Falam Baptist Church, Falam Thuanthu June 24, 2013 | Filed under: Cahram | Posted by: vcth 1. Biakinn neih hlan Falam Christian dinhmun: Jubilee le kumza puai pawl kan Lairam ah a tam thlang. Zo in a thok, ziangtikah an thok, ziangti vekin an thok tivek pawl tla a cekci ih theih an si ih cabu sungih ngan an si. Thuthimnak ah, Chin Christian Centenary cu Pa Thuam Hang, Pa Pau Suan le an nupi veve ih thokmi a si ih Khawsak khua ah 1904 ih thokmi a si. Falam Christian Centenary tla 1906 kum Lumbang khua ah Pa Thang Tsin ih thokmi a si. Falam Baptist Church ih Jubilee cu cubangtuk a si lo. Zo in a thok ti a um lo. Minung hmin bun ding a um lo. Ziangah tile Falam cu Laimi khua a rak si lo. Culai san uktu mirang pawl ih tohmi, dinmi khua a si sawn. 1885 kum ah ramnor mirang pawl in Kawlram saklam an lak suak tikah a thangso lo bik pakhat a simi Laitlang cu olte ih neh dingah an ruat. Asinain an ruahvek siloin har zetin an neh. 1892 ah Falam an din. Hmaisa ah atu Tashon khawlu ah an rak toh ih a hmin khal Fahlam ti ih kawh a rak si. Malte a rei in atu ih Falam ahhin an thawn. Laitlang uktu tonak hmunpi a si vekin Zipeng (DC) a rak um ih Mirang ralbawi a rak si. Ralkap tampi an rak um ih atu ih Falam khawsung ih innhlun tampi tla anmai umnak a rak si. Mirang, Kala, Tuluk an tam ih Kawlram sung mi cu malte lai an um. Laimi cu zung hnatuan a niammi ralkap, kuli tivek an rak si ih malte lawng an um. Ramdang lam hlahpi ihsin a rami Pathian thuthang tha simtu Siangbawi pawl tla cu Hakha le Tedim ah an um ih Falam cu an vehvai phah. Laimi taktak umnak khua a si lo ruangah um cih dingah an ruat lemlo a si hmang. Uktu Mirang thawn bangrep ih theih sual ding an duhlo ruang khalah a si thei. A umsun zumtu pawl cu inn ah khawmnak an nei theu. Carek hlun thlanglam bik Hram Tu nu (Mang Par nu = Tum Pen pi) inn ah an rak khawm theu ti in hminsinmi a um. Cubangtuk inn ih an khawmnak ahcun Siangbawi pawl asilole tuanvo pekmi Pastor dang pawl in an tlawng phah ih an kilkhawi phah. Kawhhran siloin Khristian pawlkom (Fellowship) an rak si. Pastor kan theihmi hnihkhat cu a pekte ah Karen Evengelist Saya Sein Htun Falam ah a rak um dah. Rei a um lo. Cun Innsein Kawl Bible tlawng ah 1920 hrang ih a rak ongmi Hniarlawn mi Saya Nawl Tling (1924 = 1925) in kumkhat hrawng a rak zoh ti’n a um.Inn ih khawm cu a remcang thei lo caan a um. Minung an tam deuhdeuh tikah an tlemlo caan khal a um. 1930 hrang ihsin tlawnginn in khawm ding an dil ih cutawkah an khawm. Tlawng pawl uktu (DIS) cu U Aung Dwe a si ih Falam tlawng sayakyi cu U Sein Pe a rak si. An pahnih in Khristian an rak si ih a zuam zetmi an si fawn. Bawhlungsit khal an thiam zet veve ti a si.Saya Aung Dwe cu Laitlang a thlennak kilah Pathian thu le hla in mi a hruai thei zettu a si ih Siangbawi tluk rori in Pathian hna a tuan. Falam tong, Hakha tong, Tedim tong a thiam theh. 2. Hmaisabik Biakinn saknak: (1933) Kan sim zo vekin Falam cu Mirang kumpi (Cozah) khawpi a rak si ih khawsung um pawl tla cu Mirang, Kala, Tuluk le hmun dangdang ihsin a rami Cozah hnatuan le tlawngta pawl tla an si. Atu ih dawrhlun kan timi lam khi mipi um theinak a si ih adang