FIFA U-17 World Cup 2017 India ah FJ Sports: Nikum December thla khan India in FIFA U-17 World Cup 2017 a nei ding chu mikhuol ding thu sukthluk le puong a lo ni tah. Hieng anga Football inkhelna hun ropui le lien India in vawikhat a mikhuol na ding a nih. India rama hin Cricket le Hockey hai pahniin hmun an chang lien em em a, sienkhawm tuta hnung hun sawtnawte a chu Football khawm inkhelna pawimaw tak el India rama khawm a hung ni vat tah ring a um a chu ding chun FIFA in a theitawp suoin hma a lak mek hmu le hriet theiin a hung um tan ta zing. FIFA President Sepp Blatter chun India chun thilthaw thei takel ram ropui inlusu a nih tiin a hril a, India sawrkar pui chu Football a dingin hmun le hmang le thuomhnaw pawimaw hai ngaituo nasa dingin a hril. Hmun le hmang le hmangruo that naw leia India hi Football rama hnufuol chau a nih a, football inkhelna tienga inthang tak hung ni dingin a nuom a nih. Jawaharlal Nehru stadium, New Delhi; Salt Lake stadium, Kolkata le Jawaharlal Nehru stadium, Chennai a mi hai chau hi an nih India rama International Football inkhel theina ding stadium um sun chu. Hieng a ni lei hin India chu FIFA ranking ah 156-na chau a ni phak hi a mak naw hle a nih. Hi FIFA U-17 Word Cup a inkhel la thei dinga list hmasaa sie hai chu Kolkata, Pune, Delhi, Bangalore, Goa, Kochi, Chennai le Guwahati hai an nih. Hieng pariet list siema um hai laia paruk haiin hi hunser ropui hi an mihkuol ding a nih tiin Inaki Alvarez, FIFA Deputy Director of Competitions chun a hril. Hi inkhel la theitu ding hai laia India mawrtu chu FIFA President Sepp Blatter a nih. Ama hi Football tienga India sukhmasawn hi a thil tum ve pakhat a nih. Hi hun hi India mihai ta dinga Football inhnikna sukzuoltu dinga tha em em a nih tiin a hril. FIFA Secretary General Jerome Valcke chun kum 2012 khan India lo hung sirin India rama hin Football hi No.1 sports ni thei sien a nuom thu a lo inzawt duon ta sa a ni bawk. Kan thil tum tak chu India rama Domestic Football hai sukchangkang a International Level chen kei kaia mihaiin English Premier League le La Liga chau ni lova Indian Domestic League hai khawm an hung inhnik theina ding a nih tiin a hril. Indian Football hi suk hmasawn kan nuom tak zet, India hi Footbal market tha tak ding a nih a mi billion 1.2 in Cricket chau an inhnel hi mak ka tih tiin a hril a. Hi hi lei tak hin a nih U-17 FIFA WC hi India rama um dinga kan dit le kan nuom bek bek nasan tiin a hril. Tuhin FIFA in 10-year project with India from 2012-2022 a nei mek a nih. FIFA thil tum tak chu Kum 2022 Qatar FIFA WC a India inkhel tir hman a nih. Hi U-17 hin Indian Football a hung tuoinam ding a nih tiin AIFF President Patel chun a hril ve bawk. India in FIFA U-17 World Cup a mikhuol ding hi Indian Football ah revival in tlungtir tu a ni ngei ei beisei. Tiem zawm pei raw@ - foxjournal.net/index.php/sports/223-fifa-u-17-world-cup-2017-india-ah
Posted on: Thu, 07 Aug 2014 12:24:46 +0000
Trending Topics
Recently Viewed Topics
© 2015