China-South Asia Expo, Ai-Kameli Ho Kafe Hamorin Pavilion Timor Tais, ai-kameli ho kafe Timor sai ona hanesan identidade ka icon Timor Leste nian iha merkadu internasional hori otas ba otas. Atu haforsa no promove liu tan identidade ho ai-horik Timor nian ne’e iha mundu internasional, MCIA halo esforsu tomak hodi aprezenta produtu orijin Timor nian ne’e iha China-South Asia Expo (Feira China-Asia Sul). Feira internasional ne’ebe hala’o durante loron tolu, Kinta-Sabadu (6-8/6), iha Kunming, Privinsia Yunan, China, pavilion Timor nian hetan animu diak tebes husi komprador internasional sira, tanba produtu Timor nian hirak ne’e husi materia organiku (hand make). Komparador sira ne’ebe identiku no gosta vizita Timor nia pavilion maioria husi China, Malaysia, ho Indonesia. Alem de tais, ai-kameli (natural art sandle wood), iha expo ne’e mos Timor hafurak ho produtu sira seluk, hanesan sabaun natural, masin fatuk natural, gaharu buaya, ho gula merah. Ministeriu Comerçio, Industia no Ambiente (MCIA) ne’ebe reprezenta Timor Leste iha China-Asia South Expo ne’e, lidera dereitamente husi Secretariu Estadu Comerçio, Ricardo Cardoso Nheu, ho Secretariu Estadu Industria no Cooperativa, Nino Pereira. Feira internasional ne’e hala’o iha Kunming, Provinsia Yunan ne’e partisipa mos husi nasaun 48, inklui Timor Leste. Komunikadu imprensa ne’ebe JNDiario simu Segunda (10/6), sublinha katak, delegasaun MCIA nian iha Feira China ne’e akompanha mos husi Embaixadora Timor Leste nian ba China, Vicky Chong. Secretariu Estadu Ricardo Cardoso Nheu ho Secretariu Estadu Nino Pereira, mensiona katak, partisipasaun Timor Leste nian iha Feira ne’e importante teb-tebes atu oinsa hametin relasaun bilateral nasaun rua nian no oinsa fo oportunidade diak ba Timor Leste hodi hatudu produtu nasional. “Liu husi eventu Feira ida ne’e fo pensamentu foun ba komprador sira katak, produtu Timor Leste interesante tebes tanba produtu hirak ne’e produs husi materia organiku. Nune fo ona estratejia foun ba Timor Leste hodi sai espesailista iha produtu natural (nature products/organic product),” informa Ricardo Nheu ho Nino Pereira iha komunikadu ne’e. Lori governu no MCIA nia naran, Secretariu Estadu Ricardo Nheu ho Secretariu Estadu Nino Pereira, espera katak, eventu internasional sira hanesan ne’e ba oin, presiza partisipasaun mos husi seitor privadu nasional. Timor Leste nia pavilion ne’ebe hafurak mos Feira ne’e hetan animu husi komprador no vizitantes sira husi China, Malaysia, Indonesia no komprador husi rai seluk-seluk tan. Durante estadia iha China, Secretariu Estadu Ricardo Cardoso Nheu ho Secretariu Estadu Nino Pereira no delegasaun Timor Leste nian vizita mos industria Packaging. Alein ne’e, delegasaun Timor Leste nian mos koloka tempu hodi vizita merkadu tradisional Yunan, China. Iha Sabadu (8/6), delegasaun MCIA halo vizita ba fronteira (perbatasan) China ho Miamar hodi hare besik liu konaba atividade komersiu (boder market). Jornal Nacional Diario
Posted on: Tue, 11 Jun 2013 01:33:02 +0000
Recently Viewed Topics
© 2015