Isililo sentandane 30 Sobathathu sasilokuhlangana emission esakhulela kuyo lemuli zethu sithengele abantwana abalapha ukudla, impahla zokugqoka lengubo zokwembatha. Babejabula kakhulu osisi Bongi loEthel, basifisele impilo ende, uFather Wilson wayesewathatha umhlalaphansi wayakibo eNgilandi kweza omunye uFather owayesephethe lindawo. UmaDube wayesewantshintsha ngithemba wayefunde isifundo esikhulu empilweni. Wayesengumuntu othanda isonto njalo etshumayeza abanye ngezwi likathixo. UVusi lesikolo akuzange kwazwana kwakungamanzi lamafutha, wabaleka komalumakhe waya emzansi Afrika esiyazama impilo. Ngezwa ngendumela ukuthi wayezwakala kuthiwa ubotshiwe ngenxa yokuganga, ehamba entshontsha ezindlini zabelungu lokubhomba imitshina yemali. Wahlala iminyaka evalelwe esitokisini basebemkhulula bamletha kwelakibo ngoba engelancwadi ezazimvumela ukuhlala emzansi afrika. Ekufikeni kwakhe wayesekwazi ukutshayela imota ngakho wathenga umtshova walayitsha ngabo abantu, lanxa kwakuyisikorokoro kwakungafani ngoba wayethola okungamasenti kokumphilisa. Ngkhuluma nje ngiqeda kumdlula egalajini ethela ipetulo lokuhlanza ifasteli lakhe elikhanya beseligcwele intuli kakhulu. Isikhathi esinengi ngilokumdlula emgwaqweni nxa ngisiya emsebenzini etshayela lumtshova wakhe ohamba ukhafula iyezi elimnyama khaca. Piii piii yimi ngimtshayela ihuta ngimhwitha ngovava lwami esala angathi umile yena ebasele waphelela ngesiqubu. Laye angitshayele eyakhe yale ukukhala acine sekhiphe isandla wasiphakamisa ngisibone ngesibuko semota sengikade ngimdlulile. Ngelinye ilanga ngamupha imali yepetulo sesilela wabonga wancinciza mina ngathi,thatha mnewethu ubaba wathi asibonakekelana sehlukana lami ngisiya la engangisiya khona wasala emi engikhangele ngaze ngayasitheka. Kwala nje ukuthi axolise ngezenzo zakhe kodwa ngithemba ngolunye usuku uzangilanda axolise lami lokhu ngisalindile mhlawumbe ithuba lalokho alikafiki kodwa ngiyathembisa angimbambelanga qubu loba nini. Kuyisimanga indlela impilo eguquka ngayo. Abamhlophe bathi what goes around comes around batsho beqinisile ngoba ngilokuzibuza ukuthi ngempela yimi lo umandletshana obehlala esidla inyembezi zosizi. Phela namhla sengiyisikhwicamfundo esidumileyo njalo ngingumeli owaziwayo lasibi sikamongameli uyangazi sengike ngayakudla endlini yakhe. Sengiyindoda emadodeni njalo ngilwela amalungela alaba abangelamlomo lalaba abangelabameli abahlukunyezwayo lababandlululwayo. Ngiyaziqhenya ngokuthi isililo sentandane siphendule impilo yami kakhulu. Ngiyazibongela kumphakathi wonke njalo kulaba abalokhu behlukumeza abantwana ababathole ekwendeni loba ekuthatheni ngiyalixwaya ngithi kini,ubukhosi ngamazolo, kusinwa kudedelwana, liqaphele ngelikwenza empilweni zenu ngoba ikusasa alaziwa elisiphathele khona. **Luyaphela udatshana lwethu balandeli ngibonga kakhulu ngosekelo lwenu inkosi mayithel umusa wayo kumagumbi amane wonke womhlaba elikuwo ilikhuselele kumimoya emibi ilandisele ngezibusiso ezinhle. Ngomusa wenkosi yethu uJesu Kristu okaMsipha umntwana uthi kayidibane njalo kusiqephu sakuqala kudatshana lwethu oluzalandela. Ngilithanda lonke ngendlela eyisimanga** pls like and share my page Jestina Msipha -Writer of Short Stories
Posted on: Sat, 09 Aug 2014 20:55:07 +0000