hmuahhmuah cu ralkap le cozah hnatuan pawl umnak a si. Tlawnginn ih khawm ringring ding cu a remcang lemlo. Khristian an tam vivo tikah a tlem khal an tlem lo. Cuhrangah Lairam ih bawibik a simi Zipeng Col. Burne (Baan bawipa) hnenah Biakinn hmun an dil. Anih khalin lung thote in dawbichawng kap atu ih lamzung innte pahnih umnak khi a rak pek. 1932 thok ihsin a hmun an cek ciamco. Khukhaam deuh a si bangtukin harzetin an cek suak thei. Zung hnatuan pawl cun an thlakhat hlawh ciar an suah. Biakinn saknak hrang khalah nasa zetin an zuam. Thing inn mawizet an sak suak. Pi 44 le pi 22 a si ih a hmai ah hulhliap a um. Dithla for a velkim in dithla vel a um. Cuih pawl hmuahhmuah cu si-rang an hnih theh. Cun Biakinn phar a sunglam khal siirang an hnih theh. Pulpit lam ah tohkham le cabuai phundang zet le cun a kap deuh ah piano tla a um. Cuih pawl cu Col. Burne ih pekmi (hlumi) an si ti-ah an ti. Bible cakhen an tarmi cu Matt. 11:28 “Thilrit a phurmi le…” timi a si. Khaam a si vekin Biakinn saklam leilung cu a min ringring ih zarhte ni tinten kan huat ringring, tlawngta Khristian pawl kan pok ringring ti-ah FBC Golden Jubilee Magazine ah a ngan. 1932 kum ah Falam ah phunli (Mirang ca) a rak zir ih Biakinn ah a khawm ringringmi U Huat Er (DIS) in FBC Golden Jubilee Magazine sungah hiti’n a ngan, “Kawhhran hruaitu ka cinmi pawl cu Saya Aung Dwe, Saya Sein Pe (HM), U Pau Cin (ralbawi), U Aung Zan (lam saya), U Kham Za Go (Ralkap zung cazi), U Phu Tsi (Lamzung cazi) tla an si”. Cule, “tlawngta mino pawl thawn Khristian (100) lai kan rak um” a ti. (Cahmai 2). Hih hmaisabik Biakinn saknak hrangah a zaten Rs 34000 an cem. Culai san le tulai san paisa man neih daan ih tuat tikah a let zahnih ti’n ruat sehla tuilai san ahcun Ks. 6,800,000 a si ding. 1900 hrawng ihsin Biakinn an sak theh tiang cozah hnatuan thlacamtu le a khawmtu rak um theu hman hai sehla hminsintlak Khristian hramthawhnak a um lo ruangah Biakinn sak theh kum 1933 cu a hram thawknak in kan retnak a si. 3. A voi hnihnak Biakinn: (1958) 1933 kum ih sakmi Biakinn cu a fate tuk ih a hmun khal a fiak. Kauh ternak ding hmun a um lo. Cuhrangah Biakinn hmunthar dil dingah tuanvo neitu Pastor le upa pawl in an rel. An dil dingmi hmunlawng ti ih an hmuhmi cu atu Methodist Biakinn hmun khi a si. Lamzung in tlakrawh innpi pahnih sak dingih an rak tumtahmi a si ruangah zokhal ih pek theih a si lo ti tlukin an rak ruat. Harsatnak a phunphun a um ih pek theih a si lo ding timi thuhla an theih tikah upa pawl in Lai vuanzi Pu Za Hre Lian hnenah dilnak ca an thun lut. Pu Za Hre Lian in pe dingin a lung a kim ruangah zokhal ih el theih a si nawn lo. Lamzung upa pawl in, “cuti asile, inn sak ding kan tummi sak theinak dingah nan Biakinn hmun zamrang in in kian uh,” an ti. Cuhrangah an khawmnak Biakinn kha Ks. 300 in an zuar ih a leitu in an bal. Biakinn thar sak hrih a si fawn lo ih khawmnak nei lo in an um thlang.Cutikah leknak zung (atu ih MCH kiangkap) ah khin a langten Biakbuk an sak ih an khawm. A langten ti a si nan kumhnih zikte a rei.Falam Khrihfabu cu nasazetin an zuam ih paisa khal an bur nasa. Thing pawl cu Hakha zin Tlangzar khawlu lai