Despedida di morto den happy hour ta algo hopi straño den un comunidad Cristian catolico Den un combersacion cu vicario Episcopal Pastor Rey Nares a puntre kico Misa catolico ta pensa riba e despedida di un morto den forma di happy hour, cu a tuma lugar den funeraria recientemente. Pastor Rey a splica cu ora el a tende esaki el a bira hopi sorprendi pasobra den religion catolico ora un famia ta dispidi di un ser keri cu ta muri ta duna e curpa su respet y honor mereci, y normalmente e curpa ta den un caha. Den Iglesia catolico tin e Fe cu despues di morto tin resureccion y esey ta e prueba duna pa Jesus y tur esnan cu ta kere den Dios por haya un resureccion glorioso y e preparacion pa deramento di un curpa mester carga e respet necesario. E pastor a lesa diferente parti di e buki cu ta e guia pa entiero den religion catolico y cu ta bisa cu cada bez cu un comunidad Cristian ta dera un di su miembronan, e ta celebra Morto y Resureccion di Cristo y cu cada persona cu batiza ta asocia cu Cristo su morto y resureccion for di dia cu a batiza. El a splica cu morto di un ruman den Cristianismo ta expresa su Fe den bida eterno. Sinembargo mester tene cuenta cu tin cierto personanan cu otro pensamento tocante morto, principionan y filosofia di bida distinto y cu mester respeta. Morto y entiero di un ser kerido semper ta trece cune dianan di pena grandi y hopi preparativo y ta importante pa e comunidad Cristian yuda e famia den su necesidad tanto material como spiritual. Pastor Rey a mustra cu pesey ta importante pa e famia bin hunto pa reza e dianan aki, y cu esaki ta un obra di gran balor y cu entiero ta algo cu ta concerni henter e comunidad Cristian y no e famia so. El a bisa cu den Misa mes un happy hour pa dera un difunto nunca lo sosode, den e caso di algun dia pasa e tabata den e funeraria y hopi biaha nan ta complace e famianan. Pero esaki ta motibo si pa refleha kico e nifica pasobra nos tur a ser crea na Dios su imagen y semehanza, y cada hende mester respeta e curpa di otro. Den television pastor Rey a mira ritonan cu baile rond di un morto cu nan a pone sinta of drumi bao di un mesa, pero den culturanan pagano, kiermen no Cristian.
Posted on: Fri, 05 Jul 2013 02:33:25 +0000
Trending Topics
© 2015