GOAR NI ANGKA JAMBAR JUHUT Angka on ma goar ni jambar juhut: Pinahan Lobu 1. Na marngingi (parsanggulan, ulu, kepala bagian atas, tempat otak); 2. Osang (kepala bagian bawah, silojaloja tingki marngalungalu); 3. Aliangaliang (rungkung -somalna diseati do on tingki mangan); 4. Sombasomba (rusuk depan dipotong melingkar tidak putus, unang maponggol); 5. Soit (buhubuhu sian pat); 6. Ihurihur. Sigagat Duhut 1. Na marngingi; 2. Osang; 3. Tanggalan (aliangaliang molo pinahan lobu) ; 4. Panamboli/ungkapan; 5. Sombasomba, (rusuk galapang, i ma sombasomba na gok, rusuk na mardomu di jolo) ; 6. Buhubuhu (soit molo pinahan lobu) ; 7. Ihurihur; 8. Pohu (tanggotanggo, jagal) . Mangapuli, Pasahat Hata Togar-togar manang Manise? May 13, 2009 by Sampe Sitorus,SE (A. Hitado Managam) Di sada punguan na ni dohotan ni panurat adong do piga-piga undangan na janggal ni parrohahon, tarsongon on: 1.Undangan Mangapuli, hape na monding i nunga Saur Matua. 2.Undangan Manise, hape namonding i di Tangerang on,jala parsidohot do punguan idi ulaon partuatni na monding i. Boi dohonon hampir 70 % ruas ni punguan i mandohoti ulaon I jala sahat do boa-boa tu sude ruas ni punguan. Di son binahen hatorangan manang pangantusion tu Mangapuli, Pasahat Hata Togar-togar manang Manise asa anggiat lam tu tambana parbinotoanta jala asa unang masa di hita na hurang “tepat” boa-boa manang undangan. Mangapuli (pasahat hata-apul-apul) Molo ulaon habot ni roha (Tilahaon, Mabalu Mate Purpur, Mate Punu,Mate Mangkar)di sekitarta (JABOTABEK), biasana dung mulak sian udean, marpungu do muse hasuhuton, dongan sahuta dohot punguan parompuon(parmargaon) laho martangiang. Laos di si ma di tontuhon tingki, manang na andigan ro punguan-punguan laho mamboan indahan sipaet paet manang indahan soso-soso tu bagas ni na marsitaonon i. Somalna di boa-boa tu angka dongan di goari ma i ulaon mangapuli.(misal undangan ni punguan parsahutaon, parmargaon di surathon ma Ulaon Mangapuli). Jadi uloan mangapuli tu na marhabot ni roha do, jala umumna angka hata sidohonon pe godangan do di enet sian Bibel /Alkitab (misal Heber 10:23-35, 1 Petrus 5:7, dsb) Siboanon na somal ima: Indahan Paet-paet, Indahan Sosososo manang Indahan Hapithapit Angka i do goar ni sipanganon na binoan ni tutur(sisolhot) tu namarsitaonon (tilahaon, mabalu -> dibawah level sarimatua) Indahan Paet-paet, Indahan Sosososo somalna di hunti do mamboan on jala porlu do i patar di ida dongan sahuta (hombar jabu) dohot pamili najonok naung ro tutur mamboan sipanganon. Di hitaan di jou do dongan sahuta nang si solhot najonok rap mangan. Indahan Hapithapit tar songon di tuntun do mamboan asa unang patar tu pamerang ni na torop jala ndang porlu jouon dongan sahuta (hombar jabu) dohot pamili najonok manganhon i. Indahan Paet-paet hatoranganna: Manang beha pe tabo ni sipanganon i, ianggo di pandaian ni namarsitaonon i tung paet do daina, hinorhon ni sitaononna i. Songon i nang di tutur na mamboan sipanganon I, nang tu nasida mangontor do sitaonon i. Indahan Sosososo hatoranganna:Sian goarna i nunga torang tujuanna i ma na manosoi na marsitaonon I asa olo ibana mangan songon na somal. Hinorhon ni dokdok ni sitaononna tung so adong do tarbungka roha dohot pandaian ni na marsitaonon i tu sipanganon. Ido alana umbahen na porlu ro tutur mamboan sipanganon