ARTICLE RETHEI LEH HAUSA ~ duatte.apa.rickya, LK Chaw pawh ei tawh tih a awm loh hi maw? Ninawm a chang em lo’ng chu! Mahni tum tawkte hi a awm ve a nih ngai a nih chuan, a tum tawk a hre lo a nih hi min lo ti a nih pawhin ka dem lo’ng che. Ziah a ul ve tlat mai si. Thihna hi awm ta lo se, nun hian awmzia a nei ange’m? Thinrimna hi awm ta lo se, hlimna hian hlut eng nge a neih ang? Huatna hi awm ta lo se, hmangaihna hian eng nge awmzia a neih ang? Sual hi awm ta lo se, dan hi zawm kher a ngai ange’m? Retheihna hi awm ta lo se, hausakna hian enge nawmna a neih chuan ang? Chhia hi awm ta lo se, ha hian ropui bikna a nei ange’m? Hmelchhia hian hmelha a siam a ni lawm ni? Khawvel mihring lo piang chhuakte hi kan pianna hmun leh hun a hrang heuh a. Kan seilenna chhungkua pawh a inang lo nasa hlawm si a. Chhungkua ha taka lo piang chhuakte vanneihna a va sang bik em! Pian hlim aangin ei sen loh leh hak sen loh neiin an lo hang lian a. A hen ve thung chu vanduaiin an lo piang tak meuh meuh bawk a. A nu hnute a hnek bak chu ei tur ha leh henawmte thawmhnaw hluiin inbelin an lo hang lian bawk a. A hente phei chu natna benvawn leh tihdam theih loh nei chungin an lo piang bawk a. An vanduai zual bik a sin. Hetiang hian mi vannei lo piang chhuak chu an lo seilen hian an thawhchhuah ni miah loh hmanrua leh bungrua an neih theih avang khan tihhat bik engnge an neih? Kan neih ve theih loh avang khan tihsual engnge kan neih? Khawvel eng hmu heuh heuh kan va in ang lo em! Solomona ang deuhin mit it zawng hlah lo khawp a, hausa sa apiang an awm laiin, a hen erawh chu a neih chhun pawh an laksak ta emaw tih mai tura vanduai taka lo piang an awm bawk a. Tu mawh nge ni ta ang le? Rethei taka lo piang hian engnge tihsual a neih? Hausa taka lo piang hian tihhat bik engnge a neih? He nun inang lo tak hian inawm an neih chu ‘nunna’ hi a ni. Rethei pawhin nunna a nei a, mi hausa pawhin a nei tam chuang hauh lo. Hmangaihtu nun pawh misual nunna aiin a fei chuang lo. Hmelha nunna nge tlo hmelchhe nunna? Rethei nunna hi a retheih avangin tih tawiin a awm em ni? Hausa nunna chu a hausak avangin tih seiin a awm bik em ni? Ka rethei emaw ka hausa emaw nunna nei ka ni. Pathian min pek a ni. Ka retheih avangin nunna ka nei tlem chuang lo. Ka hausak avangin nunna chu pek belh ka ni chuang lo. Ka piang vanduai a ni thei, ka piang vannei pawh a ni thei amaherawh chu nun ka neih hi ka ta, Pathian min pek a ni. Nunna neitu, enkawltu ka nih mek laiin engtin nge ka nun chu ka hman a, ka enkawl? Min petu Pathian pawhin min en reng a, min zawt reng bawk. Engtin nge ka nun chu ka enkawl ang? Rethei taka piang ka nih avangin ka nun chu ka tirethei reng dawn em ni? Hausa taka piang ka nih avangin ka nun chu a hausa reng em? Ka enkawl dan in a zir ang chu. Ka enkawl thiam chuan hlimna, thlamuanna leh nawmna turin a tawp ka khar dawn a, ka enkawl thiam loh chuan thinrimna, hrehawmna leh rethei takin ka nun chu ka ti tawp dawn tihna a ni. Hun ka la nei a, nun nei ka a ni, siamhatna hun ka la nei, khawngaihna avang liau liauin ka nunna zuahin a la awm reng. Ka vanneihna ni a inher mek laiin chu hun ha chu ka bosan ang tih ka va hlau em! Ka nuna hausakna leh hlimna lo thleng tur hi keima mawh a lo ni reng mai. Rethei taka ka piang hi ka tihsual a ni lo a, rethei taka ka thih erawh chuan ka tihsual a ni. Ka ti sual tih ka hriat chhuah meuh hi chuan a lo tlai hman tawh hin.
Posted on: Tue, 03 Sep 2013 19:19:23 +0000
Trending Topics
Recently Viewed Topics
© 2015