ASTAGHFIRULLAH… BETAWI-KU (Cerita lain soal Betawi & HUT Jakarta) Oleh : M. Mathar Kamal Temen saye nyang seniman dan pengarang mengeluh, kenape anak-anak Betawi tetep masi begitu aje.Lebi suka santai, ngocol, becande, asal goblek dan ogah serius. Mereka kebanyakan gak perduli sejare peradaban dan kebudayaan Betawi bener ape sale. Mereka baca seadenye aje sual Betawi. Mereka akan nyinyir dan sinis kalu ade nyang mao ngangkat sual-sual kebenaran sejare peradaban dan kebudayaan Betawi. Mereka akan tertawa kalo ade nyang anggap bia angkat harkat martabat Betawi. Saye diem ngedengerin. Bener kate temen saye nyang lagi kulie di luar negeri… jangan serius banget ngurusin Betawi..biar aje ape adenye, hatte bakalan ilang pan gak banyak nyang perduliin.. Gak ape-ape kalo enti Betawi cuman jadi MONUMEN dan jadi ingetan sewaktu-waktu. Abang jangan abisin enersi mikirin Betawi..anggep aje seperti perjuangan orang2 waktu kasus Kedung Ombo dan Lumpur Lapindo…toh akhirnye kalah juga. Saye cuman bisa manggut-manggut. Temen laen nyang jadi pengusahe bilang, ni ari, asal tau aje PRAGMATISME dan EGO INDIVIDUALISME ude jadi baju manusia, dari suku dan agame ape aje… jadi abang pikirin deh gimane caranye jadi Betawi kek kagak kek tapi sukses. Sukses sosial dan ekonomi jadi takeran dimata orang-orang masa kini.Kalo abang parlente turun dari mobil mewah, hatte omongan abang boong dan berkualitas comberan, pasti didengerin orang-orang.Sekarang ?Abang biar hebat, biar bener, hatte gak bisa dibantah orang, hatte nyata belain sejarah peradaban Betawi dan menjaga kebudayaan Betawi… tapi tetep aje abang diukur… ditaker lantaran kemasan fisik abang gak level mereka.Itulah orang-orang Betawi sekarang. Saye senyum dan diem aje gak komentar. Temen saye nyang pegawe negeri bilang ke saye, abang jangan pusingin nih Betawi. Biar diapain juga tetep begini aje. Apelagi pemerentah mane ade perdulinye, hatte ude ade peraturan perundang-undangan nye, tetep aje gak bakalan diperatiin bener-bener. Biar kate ade pejabat Betawi, gak bakalan die mikirin Betawi, paling-paling seadenye aje. Paling-paling nti kalu ade Pemilu dan Pilkada baru pade bekoar sual Betawi supaye orang Betawi mao ngedukungnye. Saye cuman garuk-garuk kpala. Temen saye nyang aktivis laen lagi. Die bilang, cape bang jadi tarzan..idealisme cuman jadi bacaan. Betawi pan rada gampangan dijadiin obyek nyari duit, kenape abang masi terus begitu ??Ketinggalan. Orang-orang, bahkan Betawi-nye, jadiin Betawi sebage simbol nyang bisa dikomersialin..bisa diproyekin.. ngasilin duit dan orang-orang Betawinye gak perduli kok. Saye juga diem ngedengerin, doa saye mudah-mudahan temen saye ini sukses beneran ampe mati. Iblis pun berbisik pada saye “lu mao ngapain? Jaman ude berobe, lu gak bakal punye temen kalu masi sok belain Betawi secare bener… orang-orang Betawi ampir semuanye ude gak perduli… udeh lu brenti aje ngulik cerite Betawi nyang lu pelajarin dan lu mau sampein ame orang-orang Betawi; gak bakal diperduliin deh. Lu, kalo perlu ikut kayak orang-orang laen dan entinye lu pan bisa kaya, terkenal dan dihormatin orang”. Saye mendelik sendiri dan berteriak “ASTAGHFIRULLLAH… NAUDZUBILLAH”. Jadi tetep aje banyak nyang ngerasa bener dan tetep peringatin kemenangan Fatahillah yang ngebakar 3.000 rume orang Betawi di Mandirancan taon 1527, nyang anggep penyerbuannye 22 Juni 1527,sebage tanda kelahiran Kote Jakarta… Padahal itu saat kedukaan besar orang Betawi…ASTAGHFIRULLAH…nyeng dalem bahase palestin “NAKBA” atawa ari duka cita. Oooh..Betawi..Betawi-ku (Sejarah yg mane yg ente percaye? Ane percaye sama bang Mathar & Dato Ridwan Saidi. Karena sejarah, seringkali ditulis sesuai selera penguasa pada saat itu! Jadi sejarah HUT Jakarta, tentu ditulis oleh seleranya Fatahillah. Walaupun sebenarnya ironi!)
Posted on: Thu, 20 Jun 2013 10:39:42 +0000
Recently Viewed Topics
© 2015