tupi ah an at ter. Hualthing thazet an at ih an at theh in Kawhhran upa pawl hohatnakin mawtaw lampi an an pu ciamco. An put theh hnu ah Pu Thawng Uk mawtawka in an phur. Alak ih an phurhsak caan khal a um. Biakinn an sak tikah a banthum sang pipi din ding a har zet ruangah Thuklai zungthiam pawl (lettama) in an rak din ih cuihsin Falam pawl in an peh ti a si. Biakinn cu 64′ x 36′ a si ih a hnu ah a hmailam ah 32′ an peh (a hulhliap telin). A thlanglam sirtluan ah 14′ an peh lala. Hi Biakinn sak tawlrel laifang le sak theh ih thu pahnih a ummi cu: 1. An Pastor, Rev. Thanghngilhlova in a thihsan. 2. Presbyterian Kawhhran din a si ih FBC Kawhhran upa tamsawn an feh (Biakinn saklai ih a zuam zetmi pawl an si). Hih Biakinn saknak ih a cemmi zate cu Ks. 24,000 a si ih, tulai paisa man thawn tuat tikah 100 thawn zai sehla Ks. 2,400,000 a cem ti a si ding. Ks. 24,000 an cemmi sungah Ks. 10,000 cu ABM bomnak an ngah ih, Ks. 14,000 cu anmahte burkhawmmi a si. Biakinn an sak theh tikah Siangbawi Rev. R. G. Johnson in 1958 August 3 ni ah apnak a tuah ih Biakinn an lut. Pastor in rinlo ih a thihsan hai ruangah ZBC GS, Rev. Mang Khaw Pau, cu theh in ZTC Principal, Rev. D. Van Bik tla in hlawhlang in Pastor an tuan. 4. A voithumnak Biakinn: (1983) A voihnihnak Biakinn cu voihnih tiang kauhter a sinan a fate deuh thotho. A khawmtu an karhzet ruangah an tlem cuang lo. Cuhrangah an Pastor Rev. S. Hre Kio ho le upa pawl ho in Biakinn thar sak ding tumtahnak le thlacamnak an nei. 1969 ihsin Biakinn thar saknak ding paisa khuan an thok. Asinain a hmun an ngah thei lo ruanah pehzom in paisa khuan vivo ding cu mipi lung a tho lo.Pastor le upa pawl in Falam khawsung ih uktu upa pawl cu zanriah an ei pi ih Biakinn hmun tha le thar an tulzia an sim. An ruahpi rero na in ruat ngaihnak an thei ve lo. 1974 kum ihsin Lairam Council bawi cu Lt. Col. Kap Cung Nung a si. Voikhat Falam a tlawn ah Falam upa pawl hnenah Baptist le RCM hi Biakinn tha sak thei ding an si. A hmun hawlsak uh ti-ah forhfialnak a nei ta. Cutikah Falam peng Party le Council upa pawl in nasa zetin an ruatpi rero. Asinain sawhkhih theimi an nei lo. Falam khua a laifang ah Biakinn sak theinak hmunlawng a harzet. Atu ih Biakinn hmun khi hlan ah Mirang san ih Officers’ Social Club inn a rak si ih bawi upa pawl noncelnak le Billiards le pingpong lehnak innpi a rak si. 1968 May 31 zan ih palik kaat a kang hnu ah palik pawlin an luah ih tangka reknak le kaat zung ah an hmang. Kilbo a si ruangah a remcang zetin an thei.Cuih hmun cu Social Club a um nawnlo hnu ah zo ih inn khal a si lo ti kha Pastor le upa pawl ih an theih tikah a thuanthu cu thate in zingzoi ih Kawlca ih ngan dingah FBC sungtuan a simi Pu No Zam tuanvo an pek. Pu No Zam in a zingzoi ih cahmai (14) a suahpi. Cuih ca thawn dilnak ca cu Falam Peng Council zungpi ah an thunlut sal. 19.8.1976 Myone Council EC meeting ahcun Lairam bawipi U Kap Cung Nung khal a rak tel ih Falam Baptist ih dilmi Biakinn hmun cu pe dingin an relcat. Hi thu ah harsatnak mal tete a um ruangah Chin State Council in nemhngetnak 6.2.1978 ah an tuah. Hih tum ah FBC ai-awh in Hakha ih a fehtu cu Rev. D. Sa Tin