ARTICLE Vol.8. Issue No.17,July 22-28,2013 KHA DOCTORPA MAWL KHA..!!! - Andrew pa Kar hmasak lai khan ka office-a vai pakhat- doctor chu nilo- a hung lenga, a tawng dana chu damdawi tieng chu hre ve hle nin an lang. Guwahati tienga officer lien tak tak hai khawm a lo enkawl hlak a, recommend-na lekha an ziek pek hai chu a hma tiemin a min entir peia. Kan department hotulien thenkhat lekha dam a min entir a, tu ringzo naw ding ruol ani nawh. Thaw khawm chu a lo thaw thei ning a ti, chanchinbua a thlalak le a chanchin inziekna hai dam a min entir a, Chief Minister dang danghai a enkawl lai thlalakhai khawm a kawl rawn hle. Recommend-na lekha lem chu polythene bag a khai khawp nei mei a tih. Damdawi tieng pangah chu ama an ringzona (confidence) mawl kha a thiemna nekin ngaisang um ka tih. Kei, damnawna thua Pathien le Doctor cho ringtupa ta ding chun mithiem le mivar inpawlpui e tilo chun umsawt bek dingin ka ditsak naw hle. Ama khawm ringzo um deuin a hei in sanpuom vel a chu ‘tleirawlhai meu khawm chau an ta’ ti ang elin a hrata chu hung tlahnuoiin mi maksan zai a rel ta a, kei khawma inhmu nawk ding beisei lem lovin kan thla liem ve ta ringawt. A chunga ei hril, ei doctorpa fe hnung chun nasatakin ka lungril a sukbuoia. Office dang danga a la fe dim, tu tu am a lan hmupui ding, kan nuhai office a teh a fe dim, an van hmu dim? tihai chun ka ngaituona asuk buoi hle. Ei nupuihai hma a lem chu hei inhril sien tamtak chu an ‘ halelui ‘ ngei khawm ka ring. ‘A hriet taluo, ei natna khawm ei hril ngai lovin a hung hril zut zut el’ an ti hai pawla mi kha a nih. Eini mi tamtak hi chu, ei ngaituona (Psychology) hin a min damnawtir a, ei ngaituona bawkin a min dam tir nin ka hmu tlat. Chun Doctor thiem; a hran lieua ko anni naw chun kiltin kiltanga invak hi hmu ding an vang hle. Londona khawm umsien, a pan theihai chun an zu pan nal nal tho. Chuleiin sukdamtheina nei intia invak invak vel hai hi chu ka lo ngaisang ngai bek naw leia a chunga thuhai khi ka ziek el anih. Thaw ta laklaw, la hei ziek pei ei tih. Tulai khawvela lem chu a chunga ei doctorpa ang hi ei tam ta khawp el, hriet khawm ei inhriet seng ta naw khawm a hawi. A thar an hunga, a tharin an hrila, a tharin ei dampui nawk hlak. Inchuk si lova natna le damdawi hre tak tak khawm ei tam tah. Pathien chun thilthaw theina hi mihriemhai an kawltir hlak ti chu Biblea chiengtakin ei hmu. Amiruokchu tu tuhai him a tak taka kawltu ti ruok hin chu mi tamtak ngaituona a sukbuoi met tah nin an lang. Awleh, mi thil kawl, an hrietna le varna or Pathien le an kar lo sopui ringawt chu mipangngai sin khawm ani naw ie, ziek sei ta dal ei tih. Isu Krista in khawvel a fang lai khan sukdam rawngbawlna nasatakin a nei a, a thaw dan le a style ruok chu a dangdai thei khawp el. A khawvel khawmin a phur ta lei hrim hrim am ani ding tulaia ei thaw dan thenkhathai le chu an ang nawna met met a tam. A chang lem chu Doctor hai hi an um kher a tul ta’m ani ti ding khawpin hrietna le thilthawtheina ei nei khawm a hawi tah. Isu’n mitdel a suk dam khan pilpawk a hmang ngei a, ‘ tu suksuol khawm an nawa Pathien ropuina an lang theina ding a nih ’ tiin a hrila, a dam luo bawk. Ama hminga Pa kuoma lungril le titakzeta ei hni or ei hni pek hi a tha tawk el an nawm a nih, A min chuktir dan tak khawm a nih. Chun, Isun damnawhai a sukdam lai khan ramtin ramtang a hril ngai kher naw a, a ngai pawimawtak chu Pathien ropuina damnawhai chunga inlang kha a nih. Pathienin thilmak an kawltir hrim hrim chu an um . Amiruokchu, a zo azaia, thil hre em em, ei ngaituona, ei lungrilhai chen khawm hre em em a inhrilhai hin chu lungril an suk thip met hlak ka tih. Thenkhat chun an hriet luot leiin, damna thu el khelah, sungkuo inrem nawna ding chen chen thil tul lo hril le Pathien le ei kar chen min ringhlatirtu khawm an um nuol bawk. A chang hin chu ei ringna hi a chau/depde taluot leiin tuok inkhawm hi ei hau el am an ta dam ka tih hlak. Iengkhawm nisien, ei Pathien ropuina le thilthawtheina hi ieng thil khawma hliekhu naw sien ti hi ringtuhai ei thang khawna ding ni rawp raw seh.
Posted on: Fri, 02 Aug 2013 17:31:24 +0000
Trending Topics
Recently Viewed Topics
© 2015