asa anggiat olo mandai sipanganon i, asa tumibu suang gogona dohot hahipasonna. Indahan Hapithapithatoranganna: tar hira dos do dohot indahan paet-paet, alai tingki mamboan dihapit tar songon di tuntun asa unang patar tu pamerang ni na torop alana ndang porlu jouon dongan sahuta (hombar jabu) dohot pamili najonok manganho i, sae do holan nasida na sabagas jala memang holan tu nasida do sipanganon i. (ndang pola godang na binoan ni tutur i). Najolo dang masa sahali ro sude hula-hula manang dongan sabutuha manang angka boru mamboan sipanganon tu na marsitaonon, alai marsasaripe do marsoring-soring laho manosoi dohot manogar-nogari nasida. Nang angka dongan na asing pe godang do na ro, alai ndang pola sai mamboan sipanganon, sae ma lampet manang pisang. Tujuana asa hira na so marpansohotan do angka pamili ro dibagasan na pitu borngin. (tiada hentinya bergantian keluarga menerima kedatangan pamili selama 7 hari-7 malam sehingga mereka tidak kesepian). Ianggo di di tingki on nunga di parmodern ulaon i, sipata nunga sahali ro sude alani argani tingki dohot dao ni inganan.Songon na mago do nian “intisari / nilai yang terkandung” di pamingkirion ni angka ompunta sijolo-jolo tubu. Mangalehon hata apul-apul Molo holan saripe do na ro mamboan sipanganon i, ba disi sun (selesai) mangan dilehon ma hata apul-apul dohot hata sipaingot. Molo rombongan punguan do na ro di atur Ketua(pengurus) ma angka si dok hata. Somalna molo rombongan do na ro sai di jou na marsitaonon i do 1 manang 2 halak haha anggina mandongani ibana mangadopi rombongan na ro i. Dung sidung marsipanganon ndada pola adong namarsisean songon angka di ulaon adat na somal, alai pintor di pungka ma na mandok hata apul-apul tu na marsitaonon i. Note: Molo Kristen do hita dohot na marsitaonon i, dumenggan ma acara i dibahen songon kebaktian. Tarsongon on ma acarana: marende, tangiang pambuhai, pasahat hata apul-apul dungi di pasimpul dohot renungan singkat, marende, mangampu, di ujungi dohot tangiang panutup. Pasahat Hata Togar-togar Pasahat Hata Togar-togar ima na tagoari “Ibadah Penghiburan” tu sada keluarga naung jumolo tinadingkon ni sada ama manang ina naung Sarimatua/ Saurmatua/ Maulibulung. Jadi haroro ni angka namarholong ni roha ima laho manogar nogari keluarga na tinadingkon ni almarhum/almarhumah asa togar haporseaon nasida jala asa tongtong ”sada” jala mardos ni roha angka pinompar ni ama manang ina naung jumolo i asalam tu togu na holong di nasida. Tarlumobi ondolhononton tu nasida ia anak si hahaan (sulung) inama na gabe Ama jala inanta na (istrinya) na gabe Ina di keluarga i. Artina anak si hahaan dohot inantana na ma na berperan/tanggung jawab sebagai Ama/Ina di angka na tinodohon na. Songon i nang di angka tinodohonna dohot angka boru (ibotona) asa tongtong hormat/respek jala jagaonna wibawa ni hahana/ibotona. Manise Di dok ulaon Manise ala ndang di sekitarta ulaon partuatni na monding i (acara adat dan pemakaman tidak disekitar kita sehingga kita tidak ikut serta di acara tersebut). Jadi siseonta nasida beha do partording ni ulaon i termasuk ma i denggan do, lancar do sude ulaon i mardalan? Contoh: Di punguan parsahutaon Dos Roha Medang Lestari, monding ma natoras baoa ni Lae A.H Pardede/br Simanjuntak di Bona Pasogit, mulak ma keluarga i jala denggan di paborhat