Ilomon Toonkorroki NOSIM FM. 7AM. Etaboluo orais enkisiaayiare nalo aya iropiyiani 7billion naaitabaikinyieki olorere netii naaiboorieki enkojongani nayau oltikani tiatua murua e county 25 naasesh etii ina ajungani.Ore eirorita ngole temboloto eina mradi eretoto te county e Migori nejo Orais ekelo sirkali eibungakino okulikae turrurri ooibungare aaishoru ineeti naabaya 13million toonkajijik pookin naatii murua 25 e county naayiolokini oltikana oyau enkojongani.Etolimuo sii orais ajo kepuoi aaishoo nena neetii tiatua ilapaitin 9 oopuonu pesho peemituni iltunganak lele osho le Kenya oobaya millioni 23 tialo oltikana.Eitadedeyie sii orais ajo eton ake etii abori enyuata esirkali etem aarare oltikana lenkojongani nejo taa ina peeton ake aa obo toormeita oomutita nkera kutitik ontuan tele osho.Etolimuo olarikoni lolosho ajo keasishore oshi ake sirkali iropiyiani 10billion tepooki ari erareki ormeitai le malaria. Einyaaka sii orais abalakinyie ilairemok pooki ajo kepuoi aaidip esile enye naatae tenkata nemiado.Eishorua sirkali embilion 1.1 ooropiyiani najo ninche elakieki ina sile oolairemok loorkikuan lemurua e Nyanza.Eitanapa orais nkampunini pookin naainyangu neji euksari metalaa ilairemok mpesai enye iropiyiani olapa le 7,8 tenkaraki eton tenakata aa sidai bei oorkikuan.Etejo sii orais ore apa iropiyiani naaitarasaka enkampuni e sonny sugar temurua e awendo naabaya 447million netii atua ina 1.1bn etejoki apa kelakieki isilen oolairemok naatae eiteru olapa leile. KNUT/STRIKE Eishoo olturrurr loormalimuni le KNUT sirkali isaai 24 ake meshomo aidip enkiroroto enye naipirta olningo lesiaai yioloti anaa Collective Bargaining Agreement. Etejo olasirani kitok aitasheikinoni leilo turrurr le KNUT oji Wilson Sossion, teneeku ade etanya sirkali eipotu entumo ebaiki enkolong e Jumatatno enawiki aa taaisere eitorito enkewarie naa kepuo ilo turrurr aaishoru kulie olongi naapishana eton eitu edumunye ormgomo.Ore torkilikuai oitarasaka nkajijik oolomon tenaang e Nairobi netejo meitaa kasi enyuaata olturrurr le KUPPET oogira aajo maibooi ina duata ormgomo loormalimuni eikilikuanu esipata enye. KNUT/ DISABILITY Etejo sii ilo turrurr le KNUT keyieu ake neitengel sirkali iropiyiani naaretieki olorere pooki tarrueishi leton epoito dukuya tenkisuma,Etejo KNUT esipata epooki tungani lele osho le kenya peedoli ajo enoto enkisuma embae neton ake eibungita sirkali toolukuny oorkimojik hoo nejoito egira aanyok aaitabaiki enkisuma nkera pookin ele osho.Ore eirorie ilasirak loompala oolomon toonkopisini eilo turrurr loormalimuni le KNUT tiatua enaang e Nairobi neipotuo Sossion sirkali kitok meishoo masaa etipat pookin naayieunoyu neeta isukuuluni naatii iltunganak tarrueishi peelo enkisuma eney dukuya.Etolimuo ilo kitok loormalimuni ajo keishiakino sii neitoki sirkali alo aimaa mbaa pookin orkerreti lenkisuma peeku ole dupoto toonkera tarrueishi ele osho. PLEBISCITE/IEBC Eketii tiari olturrurr oitasheiki engelare tele osho le IEBC peelo aitasheiki engelare kiti e Referendum teneeku eimieki ajo keasi anaa enatolimuo olopeny olorika leilo turrurr oji Isaac Hassan.Etiaka Isaac Hassan ilasirak loompala oolomon tiatua enaang e Nairobi ngole nchere eterretenate katukul ilo tim lenye peepuo aarikoo ina kukuo kitik e referendum teneeku eimutua irkiliku pookin lenkalo nagira aarrumoo metooshi ina kukuo enkibelekenyata anaa enajo nkitanapat e katiba olosho le kenya. Eishorua Hassan osiligi hoo negira aairowuajakino ninche irkioomani lesiasa tialo ina kipototo enkukuo gelunoti e referendum. Ore embae nabo naituruk teyieunoto orkiooma le CORD naa peeitayuni tenkitoria enkisiyiare olturrurr oitasheiki engelare le IEBC.Eibalie CORD tenebo orkiooma loorgavanani aajo tenkoitoi enkukuo e referendum ake eidimi aatoningirkiliku lenye.Kake ore ninche orkiooma le jubilee nejoito keidimi aaimaki nena baa pookin tiatua bunge neidipi.Etiaaka sii enkaelong orais uhuru irgavanani lorkiooma le jubillee oogiraa aipotu ina kukuo metunguai erikore teilo kiooma neingoru tedikae.Ore ake tenena pookin netejo olarikoni lorkiooma loorgavanani Isaac Rutto laa orgavanai le county e bomet nchere meitasim aitukuret ninche ororei pooki ooshi tialo enduaata naata irgavanani lele osho.Ekepuo sii ninhce aaiteru esotore oo signatures naanyorrarieki ina gelare tiatua ewiki nabo natiooyo. Ilomon ooingua nkuapi eboo. Eton ake egira arassaa emoyian e Ebola tesiokinoto oleng tolosho le Liberia etii irkiliku ooolus enkalifu ooitabayioki irkurrot lebiotisho lolturrurr le WHO tiatua wikii uni ake. Ilomon kulo ootolimutuo ilopisaani kituak leilo turrurr oitasheiki biotisho teseuseu le WHO. ;;;;;;;;;;;;;;;;;;;;;;;;;;;;;; Etejo olosho le Cameroon etara irkiyai lenyenak ilarruok le Boko Haram oobaya 100 peejo matijingaki ilo osho etunguaitie olosho lenye le Nigeria. Enkiguran. Eibalie enclabu e Borussia Dortmund aajo melo aiguran olmurrani lenye oji Marco Reus toowikii onguan einyaaka ake atum likae bae terubata emurt enkeju.
Posted on: Tue, 09 Sep 2014 04:59:15 +0000
Trending Topics
Recently Viewed Topics
© 2015