam? John Wesley kiang ah, a lawmpa’n hichin dong hi, “John, zingchiang zankim a siding hilechin, tua kipan na hun omlai teng bangchi bang in na zang dia? Wesley dawnna, tua plan ka bawlsa bangbang in ka zang ding chi hi. Ahihleh tua na plan bawlsate bangbang eita? Wesley dawnna, tuzan chiang in ka biakinn uah thu ka gen dia, zingchiang in khua dang ah thugen ding in ka kuan dia, thu ka gen khit chiang in, ka lawmpa Martin inn ah giak ding in ka pai dia, amaute toh fellowship ka nei ding ua, tuakhit chiang in ka giahna ding room ah ka pai dia, Toupa aw, ka hinna hon kep sak in chiin thumna ka nei dinga huchiin ka ihmu suk dinga ka khanloh chiang in vangam ah ka khanglou mai ding chi in dawng hi”. Tuailai, nang hiaibang tuak ding hile chin, na plan bawlsa na khek lamdang ding bangzah a om dia? Tua ahih manin, na hunzat ah kienpha thak in, Pathian tuak ding in na kiman na hiam? Toupa’n TUAILAI DAY tungtawn in Pathian’ lungtuak dingin hon ompih chiat hen. #Ebchq.org|Kristian Thukizakna (October)
Posted on: Tue, 01 Oct 2013 14:43:32 +0000
Trending Topics
Recently Viewed Topics
© 2015