punguan marhite tangiang. Dung mulak nasida sian Bona Pasogit pintor di sungkun Pengurus ma nasida andigan rade tingki nasida manjalo haroro ni punguan parsahutaon. Rade ma roha nasida ari Sabtu 21 Maret 2009 Pkl. 19:00. Pintor di bahen Sekretaris ma undangan tu sude ruas ni punguan asa mandohoti ulaon Manise tu Kel. A.H Pardede/br Simanjuntak. Dipatupa pengurus ma acara manise dohot angka na hombar tusi sesuai AD/ART ni punguan. Jadi intina di acara i ma sungkunon ni angka dongan sahuta beha do partording ni ulaon partuatni natua-tuai. Ido asa dilehon tingki tu kel A.H Pardede/br Simanjuntak laho paboahon jujur ngolu/ jujur barita (riwayat singkat) ni natua-tua i sahat tu partuatna. Jadi sian jujur ngolu/ jujur barita tangkas ma botoonta aha sipasahonta (hata apul-apul do manang hata toga-togar). Note: lihat penjelasan singkat di atas. Di tingki pasahat hata togar-togar boi do (dang sala) bahenon angka hata/carita na mambahen martata/mengkel angka dongan tarlumobi hasuhuton. Aha siboanon tu na pasahat hata togar-togar manang na manise ? Somalna tong do mamboan sipanganon, alai piga-piga punguan sesuai AD/ARTna holan lampet dohot kopi/teh manis na ma di boan, sude ma i manghorhon tu nauli. Tar hira dos do pardalan ni acara mangapuli dohot pasahat hata-togar-togar, holanmolo di manise adong umbegesa jujur ngolu/ jujur barita ni namonding i andorang so pasahathon hata togar-togar. Molo rombongan punguan do na ro di atur Ketua(pengurus) ma angka si dok hata. Somalna molo rombongan do na ro sai di jou na marsitaonon i do 1 manang 2 halak haha anggina mandongani ibana mangadopi rombongan na ro i. Dung sidung marsipanganon ndada pola adong namarsisean songon angka di ulaon adat na somal, alai pintor di pungka ma na mandok hata apul-apul tu na marsitaonon i. Note: Molo Kristen do hita dohot na marsitaonon i, dumenggan ma acara i di bahen songon kebaktian. Tarsongon on ma acarana: marende, tangiang pambuhai, umbegesa jujur ngolu/barita ni namonding i, pasahat hata togar-togar dungi di pasimpul dohot renungan singkat, marende, mangampu, di ujungi dohot tangiang panutup. Huhuasi paidua ni hasuhuton di ulaon habot ni roha(matemangkar) Di ulaon habot ni roha andorang so manjaha Riwayat Hidup ni namonding sai jumolo do marhuhuasi paidua ni hasuhuton. Tarsongon on ma partordingna. Dung di jahahon protokol partording ni ulaon (susunan acara) somalna pintor di uduti do dohot huhuasi dohot manjaha jujur ngolu sian paidua ni hasuhuton. Tarsongon on ma isarana (contoh) di ulaon Mate Mangkar: Paidua ni hasuhuton Loloan namarhabot ni roha, Amanta Raja dohot Inanta Soripada, Nahuparsangapi hami Hula-hulanami Raja…. sian ….. , Tulang nami Raja …… sian……, Bona Tulang nami Raja …… sian ……, Tulang Rorobot nami Raja ….. sian …… (dst sesuai daftar horong ni hula-hula na ro tu ulaon i), nang pe dibagasan habot ni roha, tama do hita mandok mauliate tu Amanta Debata Pardenggan Basa i, siala asi dohot holong ni rohana na tontong mangiring-iring hita tarlumobi ma di saluhut hamu namanghaholongi hami. Mauliate ma hupasahat hami diharoro hamuna di napatuduhon holong hamu jala pasahathon hata apul-apul hata togar-togar laho manungkol-nungkoli hami namarhabot ni roha tarlumobi mai bona ni hasuhuton nami. Amang Raja, Inang Soripada, jongjong ahu dison marhuhuasi songon paidua ni hasuhuton, mauliate malambok pusu ma dohonon nami siala haroro muna. Tangkas do dipatuduhon hamu holong na sian Tuhanta i marhite pambahenanmuna, tarlumobi ma i di nasogot di parnangkok ni mataniari nunga dipasahat Tulangnami Rajai Raja….