ZOGAM TODAY, AUGUST 6, 2014 Police venbitna toh Cooperative Bank kikhong Lamka, August 5: Police venbitna khautah nuoi a Manipur State Cooperative Bank, Churachandpur Branch tunin hong in um a, ngaina bang in bank staff te office kai in nasep panta uhi. Tami hun ah L. Premkumar, Manager, MSCB in mipi (customer) kung a loan atam theipen pieh ding chi Bank Manager koipou lunggul leh lungtup hinanleh MSCB Share holder (LAMPS) in bank puhsiet theina ding khop a demand 2: grantor panglou a bank in loan apieh ding leh bank in akintheilam a loan ahawm ding chi pen sil hamsa leh vangsiet um tah chin gen hi. Aman agenzelna ah SEGP 2005-09 nuoi a Rs 12.40, crore loan a kihawmkhete recover ahitheina ding in bank in tu-le-tu in recovery camp sai lel a, tuate hoitah a recover ahithei leh maban ah bank in loan hawm thei kia ding chi hi. L. Premkumar, Manager, MSCB ahileh December 2016, in asepna apat pension in retired ta ding hi. XXXXXXXXXXXX Nicholas shina thu toh kisai in ZRA in hilchetna bawl Lamka, August 5: Zomi Revolutionary Army (ZRA) in July28, 2014 ni a meltheiloupawl in vangsiet huaitah a Nengzamuan@Nicholas atha na toh kisai in suunpi thu phuong kawm in hilchetna bawl uhi. Thusuo in atahlat dan in kum 1998 in Nicholas in ZRA zom a Zo Nampi a ding in nasem in hinanleh 2012 kum in politician khenkhat in puikhiel ua, April 17, 2012 in suspend in um a tuajou in thupieh ajuilou ban ah buaina a siem zieh in June 23, 2012 ZRA apat in terminate in um chi hi. Thusuo in atahlatbe na ah June 17, 2012 in Nicholas in gaalvan 17 leh cadre 18 te Kangkap khuo, Singngat Sub-Division ah taimangpi a, SoO ground rule bawsiet zieh in India Security Force-te’n gaalvan te leh cadre teng man uhi. ZRA in ataikhie cadre jousie ngaidanna bawl in cadre 15 te kinuale ua Nicholas pang in cadre 3 te kinuale nawnlou ua, amaute geina theipi nawnlou hi’n hilchetna bawl kawm in ZRF/KNO a Defence Director panmun atuh lamdang asahthu uh gen uhi. Nicholas khu ZRA apat taimang ahina toh kizui in ama shina thu dihloutah a ZRA ngaw in um nanleh tami tungtang ah ZRA kihal khalou ahidan zong hilchetna bawl uhi. XXXXXXXXXXXXXX Saikot PHC nuoi a um PHSC 3 te ah DDT 2nd Round kap ding Lamka, August 5: District Malaria Department, Churachandpur in Saikot PHC nuoi a um Alfa PHSC, Khuangkhai PHSC leh Khaukual PHSC nuoi a Population 10855 umna khuo-68 leh Inn-2163 a DDT kapna anei jou toh kituoh in DDT 2nd Round kapna jousiangta ding hi. District Malaria Department, Churachandpur in PHC leh PHSC nuoi a khuo leh inn te a DDT 2nd Round kapna anei uh peitou zel a, tunitah in khuo leh inn atamzaw ah DDT 2nd Round kapna jousiang ta uhi. Zingchieng, August 6, 2014, nia Saikot PHC nuoi a um PHSC 3 te a DDT 2nd Round kapna ding toh kisai tunin DDT bags leh sprayer pang in silbangkim mansa in um in kisahkholna silbangkim jousiangta uh chin department report in gen in Spray Team ten Alfa PHSC nuoi ah Population-1477 umna khuo-14 leh inn-284, Khuangkhai PHSC nuoi ah Population-3742 umna khuo 21 leh inn-761 leh Population 5636 umna Khaukual PHSC nuoi ah khuo-33 leh Inn- 1118 te ah DDT kapna nei ding uhi. XXXXXXXXXXXXXXX Red Shield Division CO in Pauginmuang Khuga Dam