Algun hende tin algo pa añadi? “Minister ta haya pension cu 45 aña, ta unda, ta ni un caminda na mundo” Publication: Friday, 9 August 2013. Categoria: General Benky Fowler na introduccion di Marisol Lopez-Tromp como candidato di AVP ORANJESTAD (AAN): Presentacion di Marisol Lopez-Tromp riba lista di partido AVP a bay hunto cu un introduccion pa un persona hopi peculiar den politica aki na Aruba. Aunke e persona mes no a un politico, su trabounan tabata e prome piedranan cu a contribui na bahamento di entrada di politiconan na Aruba y tambe e subimento di nan edad di pension. E asina yama, “versoberingswet” tabata un ley cu Gabinete Mike Eman a presenta na aña 2010. Partido MEP a mustra di tabata contra di e ley, pero dos parlamentario, Sra. Marisol Lopez-Tromp y Sra. Mervin Wyatt-Ras a kibra cu e liña di partido MEP y a vota pro e ley. Den su presentacion di candidato di partido AVP, Marisol Lopez-Tromp, Sr. Benky Fowler a duna un splicacion di unda e ley aki a cuminsa. Bou di su liderazgo, e rapport “Rechtspositie Statenleden en Ministers” a wordo traha. E tabata un inventarisacion di e situacion hurudico di parlamentario y ministernan na Aruba. E raport, hopi biaha referi como “Raport Fowler”, banda di inventarisa tambe a mustra riba e exaheracionnan cu tabata tin den e posicion huridico di e politiconan cu cargo na Aruba. E raport a trece dilanti recomendacionnan y e posibel maneranan pa por implementa esakinan. Tempo cu a raport a keda cla, hopi a gaba e raport y hopi tambe a bisa cu nan lo introducie. Pero mas largo e proceso a tuma, sin algun duda e gana a muri pa introducie. Sr. Fowler a bisa di ta corda cu den un remetido na Hulandes e la lesa un biaha cu “rapport Fowler ligt gelijmd in een onderste la.” Asina e ley a keda drumi tambe pa mas di 11 aña largo, te ora cu e la haya un yamada di Prome Minister Mike Eman mas o menos 3 aña pasa. Pa su sorpresa, Sr. Fowler ta splica, Prome Minister Eman a bisa cu nan ta bay ehecute y pone mas riba dje. Recomendacion di Raport Fowler tabata pa hisa edad di pension di parlamentario y ministernan pa 55 aña, pero Gabinete Mike Eman a propone 60 aña, mescos cu tur trahador na Aruba. E problema cu a surgi ta cu tabata tin mester di 2/3 parti di parlamento pa e cambionan aki por a wordo haci. “Na cierto momento tabata tin dos dama parlamentario, hopi balente, cu determinacion y curashi a disidi cu nan si ta apoye,” Sr. Fowler a bisa, refiriendo na Sra. Lopez-Tromp y Wyatt-Ras. “Pasobra no por ta asina cu tin cierto privilegionan pa minister y parlamentarionan y ta pidi pueblo pa hala mara,” Sr. Fowler a enfatisa. “Minister ta haya pension cu 45 aña… ta unda… ta niun caminda na mundo.” “Mi ta bisa determinacion cu curashi, pasobra nan si ta bay sostene e versoberingswet aki,” un expresion di Sr. Fowler cu a bay acompaña cu un aplauso spontaneo di e publico presente. Versoberingswet a wordo aproba den parlamento cu sosten di fraccion di AVP y parlamentarionan Lopez-Tromp y Wyatt-Ras, y e ultimonan aki a keda expulsa for di fraccion di MEP pa a kibra cu e otro parlamentarionan di nan partido. Segun, Sr. Fowler esaki tabata algo inevitabel si bo tin e bienestar di pueblo bo dilanti, pasobra e previlegionan exahera asina no ta digno di representantenan di pueblo.
Posted on: Fri, 09 Aug 2013 09:47:33 +0000
Trending Topics
Recently Viewed Topics
© 2015