(sebutkan marganya) Ulos Saput ni amanami naung bostang tapaadoadopon, anggiat ma antong songon tangiang ni angka datulang manaputi nauli manaputi nadenggan ma i tarlumobi ma di hami natinandingkon ni amanami on. Udut tusi nunga dipasahat Hulahulanami Rajai Raja….(sebutkan marganya) Ulos Tujung tu simanjujung ni ina nami. Asa tangkas ma antong naung onding amanami sian tongatonga nami. Amang Raja, Inang Soripada saluhut hamu na huparsangapi hami namanghaholongi hami, tung mansai gomos do pangidoon nami tu hamu asa tongtong boan hamu hami ditangiangmuna tarlumobi ma i ina dohot ianakhonnami na tinadingkon ni ama nami on . Asa songon parbue tungkir naung pinasahat muna i antong, Pir ma pongki bahul-bahul pansalongan, pir ma tondinami margogo ma hami antong jala tongtong di ramoti Tuhan. Udut tusi asa tung tangkas boanonmuna ditangiangmuna jahahononku ma jolo jujur ngolu ni ama na tapaadopadop on. (Manjaha Jujur Ngolu termasuk riwayat ni parsahiton rodi tu ujung ni ngolu ni namonding). Dung sidung manjaha jujur ngolu di uduti muse. Songoni ma jujur ngolu ni amanami on, marhite on tung gomos do mangido hami tu hamu saluhut namanghaholongi hami asa tongtong boan hamu hami di tangiangmuna tarlumobi ma i hasuhuton nami. Songon i ma hata huhuasi laos dohot jujur ngoluni ni ama nami on na boi hupasahat hami. Mauliate malambok pusu ma dohonon nami tu saluhut hamu namanghaholongi hami, Botima. Tarsongoni ma na pinarrohahon di piga-piga ulaon habot niroha. Asa lam tu hantusna hita angka na umposo boi ma ditambai angka dongan. Molo mate punu didok ma i na so marindang anak baoa, holan boru do ianakhonna. Songon i do huroha pangalahona. Ai so adong na manorushon dohot na manguduti goarna. Hansit do si songon on molo sian adat-paradaton ni hita Batak. Molo najolo jala masa dope i di tingki on, ndang boi dope dibahen maralaman si songon on. Asa holan angka hata apul-apul do panghataion di si, lumobi sian angka horong ni hula-hula dohot horong ni tulang. Alai, taringot tu goar manang ulaon si songon on hombar ma i nian tu keputusan ni panghataion ni angka tutur dohot raja, lumobi sian hula-hula dohot tulang. Tar dos do ulaon di na Mate Purpur dohot na Mate Punu Mardalan do dison ulaon napasahat Ulos Saput dohot Ulos Tujung. Molo monding Ina, Simatua ni namabalui ma pasahat Ulos Tujung tu Helana jala Tulang ni Ina na monding i do na pasahat Ulos Saputna. Di pasidung ma namangungkap Tujung dung mulak sian udean. Molo monding Ama dipasahat hula-hula ni namondingi (parboru) ma Ulos Tujung tu Ina namabalui (tu boruna), jala Tulang ni Ama na monding i do na pasahat Ulos Saputna. Aha latar belakang dohot philosofina ? 1. Unduk marmeme Anak unduk do marmeme Boru: ido pandohan ni Ompunta sijolojolo tubu, jala songoni do nang di parsorang ni dakdanak di Pamoruon, dakdanak baoa manang dakdanak Boru-boru migor do ro Hula-Hulana (Tulangna) mamboan Aek ni Unte dohot pasahat Ulos tu dakdanak nabaru sorangi jala didok ma Ulos Parompa. 2. Mangoli Anak Baoa manang Muli Borui ba Tulangna do napasahat Ulos, jala didok ma nuaeng goar ni Ulosi Ulos Holong. 