Thio, Pu No Zam le Pu Bik Chum tla an si. A hmun cu ngahzo si hman sehla innpi lawngter ih athar sak ding tulmi a si tikah 9.6.1978 ah ZBC GS, Rev. Hrang Tin Khum hohatnak in Hakha ah Rev. J. Tial Dum, Pu Pek Thang, Pu Ral Sai Lo le Pu No Zam tla an feh. Pu Kam Lian Buai ih inn ah an riak ih rawl a rak dar hai. Naza zetin a rak bawmtu tla cu Pu Kam Lian Buai, Pu Gei Khui Shing le Pu Van Lian tla an si.12.6.1978 ah Social Club innhlunpi cu bal a si ih a hmun cu thaten tuah rem a si. Leilung vor hlonnak a har zetih niam deuh ko rawn ter ding khal mi thenkhat in an duh nan an tuah thei nawn lo.January 14, 1979 ni ah Pastor rak tuandahtu Falam Bible lettu a tuan laitu Rev. Dr. S. Hre Kio (atu ih Falam Siangbawi) in a kilphum lung retin thlacam apnak a nei. 1980 kum in tlakrawh cu vankau ah mipi pawl ih zuamnak in tuan a si ih a rawhtu hnenah tlakrawh pakhat ah pia (7) an pek. Mawtawka le minung in an phur. Mipi in alak ih an phur hmaisa. Biakinn pungsan pawl cu Falam lamzung pawl ih cazi (Draftsman) Pu Tlang Iap in a tuahsak theu. Lam vuanthok U Ngo Nang ih lethmat (hminkhen) thawn bomnak phunphun dilnak ca a cem theh ringring. An sak dingmi taktak cu 120′ x 60′ + veranda a si ih a lai ah thuam umlo ding a si. Cuih inn ruangpi cu Hakha ih lam mangki Pu Lal Bik hnenah suaisak dingin zaangfah an dil. Pu Lal Biak in a vangkauhlam 60′ a si ruangah tuah theinak thu ka nei lo. Asinan Yangon ih a thiam zetmi Dr. Saw Kulh (Architecture Ph. D) ka lo simsak ding a ti. Cuticun Dr. Saw Kulh cu ZBC GS, Rev. C. Hrang Tin Khum le FBC Pastor, Rev. J. Tial Dum in voikhat an va tong ve. Dr. Saw Kulh cun, “ka hnatuan a tam ruangah a zate cun ka lo tuahsak man lo ding, asinan a tanglam foundation ihsin a thuam pawl le a tlunlam tiang ka lo tuahsak dingih a phar le a mawinak pawl cu nanmah ten nan tuah pei,” a ti. A man lak lo in duhdawtnak rori in a rak tuahsak ih lungawinak cu Dr. Saw Kulh parah siseh, a simsaktu Pu Lal Bik parah a um a si. A tlunlam innbo pawl cu luangpi ih khatlam ah kaihci famkim a linglet ih retmi a si ih khatlam ta thawn thirfung (1″ MS Rod 17½’) kha kaan ah hmang tahrat in pehzommi a si. A hram toh cu a velkim in pithum thuk (a hrek leilung nemnak ah piruk tiang thuk) ih laihmi a si ih a kauhlam khal pithum thotho a si. A foundation velkim tanglam hmuah lungto hlum retin sawhkhwn ciamco a si. A thum umnak zawn cu 4′ kau ih tuah a si. Cuih a thuam umnak zawn cu a tanglam ah thirfung thuahhnih in kalhtheng ih ret a si ih Mirang leilung le lungte vunnel thawn (RCC) ih fekzet ih sawhhnget mi a si. A thuam pawl cu thirfung (¾ MS Rod) pariat pariat ih phun a si ih zungpibok pahra dan ah a kilhnak thirkual thawn kirh vivo a si. Cumi cu Mirang leilung, lungte le vunnel thawn burhcih vivo a si ih thir cu tampi a cem. Thirtluan pawl cu cozah dawr ah zohman ih an lei lo ruangah khirhsal an tummi tampi a rak um ih duhzat mal olten an rak lei ngah.1979 kum sungah leilung thuailam 3′ le leilung parlam 3′ tiang an dawl ih sangkapi pawl toh ding a um hrih lo ruangah siseh, Mirang leilung a cem ruangah siseh an cawl.Sangkapi le sangkate hrangah a biang (Chawket) pawl cu Kawlthing (pyinkadu) Kalaymyo