Fenómeno Nobo Awor ku nos pais ta bay kumpli 3 anja di eksistensia y nos posishon sosio ekonómiko y finansiero su maskarada ta kai y pueblo mes por opiná kon realmente fuerte nos pais ta pará, a lanta un fenómeno nobo. Si un fenómeno ku antes ningun hende tabata riska di hinka den nan kabes pa hasi pa motibu di e berguensa ku esaki ta trese kune. Homber, tende bon, homber y muher no ta importa di kual edat awendia ta aserkabo unda ku ta na kualkier lugar públiko , hende ku bo no konose mes, y ta pidibo na alta bos pa sen , kaartji di telefon, treat di kuminda of kualkier bebida, kabes di boto gratis etsetera etsetera. Ku nos pais a bay atras ya no ta un sekreto públiko, pero di es manera aki si mi no ta kere. Na supermerkado tin un damita hoben duru riba su pianan a tuma komo kustumber para wardabo yega serka, pa pidibo” meneer, bo kier koopera ku nos organisashon.......”,nomber fantasma, pa un biaha pa Aruba ets. E damita tin un papelucho kual ta un fotokopia di un ke otro dibujo parti den forma di puzzel ku ta representa diferente balor; 1florin te 5 florin, den man. No tin nigun permit pa hasi esaki. Nada, djis abo, bo buena fe, kurason moli y e damita sonriente ta wak bo ku un kara di “ yo no fui”, kla pa tuma bo hasi mes mes. Otro lugar ku ami mes a ser molestia ta den casino. Damanan, di diferente edat ta aserkami y ta pidi kiko ku ta. Mas bien sen pa hunga den slotmachin . E cowboynan ey banda tambe ta aserka : “ brother nami un sigaria dibo”, tende bon e no ta pidi mas e ta demanda bo pa un sigaria.”By the way “ den mesun casino ey un paki di sigaria ta kostabo 11 florin. Imaginabo riba un anochi kada bes man tin di bay saku saka sigaria pa parti. Papiando di viktima un konosir di mi a kontami ku un ansiana di mas o menos 78 anja mitar di kuater di marduga a pidiele un kabes di boto na un hotel pabow di brug, despues ku casino a sera, pa hibele kas na Sta. Maria. Wel e brother aki no por a imaginele e historia ku e asiana a bin kontele tokante su yuinan ku a laguele na kaya, no a bin buskele y awor e ta hanyele obligá di pidi un kabes di boto pa kas, pasombra plaka si, e no tin mas. Bo sa unda a resulta ku mai ta biba? Te na Soto, si asina mes,..... mai tambe ta dal daks pidi lift sin paga y kada pida kaminda ta bisa e shofúr sigui kore un tiki mas nos ta serka di yega. Te na Soto e komedia a dura. Naturalmente abo komo hende nechi no kier baha un ansiana marduga grandi for di bo auto y ta sigui kore te yega su kas. Mi mes a tende e historia aki y mi a pensa; ay no ta eksagerá mi amigoe ta eksagerá.Pero no a pasa ni dos siman ku atami na mesun ora y mesun sitio, a ser aserká pa e machi ey ku mesun historia. Danki Dios ku ami a tende kaba di e komedia ku mi a bisele for di tempran: “ mai, ami si no ta hibabo Soto, daaag”. Shonnan kada dia mi oreanan ta tende mas di e historianan aki. Kos a bira perempempem pero di e manera aki si, no por!
Posted on: Wed, 18 Sep 2013 03:38:27 +0000
Trending Topics
Recently Viewed Topics
© 2015