3. Monding pe Bere Baoa manang Bere Boru-Boru Tulangna ma napasahat Ulos Saput. Ima Ulos parpudi tu Berena namondingi. 4. Secara umum holan 3 hali do sasahalak manjalo ulos sian Tulangna, ima :Ulos Parompa, Ulos Marhasohotan(marbagas), Ulos Saput. Terkecuali molo ama adong kemungkinan 4 hali, ima 1 nai Ulos Mamongoti Bagas hatiha Mangompoi Jabu.(Boasa di dok kemungkinan1 hali nai ? Ala dang sude halak boi manang patuhaon olaon Mangompoi Jabu). Contoh Skenario: Sada Ama monding nunga adong boruna alai dan adong dope anakna(baoa), jala Tulang na dimaksud di son ima Tulangni na monding, Hula-hula tangkas Parboru dope, jala mangolu dope paranak(tilahaon matua). Tarsongon on ma si ulahononhon: a. Tujung do pe sipasahotan tu na mabalu i, jala ndang adong dope ianggo “Boan Na” di goari ma on “Mardalan Na Bolon”. b. Molo ama do na monding i, “Tulang na ma mambahen saputna”, somalna tu na mate purpur ima “Ulos Sibolang” boi do nang “Ulos Sirara”. c. Hula-hulana ma mambahen tujung ni boru na, na ma balu i ima “Ulos Sibolang”. d. Patupaon do songon ulaon “Marhata Raja”, jala laos di si ma pabotohon ni Paidua ni Suhut songon riwayat singkat (Barita Jujur Ngolu) dohot parsorion ni na monding i di tingki ni ngolu na. e. Di ulaon na “Marhata Raja”, ndang pola patupaon ni hasuhuton sipanganon. f. Ndang sijalo on do pe na margoarhon “Ulos Holong” sian Hula-hula dohot sian Tulang ianggo apala di tingki manang di ulaon na songon i. g. Di tingki partutano na i, ianggo sian ruhut ni paradaton ndang adong do pe sipatupaon ni hasuhuton jala dan adong ulaon maralaman. h. Tangkas do jalo on ta haroro ni hula-hula dohot tulang, hombar tu tingki naung di tontuhon di tingki na “Marhata Raja” i. i. Dung mulak sian udean, udutan ma ulaon di na ro raja ni hula-hula “Mangungkap Tujung” ni na mabalu i. Sipatupaon ni Hula-hula di tingki na mangungkap tujung ni na mabalu i ima : dengke sitio-tio, indahan masak, mual (aek) na tio dohot parbue na pir. j. Di tingki na mangungkap tujung i raja ni hula-hula, molo tung dipatupa hasuhuton pe sipanganon na marsintuhu boi do i alai ndang adong marbagi jambar. Asa ummura antusanta tar songonon ma partording ni ulaon i. 1. Manjalo haroro ni Tulang pasahat Ulos Saput (somalna jam 10.00 wib) Laos di acara i ma nasida mar acara penghiburan (pasahat hata apul-apul) MANOGOTNA DI NA MANJALO HARORO NI TULANG (Ulos Saput) Mangarade Paranak dohot manang piga nasida na marhaha-maranggi dibagas manjalo dohot mangampu ulaon na pinatupa ni Tulang dohot Hula-Hula. Mangarade ma Boru laho manjalo Boras si Pir ni Tondi nabinoan ni Hula-Hula: Paidua ni Suhut: Di hamu saluhutna Tulangnami, dohot sude hamu Hula-Hulanami, ala naung sahat ma tingkina Rajanami, pungkaonta ma ulaon namanjalo hula-hula di ulaon parmonding ni Ama na ta haholongi on. Di hamu Tulangnami, (Raja i ..