AL-QAIDA HOTUPA -OSAMA BIN LADEN THAT ANI DAN KIMCHANG (No Easy Day: The First Hand Account of the Mission That Killed Osama bin Laden by Mark Owen with Kevin Maurer, Publisher Penguin-Random House) November 4: Abbottabad, Pakistan hmuna al Qaida hotupa Osama bin Laden inbikruk chu US Special Commando Navy SEAL Team Six Unit han May 2, 2011 zanah a rukin Afghanistan a inthawka radar man thei lo Helicopters le inthawkin an that a, chu an that dan chet vel chu US-ah US President Barack Obama le a Cabinet pawimawhan video hmangin an lo thlir thap a ni. Osama bin Laden kaihlum ani thu chun kar lovah khawvel a deng suok nghal a; American mipuiin bin Laden that a ni ti an hriet charin New York khawpuiah chun a zan a zanah mipui hung pungkhawmin hnena Hla do an insam a ni taka, mipui zau thau inhawk vel chun ieng dang an hril nawh, USA! USA! USA!... tiin an khek dur dur ringawt el a nih kha! Osama bin Laden chu kum 3 sung a sulhnung sui thei lovin, Afghanistan a um laiin Tora Bora tlangram lung puk inthuk le sei takah bomb inhlum amani tiin, puong dar ani laiin Pakistan ram sung Military Hqrs a inthawka 5kms vel a hlaah building lien tak le uluk taka veng, US$ maktaduoi 3 man chuong manah a nuhmei le a nauhai thenkhat leh a mi ring zuolhai le an lo intawm ruka; US ruoltha Pakistan chun a rukin alo hum ruk tlat ni ding a ni. A lu man (Wanted) chu US$ maktaduoi 25 niin, The Wild West hun lai- Billy the Kid, Sudden etc hun lai chu ni sien, bounty hunters ro rum tak takin mani lu zawr veh ngei anti! President George W.Bush Jr., khan a hun laiin Osama bin Laden chu Dead or Alive in ka dit a ni tiin, Texas Cowboy ang ela a tawngkam setak chu Media-han an sawisel luoi luoi a, sienkhawm, a thiem awm- Texas Governor hlui a ni tlat! Chuongchun, Bin Laden thattuhai laia mi Matthew Bissonette chun Drama ni lovin, thudik American mipui hrilna tiin, an that tawma training intak tak le turu buru, tak le awlai lo an lak dan le an that hnunga Bin Laden thlan hriet thak lo dinga Tuifinriet inthuk lai taka a ruong an phum/pei dan hai, a chengna In sunga an va that dan kimchang hai le US President Obaman America an kir hnunga alo lawm danhai le a thutiem-White House ah ngei an Navy SEAL Team Six puolin bufak ah fiel la tum thu le, kum 1 hnungah khawm Politician dang ang bawka tawngkam thlum, thutiem sukhlawtling lo le Navy SEAL hai enkawl that an pawimawzie le an hotuhai chunga a lungawi rak naw thuhai chu NO EASY DAY ti lekhabu-in alo ziek suok ta a. Hi lekhabu hi nikum March thla khan Secondhand Bookstore-ah US$10 an zawr chu inchawkna ding ka nei naw leiin chawhma ka tiem pha nghe nghe a ni. Hi No Easy Day a ziek hin Matthew Bissonette chun a pen-name a dingin MARK OWEN ti a hmang dai a, sienkhawm, a hnungah tum ani an hrietsuok ta. Al Qaida pawl lem chun Aug.25,2012-ah Owen chu an hotupa Osama bin Laden kaphlumtu ani thu an website ah an thawn dar nghal chuoi chuoi a ni. US Dept of Defense (DOD) khawmin Owen hin a lekhabu suksuok tawmin Pentagon a rawn nawa, America venghimna thuruk (material breach of non-disclosure agreement) puong dartuah ngaiin, a chungah action-hremna pek an nuom pha a ni. Tulai hnaia US Navy SEAL chungchang a ziekna No Hero ti khawm fimkhur thu hlaah Pentagon chun uluk takin a suok hmain thlirlawkna-review an nei pek a ni. No Easy Day bu khawm kha Nov.12,2012 ah release hun an sawn tir a, sienkhawm, iengkim sut pei tah a ni si. US Defense Dept chun Owen-a thuziek leiin Special Operation Servicemen hai himna fe meka tawk buoia, an himna a derthawng (sensitive & endanger) an ti pui lei a ni. No Easy Day ti bu hi mihan tiem chakin an inchu zo va, copies 300,000-570,000 zawr a ni. New York Times Best Seller le Online Internet- Amazon le Barnes & Nobles ah Best Seller a ni. Hieng a lekhabu ziek 2 hai hi U.S Naval Special Warfare Development Group (DEVGRU) han an sinthaw dan le Osama bin Laden an that dan a ni tak. Co-author Kevin Maurer chun Mark Owen in hiengang lekhabu a ziek a inthawk chauin, ei nunghak tlangval huoisen hne thei lohan America le khawvel an venghim dan ka lo hriet ve a ni ati hiel. Tuta a lekhabu pahnina NO HERO: The Evolution of Navy SEAL ti hi uluk takin US Defense Dept chun sui (investigate)in , ram venghimna dingin a pawi ding am? ti an ngaituo a, release ani hma a inthawk mihai naver tak lekhabu a tling. No Easy Day lekhabua hin an sinthaw-mission sawtnawte sunga a hlawtlingna le khawvel a nghawr dan a ni taka, Pentagon chun a ngai pawimaw hle a ni. Owen chun Interview indik naw ka pek ngai naw. Thil tum mumal tak nei,uluk tak ka ni a. Ka nun a dinga kum 2 sung inkhirtak le harsa tak (toughest) tum a ni ati. Pentagon Press Secy Rear Adm John Kirby chun Thil sui chieng mek a ni a, sienkhawm, a lekhabu ziek hmasa No Easy Day le anzawm naw ati. No Hero ti bu hi US Dense Dept-in an review mek thu hi, The Foreign Policy magazine hin a hril bawk.
Posted on: Tue, 04 Nov 2014 12:54:50 +0000
Trending Topics
Recently Viewed Topics
© 2015