Fakatauange ke mou mau ha aho Tusite ke tau vekeveke ke potalanoa mo Sisu mo kii nofo fuoloa hifo mo ia. Sisu Emeni. Tusite, ‘Okatopa ‘aho 15. Lau Folofola: Saame 19: 7-13, 7 Ko e lao ʻa Sihova´ ʻoku haohaoa, ʻoku fakafoki ai ʻa e laumālie´; Ko e fakamoʻoni ʻa Sihova´ ʻoku pau, ʻoku fakapoto ai siʻi taʻe fie vale´. 8 Ko e ngaahi enginaki ʻa Sihova´ ʻoku totonu, ʻoku fakatupu loto fiefia: Ko e tuʻutuʻuni ʻa Sihova´ ʻoku tafesinoʻivai, ʻoku fakamaama ai ʻa e mata´. 9 Ko e ngeia ʻo Sihova ʻoku maʻa, ʻoku tuʻumaʻu ʻo taʻengata; Ko e ngaahi fakamaau ʻa Sihova´ ko e foʻi moʻoni; ko e koto totonu ʻataʻatā 10 Meʻa mahuʻinga ange ia ʻi he koula, ʻio ha koula lelei mo lahi; Meʻa melie ange ʻi he honi, ʻio ʻa e honi ʻoku toʻi noa mai. 11 Kaeʻumaʻā ʻoku hinoiʻi ai hoʻo tamaioʻeiki´, Pea ʻi hono tauhi´ ʻoku iku ai ki ha fuʻu totongi. 12 Ko e meʻa ki haʻate ngaahi hē — ko hai te ne faʻa ʻilo? Ke ke lau au ʻoku ou ʻatā ʻi he ngaahi meʻa lilo´. 13 Taʻofi foki hoʻo tamaioʻeiki mei´ he ngaahi angahala ʻoku fai pauʻu´: Ke ʻoua naʻa nau puleʻi au: Te u toki haohaoa ai, ʻO ʻataʻatā mei´ he angahala lahi. Veesi Fakalaulauloto: Saame 19: 7, “Ko e lao ʻa Sihova´ ʻoku haohaoa, ʻoku fakafoki ai ʻa e laumālie´; Ko e fakamoʻoni ʻa Sihova´ ʻoku pau, ʻoku fakapoto ai siʻi taʻe fie vale´.” Kaveinga: Ko e folofola ‘a Sihova´ ko e tūhulu ki heʻetau laka´ mo e maama ki hotau hala´. Poupou: Na’a tau lave ‘aneafi ki ha tohi ‘a ia ne ‘ikai ke hiki ka ‘oku tohi pē ‘i natula. Pea ‘oku tau ako mo ‘ilo pē mei ai ‘a e lahi mo e naunau’ia ‘o e ‘Otua´ ‘a ia na’a´ ne fakatupu ‘a e langi´ mo e māmani´; ‘io, mo e tangata foki. Ko hotau konga folofola ki he ‘aho ni´, ‘oku talanoa ai ‘a Tevita ia ki he tohi ‘e taha ‘a ia ko e folofola ia ‘a e ‘Otua´; ‘a ia ne ‘iloa ia ko e LAO´ (TORAH) ‘i he Fuakava Motu’a´. Pea ‘oku tau fakatokanga’i ‘oku ‘ikai ngāue’aki ‘a e lea “‘Otua´” ‘i hotau folofola ki he ‘aho ni´, ka ‘oku ngāue’aki ia ‘a e “Sihova´” – ko e ‘Eiki. Ko e tohi ‘uluaki´ (Natula), ‘oku´ ne tataki kitautolu ke tau ‘ilo mo tui ‘oku ‘i ai ‘a e ‘Otua ‘a ia na’a´ ne fakatupu´; He ko e “ngaahi langi´ ʻoku nau tala ʻa e naunauʻia ʻo e ʻOtua´; Pea ʻoku fakahā ʻe he ʻatā ʻa e ngāue ʻa hono nima´.” (v.1) Ka ‘i he’etau tau ako mo lau ‘a e folofola (Lao) ‘a e ‘Otua´, pea ‘oku tau tui mo faitu’utu’uni ke tau muimui ki hotau ‘Eiki´ (Sihova) mo