etpi Lamka, August 5: Kum 10 sung guolphalou a ana um Master Pauginmuang MACR-CC te’n va kimupi ua, tuanah aman Khuga Dam en ut ahidan agen toh kizui in Army Khuga Battalion aum Red Shield Division CO in Dam etpi hi. Khuga Battalion Captain Arun, Army Subeder Major Shashid leh Reporter khenkhat te’n Army Ambulance zang in Khuga Dam ah Pauginmuan sight seeing neipi ua, tuanah Pauginmuan pa in Army te adieh a CO tunga kipah mama ahidan gen hi. Hunbeisa in MACR-CC te panlahna nuoi ah Master Pauginmuan khu Imphal khopi sung sight seeing neipi ahi banah state Hospital a doctor te etsah in um hi. Pauginmun ahileh Cerebral palsy natna vei hi a, Doctor te phalna toh Innmun a etkol in umlel hi. Army Doctor te’n Pauginmuan kung ah akul leh poimaw bang a panpi ding uh ahidan chiem uhi. XXXXXXXXXXXX Health department nuoi a staff- ten School tuomtuom vehna nei Lamka, Augist 5: Sungkhaw (Diarrhoea) apat kivenna ding toh kisai a Intensified Diarrhoea Contol Fortnight(July 28-August 8, 2014) program hon ahijou tunin Health department nuoi a staff ten School tuomtuom vehna nei in naupangte khut sildan zilsahna neisah uhi. Tami toh kisai in tunin Vimala Raina High School pang in School tuomtuom thum ah khut sildan (hand washing) zilsah in um hi. Tuakawmkal ah NRHM nuoi a ASHA worker ten zong amauh bial/khuo sung ah door-to-door visit pan in naupang kum 5 nuoilamte ORS/Zinc piehna anei ban ah sianthouna toh kisai in khut sildan zilsahna zong panta uhi. XXXXXXXXXXXXXXXXX ZYA in District Police te nasep patat thu phuong Lamka, August 5: Kabib K. IPS, SP Churachandpur makai Emmanuel Fimate, SDPO, CCP leh Churachandpur District Police te’n district lemna leh muonna shuse thei Zu leh khamthei amatkhiet na tung ah ZYA GHQ in apatat thu phuong uhi. “Khamthei Doudal” kum chi Annual Assembly (resolution no. 1) hun a Zomi Youth Association (ZYA) GHQ in aphuon toh kituoh in GHQ makai Unit 103, Block 13 leh Constituent Unit 7 te’n thei khamkham in Zu leh khamthei doudalna nasep apeipi kawmkal a tambang a Police department in nasep aneina tung ah kiphah thu phuong sawnsawn in mipi leh pawlpi tuomtuom te’n zong Police department mai ngansie lou a kithuopi chient ding in zong ngetna bawl uhi. XXXXXXXXXXXXXXX Police-te’n azu matte uh bawkhie Lamka, August 5: Churachandpur Police Department ten zani, August 4, 2014, nitahlam nai 4:30 ding vel a Khumujamba Meitei Leikai luh a bucket 330 a Zu kibil leh Zu huonna umm-le-beel leh Zu tampi a mankhiet te uh tunin Zomi Colony Lei (bridge) tung apat Chiengkawnlui ah bawkhie in shusie uhi. Suhsietna nasep hun ah Police personnel leh VDF kigawm mi 20/30 ten Police station apat Zomi Colony Leibul tan mat a um Zu-kibil leh Zu te 407 truck ah nawn (ferry) in bawkhie ua market ah atawmpen in Rs 1 Lakhs valued man hiding chin zong Police report in gen hi. XXXXXXXXXXXXXXXX Delhi Zou organization te’n ZYO President kipahpina leh hakhietna nei Lamka, August 5: Abeisa Pasianni in UZO delhi lamkaina toh Delhi a um Zou organization tuomtuom ZYO leh ZSP te’n Pa Khakhai tenna inn ah ZYO President Lawrence K. Munluo lawchin kipahpina leh Delhi a pawtkhiet san ding toh kisai hahkhietna vaiguon nei uhi. Tami vaiguon uap