FÛRPUI LUNGLEN Fûrpui thla no a lo dê a. Khua a hnâwng deuh ê, tihloh-ah chuan boruak lum uap churh maite pawh a kiang cho ta in vân boruaka Lo hal khu zam pik chûk thinte pawh he fûrpui ruahtui hian a tlêng fai zo tawh a. Hawina lam apiang mai chu alang fai vûk vek a. Thinghnah tlakawlh ro bim bem te pawn hnah thar an rawn chhuang thar leh ta hlawm a. A ni, he hunah hian hringnun a thar leh thin ni.. Ni e, hringnun ti thara, beiseina leh ngaihtuahna thar min siam fo tu, thinghnah chawrno hlep hlep te, tlang leh mual hring dap mai han hmuh chang hian dawn zawng a ti thui thin ani tiraw? Ruahtui tlak zawh hlima tlang lo lang fai ta kuar leh boruak lo thiang ta kûk mai te hian suangtuahna thinlunga mu reh dak tawh hnu pawh a kai harh a, fûrpui lunglen rauthlaleng chuan thinlung hi a luah veng vengin mihring hmelma lian ber ni pakhat fo thin khawharna chu thian tha berah a rawn chantirin ani nen chuan tumah ngailo lekin ni tumtawi a nuam a, tudang mah min thlakhlelh loh tir fo thin. Fûr ni alo chhuak a, ni lan lai chuhin thingtuah tur te, puan suk ilo leh thlai rep ilo tih ro loh hlauvin hmanhlelh a ngai a, ruahtui tla in thosi, vangvat leh vaihmite a keng tel a, pahmei In-chung far thawm that leh kâwm rih fai thatloh avanga In chhunga tuihawk lut buaipui reng renga hmanhlelh alo ngai bawk nen; chu a chhapah tuilian leh leimin, thli tleh, kawng chhia a keng tel a. Rial tla leh trêk tla in nu nau a ti thlabâr a, he furpui avanga inkhawm thlulh ngaih chang lah a tam. Naupang ni se, an khawlai leng ruah do avanga damlo te, a pa chang chen hian hritlang khawsik min neih tirtu tam ber pawh, sik leh sa inthen zingah hian he hun hi ani. Tin, pawipang i lo a khawlai vah chhuah a hreawm a, insuk ro tha thei lo leh thuamhnaw lo hmuar duh bawk nen, heng zawng zawng ngaihtuah chuan a lunglen thlakna lai ai chuan a hnêawmna a tam mah zawk awm e. Mahse.. He hun avang hian kan thlai chin leh thei ilo ten par chhuangin Rah an chhuah theih phah a, ei tur chhuanchhama kan awmloh chhan pawh he furpui, van malsawm ruahtui vang hi ani. Kâng mei thu-ah nise a muan awm a, tuikang nghah lah a ngai hek lo. Thlai ilo ni se, fanghma, dawnfawh, hmazil leh thlai dang thar lam tha tak tak, vaimim thlenga kan hnianghnar hun hi ani a. Chhûn a rei lutuk lova, zân lah a rei lutuk hek lo. Heng zawng zawng ka ngaihtuah hian he hun hi nuam ka ti a, zing lam nichhuak thlenga a mawi em em hun ani. Ruah tla han bâng se, vânchung nula tuichâwi an in zui diah diah te, ni lo thar ta kuar lâwm a sava leh chiapcha chi tin an râk noh noh ngaihthlak te hian beng a fah a, muanawm taka lung a leng veng veng hun chu tun hun, he FÛRPUI ngei hi ani.. (Ka post hlui, repost leh mai mai. Ka hul viau aiah..)
Posted on: Mon, 11 Aug 2014 17:37:51 +0000
Trending Topics
Recently Viewed Topics
© 2015