BONEIRU Ayera nochi pa 9:31, a surgi un korto sirkuito riba un mast di alto tenshon na altura di e verkaveling Belnem Sùit. A konsekuensia di e korto sirkuito aki e liña di alto tenshon aki a wòrdu deskonektá outomátikamente for di e ret di distribushon. Dor di e instabilidat okashoná pa e korto sirkuito, e bario nan di Tera Kòrá, Amboina, Antriol i Nort Saliña a wòrdu deskonektá pa medio di e protekshon outomátiko. Na momentu ku e personal na warda pa WEB konhuntamente ku e personal na warda di ContourGlobal tabata hasiendo e trabounan nesesario pa por a remediá e situashon, alrededor di 9:35 anochi (4 minüt despues) a surgi un instabilidat den e planta di produkshon na ContourGlobal, loke a okashoná un blackout total. Inmediatamente ContourGlobal a kuminsá ku e trámitenan pa start e planta di diesel bek y pone esaki den operashon. Pa alrededor di 10:44 anochi WEB i ContourGlobal tabata asina leu ku por a kuminsá rekonektá e bario nan riba e ret di distribushon. Mester remarka ku durante e proseso pa konektá e bario nan bek riba e ret di distribushon, e personal di WEB a konfrontá diferente problemanan den e ret ku a surgi a konsekuensia di e korto sirkuito, loke a pone ku e proseso pa rekonektá tur bario a tuma e tempu nesesario. Pa masoménos 3:25 di mardugá tabata asina leu ku tur bario tabatin koriente atrobe. Tantu e personal di WEB komo esun di ContourGlobal ta hasiendo e investigashonnan nesesario pa determiná e kousa eksakto di e instabilidat den e sistema di produkshon di koriente ku e meta pa prevení un situashon similar den futuro. WEB NV ta pidi su diskulpa pa kualkier inkonbeniensia ku e blackout por a kousa y ta yama danki pa e komprenshon.
Posted on: Tue, 16 Jul 2013 02:25:36 +0000
Trending Topics
Recently Viewed Topics
© 2015