a kuon organization lamkai jousie in kipahpina leh vaihah thugenna nei uhi. ZYO Delhi President Lawrence K Munluo ahileh MCS a lawchinna nga ahi a, aman sawtlou kal in MPS dinmun tuding hi. XXXXXXXXXXXXXXXX Kiphinna nei mipite’n CM inn bulu sawm Imphal, August 5: Joint Action Committee (JAC) te’n Lourembam Ongbi Rangita Devi kithana toh kisai ah United Mothers Organisation le POirei Leimarol te toh tuni’n kiphinna huaisetah nei ua, Chief Minister pa kung ah memoramdum piehlut ding lunggulna toh a tenna bungalow bulu sawm uhi. Yairipok area apat women folk leh mipi tamtah te’n passenger bus zang in CM Bunglow , Moirangkhom junction, Imphal ah kiphinna nei ua, tua hinanleh Imphal West District police station a um police personnel te’n Old Secretariat Complex mai ah ana khaam in Chief Minister kung ah memorandum pelut ding in mi tamlou telkhie uhi. JAC pawl in August 6 masang ngei a Lourembam Ongbi Rangita thatute khu mawpai ding in phutna bawl ua, tuachi ahilou leh tu sang a kiphinna huaise zawsem pankhe ding uh ahidan phuongkhie uhi. XXXXXXXXXXXXX “Status of Women in Manipur” chi thupi zang in Public meeting nei Imphal, August 5: Joint Action Committee (JAC) pawl in tuni’n Editor of Naharolgi Thoudang, Loyalakpa, Human Rights Law Netwokr, Eliza shina toh kisai ah public meeting nei ua, tuanah Adovacate Seananda leh JAC palaite’n Longol Type 2 Community Hall mun ah thugena nei uhi. Tam meeting hun sung ah Advocate Sebananda in , Police complain khu Lamphel Police station ah bawl in umjouta a, vangsietna tuoh innsung mite’n Medical expert team te suizuina neiding in thuphuhna bawl uhi. Tualeh suizuina nei police department te’n bangtan ahiei khat masawm jouta uh ahidan Advocate in gen a, tam khu daan dungzui a pankhawm hun ahi chi’n JAC pawl in gen hi. XXXXXXXXXXXXXXXX ILP Khu Centre khut a kinga ahi: Gaikhangam Imphal, August 5: Deputy Chief Minister Gaikhangam in Manipur gamsung a ILP zatkhiet ding thu khu Central government khut a um ahidan gen in State government in tu hun tan ah bangma bawl thei neinawnlou ahidan tahlang hi. Gaikhangam in Naharolgi thoudang innkuonpi te financial assistance panpina abawlna ah tambang thu genna nei a, tua hinanleh Yaiphaba innsungmite kimupi theilou ahidan tahlang hi. Tam hun ah mipite dohna dungzui in State government in DIPR khu major department a hengkhiet sawm ahidan gen a, tuaeh Manipur gamsung a Inner Line Permit system zat ding thu khu state government khut a kinga nawnlou in Centre khut a um ahita chi’n phuongkhie hi. XXXXXXXXXXXXXXX Imphal operation ah MNRF lamkai khat mat in um Imphal, August 5 : Imphal east commando te’n singjamei Bheigyapati leikai , Manipur Imphal East District mun a operation khautah aneina ua, Manipur Naga Revolutionary Front SS Sgt Maj Ruichinghao Jajo alias Achung alias Ahao (40) s/o Ramthing Jajo of Nongdam Tangkhul of Ukhrul district mankhie uhi. Tambang search operation ahileh Imphal East Commando te’n zingmawngnai 4am apat nai 6am kikal innei ua, tuanah bial khiet a um mi 2 sim in mimal 10 te verification neiding in mantang uhi. XXXXXXXXXXXXXXXXXX
Posted on: Thu, 07 Aug 2014 17:03:27 +0000
Trending Topics
Recently Viewed Topics
© 2015