Awu Phendula Nkosi....... 11 Fire, fire ngithi fire!!! Wayesejuluka uMaKhumalo ngalesosikhathi oThemba bemthola ngasemkulwini. Yini mama kwenzenjani? Wabuza uBheki, ngapha elalamela isibane ekhanyisa. Uthi nxa ekhanyisa wabona unkosikazi wakhe emile epasitshini ebheke uMaKhumalo lo owayekhwaza kangaka. Kahle kahle wayeme mpo nje uNomazulu wayemangaliswe yikubona uninazala engena endlini phakathi kobusuku. Yena wayengumuntu owayevuke esiya endlini encane. Ngesikhathi ephuma ebuyela esiyalala yikho lapha azwa umnyango wemkulwini uvuleka. Wethuka kakhulu wehluleka lokunyikinyeka ngapha igqondo yakhe imtshela ukuthi akame abone ukuthi kungena bani. Konke nje lokhu kwenzakala ngokuphazima kweso engacabanganga lokucabanga ukuthi kungabe kusenzakalani. Wehluleka lokukhanyisa isibane kodwa lokhu. Yingakho umkakhe uthe ekhanyisa isibane bambona emile ethe mpo evule lamehlo emangele. Kwakusobala nje ukuthi wayetshelwe ngamathe. UBheki yena kwakungamangalisi ukuthi abone unkosikazi wakhe lapho ngoba wayemzwile evuka esiya ngaphandle. Mama khuluma yini, kwenzakalani? Washo egcizelela umbuzo kaBheki uThemba. Wu wu.... woooo ah. Ngu...ngu...nguwe Mandlo malokazana wami. Uze ungethuse kangaka shuwa. Huuu ah, yeyi. Ucishe wangibulalisa ngenhliziyo qotho. Washo umaKhumalo eziba umbuzo wabantwabakhe. Iphika lehla wangani uyahlaliseka nje. Watshintsha waba ngumuntu olomusa ongakaze ubonakale. Lapho wayesevala phela ukuthi uzobuzwa ukuthi wayevelaphi ebusuku. Wabona ukuthi kuzobalula ukuthi athi uvela thandaza nxa elomusa ongaka abantwabakhe bamkholwe. Yimi mama, waphendula uNomazulu elokhe emangele. Bengiphuma endlini encane khonapho. Ngimangaliswa nguwe ongenayo ngalesiskhathi, besengisithi kumbe ngobhinya. Kungethusile kakhulu ukuvuleka komnyango ngaswela lokuthi ngenzeni. Ah angikusoli MaNdlo yazi washo eqhubeka ngomusa wakhe wamanga umaKhumalo ziningi izinto ezenzakala ebusuku, lapha ngeke wazi. Lawe kodwa sungaze uhambe unyenya emnyameni njengomthakathi he he he. Ayi kunzima shuwa. Libokhanyisa izibane nxa livuka ebusku, phela thina amakholwa nxa sibona okunje sihle sibize ophezulu ukuthi azosilwela. Yikho ungibona ngikhuza usathane kanje. Washo umaKhumalo eqhubeka cala celeni kanti inhliziyo yayisihleli. UBheki loThemba bona basebephenduke babangababukeli kukho konke lokhu. UThemba wasesithi kunina, Pho ungena endlini ngobusuku Khuya ubuyaphi? Thina sikucine usiyalala nje Wabuza engathi umangele uThemba. Ye? Hayi ungazihluphi ngalokho wena mntanami, umoya kaNkulunkulu nxa ukudonsa ukuthi uthandaze kumele uwulandele. Ende futhi mina ngithandaza ngcono nxa ngiphandle, ngakho bengiyethandaza bantwabami. Ye.. washo eqhubeka ewahulula umaKhumalo ngapha esengathi uyashumayela. Uthe eqeda lapho wabe eyisusa ingoma yendumiso Uyingcwele baba uyingcweeee...lee Uyingcwele baba uyngcweee....lee Uyincwele baba uyingcweee....leee! Wayisho uKhuya ngelizwi elivevezelayo ngapha sezisehla inyembezi. Phinde wayeliphiwe lelizwi lokucula. Wayethi nxa ingoma ibanjwe nguye uzwe mpela isikuhlaba umxhwele. Lawe uhle ungene emoyeni wakhona. Wenza njalo nje