7 ploeg encarga cu e mantencion di nos beachnan a ricibi for di TPEF vestnan di seguridad Den cuadro di e mantencion di e Producto Aruba, Tourism Product Enhancement Funds (TPEF) a entrega dialuna mainta vestnan uniforma na e siete ploeg encarga cu e mantencion di e diferente proyectonan. Pa mantene e calidad di Producto Aruba riba un standard halto, Minister di Turismo, Otmar Oduber, a introduci e ploegnan pa yuda mantene cierto areanan apunta limpi. Diariamente e ploegnan aki ta encarga pa mantene areanan strategico di nos beachnan publico limpi. E ploegnan ta duna atencion na nos beachnan tanto den e area di high rise como tambe pariba di brug, e.o. Baby Beach, Santo Largo y Mangel Halto. A conta cu e presencia di 21 trahador orguyoso, cu a haya nan vestnan di seguridad uniforma, entrega dor di Presidente di TPEF Sr. Jan van Nes, riba Plaza Turismo na Linear Park. Miembronan di TPEF a bin cu e iniciativa pa haci esaki, pa trece distincion y seguridad pa e ploegnan balente di TPEF cu ta encarga cu e mantencion pa cu limpieza di nos beachnan publico cu ta wordo hopi bishita pa tanto local y turistanan. Si bishita e areanan unda cu e ploegnan ta labora, por ripara cu tin un cambio drastico di limpi cu esakinan ta. Ta asina cu e ploegnan ta no solamente haci limpi pero tambe nan ta mantene e areanan nechi. Minister Oduber ta haya sumamente importante pa comunidad cuminsa traha hunto pa cu e manencion di nos beachnan. Pa e mes motibo aki a logra aloca na diferente areanan strategico bari di sushi cu ta yuda concientisa nos hendenan pa nan tambe manetene nos Aruba limpi no solamente na nos mes pero pa nos bishitantenan tambe.
Posted on: Tue, 16 Jul 2013 00:41:19 +0000
Trending Topics
Recently Viewed Topics
© 2015