talangofua ke fai ‘a hono finangalo´. ‘Io, he ko e folofola ‘a Sihova´ ko e tūhulu ki heʻetau laka´ mo e maama ki hotau hala´. Vakai ki he filifili lea ‘a Tevita ke fakamatala’i ‘a e naunau’ia mo e ivi ‘oku ‘i he folofola´, pea ‘oku´ ne ngāue‘aki ‘a e ngaahi lea ke fakamatala’i ‘a e folofola ‘a e ‘Otua (Sihova): ko e lao, fakamoʻoni, enginaki, tuʻutuʻuni, ngeia, pe fakamaau. Pea kapau te tau fetongi kātoa ‘a e ngaahi lea ko eni´ ‘aki ‘a e fo’i lea “folofola´” pea tau lau ‘aki; pea te tau vakai ai ki he ngaahi mata’ikoloa ‘oku ‘i he folofola´; ‘o hangē ko eni, “Ko e folofola ʻa Sihova´ ʻoku haohaoa, ʻoku fakafoki ai ʻa e laumālie´; Ko e folofola ʻa Sihova´ ʻoku pau, ʻoku fakapoto ai siʻi taʻe fie vale´. Ko e ngaahi folofola ʻa Sihova´ ʻoku totonu, ʻoku fakatupu loto fiefia: Ko e folofola ʻa Sihova´ ʻoku tafesinoʻivai, ʻoku fakamaama ai ʻa e mata´. Ko e folofola ʻa Sihova ʻoku maʻa, ʻoku tuʻumaʻu ʻo taʻengata; Ko e ngaahi folofola ʻa Sihova´ ko e foʻi moʻoni; ko e koto totonu ʻataʻatā.” (vv.7-9) Pea ka tau ka nōfo’i hifo ke lau faka’aho ‘a e folofola´ pea ‘e hoko ‘a e ngaahi me’a kuo lave ki ai ‘a hotau Sāme´ ki he’etau mo’ui: ‘e fakafoki hotau laumālie mei´ he tele’a ‘o e mate´; te ne fakapōto’i ‘a ‘etau ngaahi fakakaukau´, ngāue´, lea´, mo ‘etau to’onga mo’ui´; te tau mo’ui fiefia ‘i he’etau faitotonu´ mo e taimi ‘o e faingata’a´; te ne fakamaama ‘a hotau mata´ mo hotau loto´ ke tau ‘ilo ‘a e ngaahi me’a ke tau fai´ mo fou ai´; pea ‘e hoko ‘etau mo’ui´ ko e mo’ui ‘oku nofoma’u mo mamahi’i ‘a e ngaahi me’a ‘o e pule’anga ‘o e ‘Otua´; pea te tau ‘ilo ai ko Sīsuu´ ko ia ia ‘a e Hala´, mo e Mo’oni´, mo e Mo’ui´. Pea ka pehē, te tau toki fakamo’oni ki he talaloto ‘a Tevita´, ko e folofola ko e “ Meʻa mahuʻinga ange ia ʻi he koula, ʻio ha koula lelei mo lahi; Meʻa melie ange ʻi he honi, ʻio ʻa e honi ʻoku toʻi noa mai.” (v.10) Pea ko hai ia ‘e toe fie mavahe mei lau faka’aho ‘a e folofola´? He ko e ma’u’anga ia ‘o e ifo ‘o e nofo ki he ‘Eiki´. Pea tau toki kai ‘utungaki ai ‘i hono ngaahi halanga tāpuaki´, “ko e tūhulu ki heʻetau laka´ mo e maama ki hotau hala´.” Lotu Hūfia: Ke tau kole ki he ‘Otua´ ke ne ‘alo’ofa mai ke tokoni’i kitautolu ke tau manako mo vekeveke ‘i hono lau faka’aho mo mo’ui’aki ‘a e folofola´
Posted on: Tue, 15 Oct 2013 08:59:27 +0000
Trending Topics
Recently Viewed Topics
© 2015