Ayera mi a manda e artikulo aki pa tur media, gobiernu i 400+ E-mail friends: Ku Bista Riba Futuro TA BASTA AWOR!! Ruman, Ban uni nos mes komo un pueblo noble i positivo i tuma akshon kontra kriminalidat ku a bai fo’i man; kontra violensia ku a pasa tur límite - tantu den robo i maltrato di hende grandi komo den tráfiko; kontra vulgaridat i violensia verbal di nos lidernan, manera e bululú bergonsoso resientemente den pleno bista di turista. Ora prensa internashonal duna atenshon na e desaroyonan akí, YAMA AYÓ NA NOS TURISMO KU LO KREA UN DESASTER EKONÓMIKO DI MARKA MAYÓ. Apelashon. Mi ta apelá na abo, lektor; na abo, mayor; abo, komersiante; abo, sindikalista; abo, parlamentario i minister; abo, miembro di kuerpo polisial i miembro di ministerio públiko; abo, miembro di medionan di komunikashon, pa NOS TUR HUNTU hasi nos máksimo esfuerso pa salba nos pais for di e ruina kaminda e ta bayendo. Nos no por papia mas di un situashon normal. Awor akí nos komunidat ta den un estado di emergensia. Anto esaki ta eksihí un maneho di emergensia. Reglanan i leinan ku normalmente ta na vigor i ku ta antikuá, urgentemente mester keda adaptá i asta suspendé pa tanten, pa por aktua sin tin man mará den e tempu di krisis akí. Prioridat. TUR kos ta prioridat: - Kaba ku kriminalidat ku man duru, hasiendo uso di tur nos rekursonan i ku yudansa di Hulanda pa desarmá henter poblashon. Arma di kandela ta nos enemigu mortal! Apliká “gun court”, manera na Jamaica: konvikshon outomátiko di 10 aña! Mester subi kastigu di prizòn i aplika ‘terapia di trabou pisá’, pa hasi estadia den ‘piskalat’ realmente un kastigu. - Aktivá ekonomia, dor di aselerá desishonnan ku ta warda riba ehekushon (konstrukshon di hòspital i sentro pa servisio públiko, drecha infrastrukura, aselerá pèrmitnan pa invershonista, etc.) - Prevení kriminalidat dor di duna FORMASHON OBLIGATORIO na tur esnan sin ningun fishi - Kuminsá ku renobashon di enseñansa - Aselerá kasonan hudisial ku ta den ‘bulpèn’, tambe esnan di korupshon. - Sanea tur departamentu gubernamental pa servisio públiko move yangadó. - Inisiá renobashon/mantenshon di bario imediatamente huntu ku sosten masal na famianan desampará i desfunshonal. Krea ‘Brigada di Boluntario’ pa trabounan den bario - Kuminsá un OLA di INFORMASHON transparente i positivo ku koperashon di varios eksperto den e arte di komunikashon - Finansas: mesora adaptá lei di seguro básiko i AOV - Pone impuesto riba casino i 9% OB riba e sumanan ku partisipante ta hunga - Adaptá ‘inkomsten belasting’ den un ‘gliding scale’ te na e máksimo i NO redusí winstbelasting - Simplifiká OB, dor di implementá esaki na e momento di importashon òf entrega na e bendedó - Pidi Hulanda un fiansa di emergensia pa e situashon krítiko di pais. Ehekushon. NOS TUR HUNTU: PUEBLO & GOBIÈRNU Nombra un grupo di siudadano di diferente spesialismo i eksperensha. Laga nan forma teamnan di eksperto, ku ta deliberá i bini ku sugerenshanan di emergensia. Diskutí esaki ku e minister konserní i su konseheronan. Presentá e sugerenshanan i posibel desishon na atenshon di pueblo. Tur kos mester tuma lugá den e límite di tempu ku a keda kumbiní i riba un base demokrátiko. MESTER pidi pueblo su aprobashon via un sorto di enkuesta popular: yena un formulario den korant i entregá esaki ku bo nòmber, firma i ID na varios lokashon riba e isla. No por sigui warda riba funshonamentu ‘normal’ di gobièrnu. Pasobra e situashon NO TA NORMAL. Esaki ta nifiká tambe ku NO POR TIN POLITIKERÍA. Nos no tin tempu ni pasenshi pa e wega polítiko. BAN TRAHA HUNTU PA SALBA NOS PAIS. Ku kordial saludo Joseph ‘Jopi’ Hart
Posted on: Fri, 12 Jul 2013 19:10:37 +0000
Trending Topics
Recently Viewed Topics
© 2015