……..) nunga rade hami Rajanami manjalo haroromuna laho pasahathon ULOS SAPUT tu Ama namonding on. (Note: molo Ina namonding, Tulang Rorobot/Tulang ni ina na monding i ma dijou pasahat Ulos Saput). Jongjong ma Tulang sipasahat Ulos Saput dohot rombonganna di sabola siamun ni namondingi (tong do mamereng partonding/parpeakni bangke ni namate i /kondisi rumah), jala andorang so dipasahat Ulos Saput, Marende, Martangiang, didok ma hatana: Hata ni Tulang ni namonding Pasahat ULOS SAPUT (somalna “Ulos Sirara”): Di hamu Ito dohot Lae… (Natoras ni namonding) songoni nang di borunghu Nai…… (namabalu), pahompuku si…… dohot di hamu berenami na marhaha maranggi, suang songoni di sude hamu namardongan tubu, na dohot do hami Tulangmuna, Nantulangmuna dohot Ompungmuna, sude hami na pungu on marhabot ni roha diparmonding ni Bere nami ima Ama na ta haholongi on. Najolo diparsorang ni Berenami on, hupasahat hami Tulangna do Ulos Parompa ima songon lampin ni Berenami on. Nuaeng nunga monding ibana, ro ma hami Tulangna pasahat Ulos Saputna.Asa dohononnami ma tu hamu Inang borunghu (namabalu)Nai ..……, pahompuku si……….. dohot tu sude hamu Berenami (haha-anggi dohot iboto ni namonding): Hupasahat hami ma Ulos Saput on tu Berenami naung monding on, dohot pangidoan di tangiangnami tu Amanta Debata Parasi Roha i, asa manaputi Parhorason, Panggabean sian pasu-pasu ni Tuhanta di hamu sude na tinadingkon ni Berenami on. Borhat ma ho berengku mandapothon Tuhan Jesus Kristus di surgo hasonangan i. (Laos diampehon ma Ulos Saputi tu na mondingi) Paidua ni Suhut: Rajanami, mauliate ma di hamu, nunga tangkas di pasahat hamu ulos saput ni beremu ima Ama na hu haholongi hami naung bostang di jolonta on, sahali nari dohonon nami maulitae godang ma di hamu Tulangnami. Note: dang pala si alusan ni paranak /pasahathon piso-piso tu Tulang dohot Hula-hula alana na mate punu do on, jala Tulang dohot Hula-hula pe ingkon mangantusi do di si. Si tongka ni na unang, sotung adong sarita sian Tulang dohot Hula-hula molo so di pasahat suhut piso-piso (alus ni ulos nasida). 2. Manjalo haroro ni Hula-hula pasahat Ulos Tujung (dung sahat Ulos Saput) Paidua ni Suhut: Mauliatema. Di hamu nahuparsangapi hami Hula-Hulanami (Raja ……….……) nunga mangarade hami Rajanami manjalo haroromuna laho pasahathon Ulos Tujung. Jongjong ma Hula-Hula sipasahat Ulos Tujung dohot rombonganna di sabola siamun ni namondingi (tong do mamereng partonding/parpeakni bangke ni namate i /kondisi rumah), jala sipasahat Ulos Tujung di jolo ni namabalu i. Andorang so dipasahat Ulos Tujung, Marende, Martangiang, didok ma hatana: Hata ni Hula-hula (Parboru) Pasahat ULOS TUJUNG (somalna “Ulos Sibolang”): Di ho Inang, Borunghu: . Di tingki on dipaporsanhon Tuhanta do tu ho sitaonon na mansai dok-dok, mansai borat do sitaonon on songon udan nasohasaongan, songon alogo na so hapudian. Dison ro do hami Hula-Hulamu mandapothon hamu, paboa na rap do hita marsitaonon di parmonding ni Helanami on. Ala naung parjolo monding Helanami on, di son ro hami laho pasahat ULOS TUJUNG tu hamu na paboahon naung marsirang hamu di hangoluan on dohot Helanami naung monding on. Huampehon hami ma Ulos Tujung on tu simanjujungmu, napaboahon naung mabalu hamu, tanda naung holip sian parnidaanmuna Helanami/Laenami naung monding on, jala marhite nahuampehon hami Tujung on tu hamu didongani tangiangnami tu Amanta Debata Parasi Roha i, asa tanganNa nasumurungi ma mangondingi hamu sian sude arsak ni roha on, ditamparhon sian rohamu roha namandele, jala sai ditogu-togu Tuhanta ma hamu laho mandalani ngolumuna tu angka ari nanaeng ro. (Mangampehon Ulos Tujung: sian siamun ni namabalui, tu simanjujungna torus tu hambirang, jala ingkon satonga pardompahan ni namabalui ditutup tujungi) Andorang so ditutup