15th Mizoram Watch hlawhtling takin hmang Aizawl 18th October 2014: Prism chuan Ni 17.10.2014 (Fri) zan dar 6:30-8:30 chhungin Prism Conference Hall-ah Mizoram Watch Vawi 15-na hlawhtling takin kan hmang. He hunah hian Mizoram sorkar kaihruaitu MPCC-in kum 2013 MLA Inthlana an Manifesto engchen nge an bawhzui tawh tih sawiho a ni a, sawiho langsarzualte: 1) Congress party mi induhsakna a nasa a, agriculture production a san phah chuang lo, sorkar hnathawk hlawh lak theih loh hi NLUP vang niin a lang, tia sawiselna chu ruling lamin UNO meuh beng thleng phak, NLUP vangin eng dept sum mah pawh a ni ngai lo, 1st phase 1st instalment-ah Ramhlun-ah phei chuan ZNP ho pek vek an ni, NLUP vangin kohhran thawhlawm a pung a, mi tam takin an thawhrah atangin lirthei an lei theih phah, tiin an sawi thung. 2) Phaiah eizawnna dapa thalai thawn chhuahte dinhmun a him tawk lo, sorkarin a ngaihsak tawk lo, tia sawiselna chu ruling lamin company rintlak nia sorkarin a ngaihte nen thawhho niin thalai tam tak thawn chhuah tawh an ni a, sorkar mawhphurh chin erawh a awm tiin an sawi. 3) Infiamnaah kan tihthat theihna kawng mila insawrbinga hmalak a tul, tia sawi chu ruling lamin stadium sakna tur sanction sorkarin a neih tawh thu an sawi. 4) Mizoram Education Reforms a hlawhchham a, kan ram mila zirna kan kalpui a tula zirlaibu ennawn a tul tia sawi chu ruling lamin Sainik School hmun tur lei tawh niin a theih chen chen Mizoram Education Reforms Commission rawtna tihhlawhtlin chhoh tum a ni, tiin an sawi. 5) MNF sorkar laiin State Referral Hospital kha sum indaihlohna avanga tihhlawhtlin hman a ni ta lo. MNF/Congress sorkar hmalakna ni loin central rawn din zawk a ni. Khum 150 atanga 400 dahbelh tur hi tihpuitlin ni lo se kan thatpui zawk ang, tia sawi chu ruling lamin MNF sorkar laia contract tenau atanga tan a nih avanga hlawhchham niin MNF-in khum 10-ah an tihhniam thu an sawi. 6) kawlphetha siam chhuah kawng leh clearance fel har lutuk vanga sorkar duhkhawp lohna chu ruling lamin Tuivai tender tawh niin Tuirial pawh chhunzawm a nih thu an sawi. 8) Congress sorkar chu manifesto aia thildang buaipui zawk nia puhna te; criminal man theih chin leh man theih loh chin sorkarin a nei nia puhna te; sorkarin hnam tlem zawkte hamthatna chan theihna tura hmalak a tum dan zawhna te, Aizawla Convention Centre lian tak din tura sorkar hmalak dan chin te; Aizawl leh hmun danga Cable Car (ropeway) siam tura sorkar hmalakna chin te; rualbanlote tana sorkar hmalak dan chin te; women & child development dept din tura sorkar thlen chin te leh zawhna dang tam tak hun chep vangin ruling lamin an duhtawk angin an sawifiah hman ta lo a ni. Mizoram Watch hi Moderator Dr Lalthakima, Prism Adviser-in a kaihruai a, MPCC atangin Zodintluanga Mins; T Sangkunga MLA; TT Zothansanga Parl Secy leh Media Cell-te an tel a. Oppn. atangin MNF – Lalruatkima MLA leh midang; MPC- Lalthansanga Ex MLA leh midang; ZNP- Lalmuanpuia Punte leh midang; BJP- Chalngura Jahau leh midang te an tel a, Prism hruaitute leh sawmbikte kan tel tha hle. Mizoram Watch programme hi cable TV-ah playback tum a ni. Sd/- (C. LALTANPUIA) Secretary i/c information
Posted on: Sat, 18 Oct 2014 12:14:40 +0000