மாவீரர்களின் ஈகங்கள் =>மீழ் கலவை (‘றீமிக்ஸ், Rape music) இசையில் கொச்சைப்படுத்தப்படுவதா? =============================== மாவீரர்களின் ஈகங்களை மேலைத்தேய மக்களிடம் எடுத்துச் செல்லும் போர்வையில் ‘றீமிக்ஸ்’ இசையில் மாவீரர் கானங்களை மாற்றியமைப்பதற்கான முயற்சிகள் ஐரோப்பிய நாடுகள் சிலவற்றில் மேற்கொள்ளப்பட்டு வருகின்றன. தமிழீழ தேசிய விடுதலைப் போராட்டத்தை ‘அடுத்த கட்டத்திற்கு நகர்த்தும்’ மதிநுட்ப நகர்வு என்ற கோதாவில் இந்தத் தவறான முயற்சி இடம்பெறுகின்றது. நாகரீகமுடைய எந்தவொரு மேலைத்தேயத்தவரும் றீமிக்ஸ் இசையை ரசிப்பதில்லை. மாறாக மேற்குலகத் தலைநகரங்களின் வீதியோரங்களில் போதைப் பொருள் விற்பவர்களும், விடுதிகளில் மதுபோதையில் களியாட்டம் புரிபவர்களும், வீதிகளில் குழு மோதங்களில் ஈடுபடும் காடையர்களும் விரும்பிக் கேட்பதே இந்த ரீமிக்ஸ் இசை. மாவீரர்களின் ஈகங்களை மேலைத்தேய மக்களிடம் கொண்டு செல்வதில் எவருக்காவது உண்மையான அக்கறை இருந்தால் மாவீரர் கானங்களை ஆங்கிலம், பிரெஞ்சு, டொச், ஸ்பானியம் ஆகிய முதன்மை மேலைத்தேய மொழிகளில் மொழிபெயர்த்து, அந்தந்த நாடுகளில் உள்ள பாராம்பரிய இசை மொட்டில் வெளியிடலாம். அது நிச்சயம் சம்பந்தப்பட்ட மொழிகளையும், அந்தந்த மொழிகளின் பண்பாட்டு விழுமியங்களையும் பேணும் சாதாரண வெள்ளையின மக்களை சென்றடையும். அதுவே மாவீரர்களின் ஈகங்களை அவர்கள் புரிந்து கொள்வதற்கு வழிவகுக்கும். ஆனால் அதனை விடுத்து றீமிக்ஸ் இசையில் மாவீரர் கானங்களை மீளமைக்க முற்படுவது போதைப்பொருள் உட்கொண்டும், மது அருந்தியும் பண்பாட்டுச் சீர்கேடுகளில் ஈடுபடும் காடையர்களை எம் பக்கம் வசமாக்கும் செய்கையாகவே அமையும். இவ்வாறு குற்றச்செயல்களில் ஈடுபடும் காடையர்களில் எம்பக்கம் நாம் கவர்ந்திழுப்பது காலப் போக்கில் தமிழீழ தேசிய விடுதலைப் போராட்டத்திற்கு பெரும் அவதூறை ஏற்படுத்திக் கொடுக்கும் செய்கையாகவே அமையும். எனவே இதனைப் புரிந்து கொண்டு இவ்வாறான தவறான முன்னெடுப்புக்களுக்கு ஊக்கமளிக்காது அனைவரும் பொறுப்புணர்வுடன் நடந்து கொள்ள வேண்டும்.
Posted on: Sat, 23 Nov 2013 08:26:00 +0000
Trending Topics
Recently Viewed Topics
© 2015