udonsa abantwabakhe ngamunye ngamunye uthi asithandazeni bantwabami, asithandazeni. Umoya uthi sithandaze. Zinengi izehlakalo ezehlakalela abantu ngalesisikhathi sobusuku asithandazeni. Wenza njalo nje sekungathi ngumuntu osefikelwe ngamadlabuzane. Useyeqayeqa ngapha ewususa umthandazo. Jehovah, Jireh, Jehovah Nisi, Jehova Thixo wamabandla umoya wami uyakudumisa. Umoya wami uyakubonga Thixo. UnguNkulunkulu omangalisayo. Nanku usihlanganisile singunmdeni..... Wawusho umthandazo waze walila umaKhuya. UBheki yena wayesevule ilihlo elilodwa esefuna lowo mthandazo uphele. Wawutsho umaKhumalo waze wazwakala esesithi amen. Qede lapha wathi, hayi selingayazilalela bantwabami, ye. Umoya wami usulentokozo ngoba sesike sakhuleka umm, hayi. Muhle uNkulunkulu. Nangu equkula iBhayibhili lakhe ehwitha esiya ngasekamelweni lakhe. Abantwana labo balandela bengena kwawabo amakamelo. Kwalalwa. Lasa elikaMlimu wonke umuntu ezilalele la kwaKhumalo. Phela isehlakalo sebusuku sabakhathaza balala badonsa bedlulisa isikhathi abandise ukuvuka ngaso. UThemba yena akuzange kumhluphe ngoba wayecele okulikhefu esibhedlela, kodwa wayezobizwa nxa engadingakala. Phinde kwabalula kuye ngoba kwakuyinSonto. EsimaKhumalo sona asizange sikhathazeke savuka ekuseni salungiselela ukuya enkonzweni, eWisili. Sageza sa ayina isembatho saso. Sithe sesiqedile sayazenzela ukudla sabamba indlela. Isikhathi esinengi sasingasoze sivuke sikwenze lokho. Sasizahluphana lomalukazana waso ukuthi asenzele konke esikufunayo kodwa namuhla sangafuni ukuthi batshayisane ngoba kukhona okunye kuye okwakumthelela amahloni ngesehlakalo esenzakale ngobusuku obudlule. Yingakho wathi eseqedile akwenzayo wangavusi abantwabakhe ukuthi bamhambise enkonzweni, wabona kungcono ukuthi ayobamba umtshova. Bamuzwa esebashayela ucingo sewaphuma esangweni kudala. Eyakhe wayeyingenela ngasedolobheni yikho nje waqukula ibhayibhili lakhe eqonda khona. Wafika khonale wajabula ebona abangane bakhe abadala. Wayelomunye umngane wakhe ababezwana kakhulu okwakuthiwa ngu MaMoyo. Mhlalokho wahlangana laye ensontweni ngoba babevele befonelene ukuthi bazohlangana khona. Bathe bebonana beqelana bajabulelana kakhulu. Unjani kodwa Namankazana? NgumaKhumalo ephoxa umngane wakhe ngoba ethi wazizalela amantombazana wodwa. Ngiyaphila Khuya he he he. Namuhla ngifuna ukuyiqeda into yakho yokuhlala ungibiza ngonamankazana. Woza ngikutshengise icinathunjana lami. Washo edonsa umngane wakhe uMaMoyo. Wafika lapha abesiyakhona waqhweba esinye isiqwabalanda sejaha esasime leyinye intombazana eyayimhlophe wathi, Lo nguThabani, yilo icinathunjana lami leli ongakaze ulibone. Nguye uNcube wekhaya lo. Wahlekelela uThabani waqhuba isandla sakhe exhawula umaKhumalo wathi, Salibonani mama, saze sajabula ukuhlangana lani. Umama uhlala njalo nje ekhuluma ngawe. Kuhle ukuthi sihlangene ngalolusuku. Usuzohle ubone lomalukazana wakho. Nangu, kuthiwa nguMpendulo Maphosa. Lawe usungambiza Mapho. Washo ehlekelela uThabani ebika unkosikazi wakhe kumaKhumalo.
Posted on: Thu, 31 Jul 2014 10:49:11 +0000
Trending Topics
Recently Viewed Topics
© 2015