ah cah a si ih Falam ah Kivi pakhat Ks. 33 in a thleng. Falam ih lettama (kutzung thiam) pawl in an tuah.Tlakrawh dawl lam ih a tuantu pawl cu Pu Par Hmung, U Ram Ling, U Pa Tai, Pu Hla Aung, Pu Pa Thek, Pu Van Kio, Pu Sui Ling, Pu Phun Kulh, Pu Tluang Ceu le a dang hnatuantu pawl tla an si. Thilri le paisa harsat a rak ton awk ruangah saduhthah in an zamrang thei lo. Foundation kha kumkhat ruah in a ciah ih sangkate tlun deuh tiang dawl theh zawngah pehzom thei lo in furkhat ruah in a ciah lala. A phar tlakrawh parah pangman a hringmi a kai ih zoh a sia phah. A fekkhoh rori ding a sina, a thalo ding a tina sak suak thei lo in an mualpho ding a tina ruahnak a phunphun an sim cio. Zumtu tampi in thla an cam ih an vansannak an Pathian hnen an sim cio.Kawlram sungtel pawlin taimak ksuah in paisa an bur lai fang ah an Pastor khal Kanada le Amerika tlawng thei dingah BWA khawmpi zawh dingin MBC (culai BBC) in an hun hril. Pathian in amah biaknak inn sak suak lo ih um ding a siang hai lo ti a fiang.1981 kum sungah a phar dawl an theh suak. A sahlam zungpibok 18 a si ih a lenglam in pi 21 a sang, innsunglam in pi 18,19,19½ a sang. Inn sunglam sandaan a bang awk lonak cu zial leilung an leiter ruangah a si. A tlunlam innbo (kaihci) hrangah Lairam suak thing rak hmang uh ti-ah Pu Lal Bik ih cah bangtukin hual thing an hmang. Cuih hual thing pawll cu Valung (Bamboocamp) thlang Duh Mang ram ah U Phir Kap ho in an aat ih Ramthlo ram Lai tupi ah U Rual Tai le U Kam Lo ho in an aat. Innbo cu 7″ x 2″ (2) a si ih a cum pawl cu 5″ x 3″ an si.1982 kum thok ihsin innbo le cum pawl cu lettama (kutsung thiam) pawl in an tuah ih an tuahciami kha leilung ah sii (tinbawsii) an hnih hmaisa. Sihnihtu pawl tla cu U R. Tlang Iap, U Robin le U Cin Za Thawng tla an si. Lettama hotu bik cu Pu Con Hmung a si. A bawmtu pawl tla cu U Tluang Mang, U Bual Tiam, U Tlang Tin Khum, U Piang Kham, U Nuan Lian, U Hmung cin, U Lal Kim, U Hrin Luai, U Hram Lian Kar le U Chia Thang tla an si. A par in khainak ah puli an hmang tambik. Lamzung ih cuvek thlirnak cet (winch) an hmang nain tih a nung ih puli (pulley) an hmang saal. An Pastor, Rev. J. Tial Dum cu Yangon ih a thiamtu in cahnah parih ruang an zingmi an rak simfiang a si ih Falam ih lettama pawl hnenah simsaal in a tuanpitu a si ve. Voikhat cu pi 21 sangmi par ih a dinlai ah a pawkmi a pelh ih leilung ah a tla. Minit 4 sung a thi lawk ih siizungpi ah an ret. Ruh sibawi le Falam siizung sibawipi Dr. Kam Za Dal le adang pawl ih tuamhlawmnak in a dam saal.Hih innpi a tlunkhuh canphio cu a zate in tlep 1350 a cem. A lenglam ih leimi pakhat hman a um lo. Lairam bawi upa le Falam peng bawi upa pawl ih bomnak in man ol deuh ih ngahmi lawnglawng an si. 1983 ihsin a hmailam hulhliap (veranda) an thok. Thlanglam le saklam tower thuam pawl cu thirfung tamzet thawn fekzet ih tuahmi an si ih cubangtuk thuampi 8 a um. A laifang a niamnak dotu cu tlakrawh thuam menmen an si. Tower pahnih karlak hulhliap tlunlam rawn cu thirfung le mirang leilung, lungte le vunnel pawl burhmi a si ih a fek zet ve.Tower tlun ih thinglamtah zim tiang leilung in pi 65 a sang. Tower tlunlam