Bikol News Naga, Manila nag-andam sa 1st death anniv ni JMR August 1, 2013 by bicolmail in Bikol News with 0 Comments An local na gobierno kan Ciudad nin Naga nag-aandam kan mga programa sa premirong aniversario sa pagkagadan kan dipuntong good governance icon DILG Secretary Jesse M. Robredo sa Agosto 18, alagad igwa man ibang grupo sa Manila nagtalaan JMR Art Exhibit na dadalawon ni Presidente Aquino asin Congresista Leni Robredo. Si Allen Reondanga, public information Officer kan City Hall nagsabi na an premirong pagcomemorar kan death anniversary magiging simple sana huli ta nakalineada na an aatendir na mga programa ni Mrs. Robredo, vioda ni JMR bako lang sa Ciudad nin Naga envez mapasiring pa sa Masbate asin sa Manila. Duwang aldaw kuta an programa alagad si Congresista Robredo nagsabi na cancelaron na muna si actividades sa Agosto 17 huli ta mapasiring siya sa Masbate kaibahan an oficiales local kan City Hall sa pangenot ni Alcalde John Bongat sa lugar kan pigbagsakan kan eroplano na piglunadan kan dipuntong DILG Secretary. Kabali sa actividades sa Agosto 18 iyo an pamisa, tsinelas walk kan oficiales local, JMR Movement asin iba pang grupo maghali sa Plaza Quezon pasiring sa Eternal Garden na kun haen digdi pigbulong asin wreath laying. Sa Manila iyo an JMR Art Exhibit na piglalaoman maatendir si Presidente Aquino asin Congresista Robredo pigtalaan sa Agosto 22 abot sa Septiembre 5, 2013. An pagbukas kan engranding ocacion alas 3:00 nin hapon sa Marriott Hotel, Ciudad nin Pasay. Si Noel de Luna, project chairman asin organizer kan art exhibit enot kutang pigtalaan kan Agosto 15 alagad pig-uktaba huli ta pano na an mga nakatalaan na actividades ni Mrs. Robredo. Napagaraman maging an Malacañan nagtugot sa bagong petsa sa pagbukas kan programa. Dakul na an nagconfirmar na maatendir sa pagbukas kan programa na kinababalihan kan miembros kan gabinete kan Malacañan, justices kan Corte Suprema, foreign ambassadors, AFP, PNP, sabi pa ni de Luna. Yaon man an obras kan pinakafamusong Bikolano Artists arog na Pancho Piano, Gus Albor, Raul Alcomendas, Jonamar Salvosa, Romel Perez asin iba pang grupo. An eroplano na piglulunadan ni Robredo nagbagsak sa kadagatan kan Masbate kan Agosto 18, 2012. bicolmail/2012/?p=10171
Posted on: Sat, 03 Aug 2013 21:58:57 +0000
Trending Topics
Recently Viewed Topics
© 2015