hula-hula dohot tangiang panutup, pintor alusan ni Paidua ni Suhut do mandok mauliate, songon on ma hatana: Mauliate malambok pusu ma Rajanami di holong ni rohamuna i di hami pamoruonmuna on, lumobi ma di naung pinasahatmuna Ulos Tujung tu Inanami namabalu on. Sai anggiat ma songon pangidoanmuna i, sai asi ma Roha ni Tuhanta, dao ma pandelean sian Ina naung mabalu on, sai tumibu ma tarapul rohana siala ni angka tangiangmuna hula-hulanami. Rajanami, songon naung hutariashon hami di “Marhata Raja” nabodari, di namulak sian udean annon rap ma hita mulak tu bagasnami on laho pasidunghon ulaonta ima: Ungkap Tujung jala laos di ulaon i ma Rajanami mangido tangiang hami sian hamu hula-hula nami jala apuli hamu hami tarlumobi Ina naung mabalu on, Sahali nari dohononnami ma mauliate godang ma di hamu saluhutna hula-hulanami dohot sude uduranmuna Rajanami. Dung i ditutup Hula-hula ma dohot tangiang. 3. Manjalo haroro ni Bona Tulang, laos disi ma nasida pasahat hata apul-apul. 4. Manjalo haroro ni Tulang Rorobot, laos disi ma nasida pasahat hata apul-pul. 5. Dongan Sahuta pasahat hata apul-apul (termasuk ma dison Punguan Parsahutaon) 6. Dongan Tubu (dohot boru,bere) termasuk ma dison Punguan Parmargaon dohot Parompuon pasahat hata apul-apul 7. Mangampu Hasuhuton 8. Di pasahat ma tu Huria 9. Borhat ma tu udean (pemakaman) 10. Ulaon Ungkap Tujung (dung mulak sian udean) Somalna dung mulak sian udean dibahen do partangiangan. Andorang so mangan na torop, jolo di ungkap suhut parboru ma tujung ni boruna. Hata sidohonon tingki mangungkap tujung on ma: Di ho ito. Adat napinungka ni Opmunta siolo-jolo tubu, dung ni ampehon tujung ni namabalu, ingkon ungkapon do muse asa gok ulaon adat i. Nuaeng pe ro do ahu mangungkap tujung mon. Dung i diungkap ma tujung i, jala di jomput ma boras 3 hali tu simanjujung ni namabalu i jala didok ma: sai pir ma tondim olat ni on tu joloanon. Udut tusi di taburhon ma boras liat-liat, liat gabe liat horas. Salpu i di painumhon ma aek sian galas, jala didok ma: ingot ma ito hata ni Tuhanta na mandok; Ahu do namambugangi, alai laos ahu do na pamalumhon. On pe sai di pamalum Tuhanta ma na hansit jala na bernit na ampe tu borunghu, sai tiur ma pardalananmu tu joloan on bahenon ni Tuhanta Parasi Roha i. Di usaphon ma saotik tu simalolong ni na mabalu i jala didok ma; Tuhanta ma namangapus ilu sian simalolongmon. Dipadao ma angka na holom, sai tiur ma pemerenganmu tu joloan on. Dung i disuhaphon ma muse tu bohi ni namabalu i (disuhapi) jala didokma: sai minar ma bohim, jala sai ro ma las ni roham tu joloan on. Salpu i dilehon ma mangan na mabalu i, ima dengke na pinatupa ni hula-hula. Dung i marsipanganon ma. Ndang adong marbagi jambar di ulaon on. Dung sidung marsipanganon di uduti ma muse dohot panghataion ganup ma mandok hata apul-apul na be, parpudi ma Hula-hula hasuhuton (hula-hula tangkas). Dang adong be sihatahonon ni Hula-hula taringot boru nasida na mabalu i, alana adong do tading-tading ni amanta na jumolo monding i jala hot do ina i di hutana Ina na mabalu tersebut tidak di mungkinkan untuk kembali ke rumah orang tuanya. Dia tetap bagian dari keluarga besar suaminya karena dia punya anak dan dia berkewajiban untuk membesarkannya.
Posted on: Wed, 31 Jul 2013 02:26:22 +0000
Trending Topics
Recently Viewed Topics
© 2015