ah dothnih a um. Dot tlunta ih a hmailam ah RCC thawn tuahmi a hlumpi a um ih Jesuh Khrih le dungthlun 12 langtertu a si. Thuaita deuh dot ah sangkate tlun ah a zum pathum a um ih Pa, Fapa, le Thiangthlarau langter a si. A sullam nei ih tuahmi an si. A saklam tower pakhat cu Biakinn lut hnu Rev. S. Hrang Kap Hnin ih Pastor tuan lai ih sakmi a si.Pulpit dunglam ah baptisma tipil peknak tili a um. Cuih tili cu thuam thawn domi tili a si. Tili dunglam ih sonmi zuk hi U Duh Luai ih suaimi a si ih Jordan tiva langtertu a si. Pulpit thuai ah thlacamnak le thilri retnak khan a um. Hih khanpi hi a hleice ih laihmi a si ih mi in ral relhnak ah maw nan tuah tiah an rak sut theu. Cuih khan hrangah tleu luhnak sangkate khal on har deuh dingih tuahmi an si. Pulpit tlun ah minung kul lai din theinak don a um ih caan hleice ah hlarem saknak ding ti ih ruatmi a si. Pulpit sak le thlang ih hlarem tonak pahnih cu a hnu ih tuah leh mi a si. Bethlehem Biakinn leinak le saknak thu: FBC in Bethlehem Baptist Church hrangah inn Ks. 300,000 in a lei sak ih innsaknak hrangah FBC ih innsang zate hnenah thlacamnak thawn bomnak an dil ih innsang cio in an pek ih an tel ve. FBCA (Falam Baptist Churches Area) dinnak: Falam Baptist Church cu kum reipi ihsin Falam Tlangkulh Baptist Area sungih ummi a rak si. Area pakhat cu naih zetih pawlkom awk le hnatuan a tul ruangah khawpi le khawte Kawhhran dinhmun in harsatnak tete a um phah theu. A thupi bikih tonmi harsatnak cu nauhak sunday School pawlkomnak le hnatuannak ah a si. Ziangtivekin harnak a um ti cu hitawk ih ngan theh theih a si lo. Cuihhlei ah Falam khawpi sung Kawhhran kilkhawi awknak ah a dangteih Area pakhat neih a thupi in a lang. AD 2000 sungah FBCA din ding tawlrel a si ih Falam Tlangkulh khawm ah thlawsuah peknak a um. 2001 February ihsin FBCA Area cu FBA ram sungih Area pakhat in a ding thlang. FBA sungah neta bik Area a dingmi a si. FBCA sungih Kawhhran pawl cu: 1. Falam Baptist Church (FBC) 2. Calvary Baptist Church (CBC) 3. Baptist Church of Betani (BCB) 4. Olive Baptist Church (OBC) 5. Kanan Baptist Church (CBC) 6. Bethlehem Baptist Church (BBC) tla an si. 2013 Falam Baptist Church Hruaitu OC pawltla cu: 1. Chairman : Pu Peek Thang 2. Vice Chairman : Pu Kap Cin Thang 3. Secretary : Rev. Danniel Vai Lian Zul 4.Joint Secretary : Rev. Thang Za Khum 5.Treasurer : Pu Khua Thio 6. Assistant Treasurer : Pu Ca Maung 7. Members : Rev. Paul Hram Kulh Thang Pastor No Tin Cuai Pastor Neih Kim Pastor Lal Biak Sum Pastor Thawng Bik Pastor Bawi Cung Nawl Pastor Benjamin Van Thawng Nei Lian pawltla an si. Pastor: Rev. Danniel Vai Lian Zul (Church Pastor) Rev. Thang Za Khum (Associate Church Pastor I) Rev. Thang Za Khum (Associate Church Pastor I) Assistant Church Pastors: Pastor No Tin Cuai (Secretary, Women Fellowship) Pastor Neih Kim (Secretary, Nusery & Home-care) Pastor Lal Biak Sum (Secretary, Youth Fellowship) Pastor Thawng Bik (Secretary, Christian Social Service and Development) Pastor Bawi Cung Nawl (Secretary, Christian Education) Pastor Benjamin (Secretary, Music) Source: FBC, Falam A Peh-tlaimi Cahram :
Posted on: Tue, 25 Jun 2013 03:48:49 +0000