(July 12) PROBLEMA SA PATUBIG SA DAKBAYAN, GI-USA USA PAGSUTA SA MAYOR Gi-usa usa na ni Mayor Celso G. Regencia sa pagsuta ang mga problema nga nag-umol karon sa dakung proyekto sa patubig ning dakbayan sa Iligan. Kini human nga misugat sa iyang paglingkod ang dakung problema nga mao ang pagkawala sulod sa pipila ka adlaw sa suplay sa patubig sa dakung bahin sa dakbayan sa Iligan. Kini usab tungod usab, matud pa sa kontraktor sa maong proyekto, sa kanunay nga pagbuto sa sinumpayan sa tubod didto doul pa sa bahin sa main source niini sa Barangay Suarez ning siyudad. "Ato gyud tong gituyo og schedule (meeting) katong mga contractor (sa water project) nga gikan pa sa Manila, Davao ug Cagayan de Oro. Ako gyud silang gi-prangkahan kung unsa gyud ang problema. Nasayran nato nga gikan didto sa main source sa Abaga paingon sa Highway sa Suarez doul sa Global Steel, wala pa kini miagi sa hydro-testing ang atoang mga tubo diha. Nag-schedule mi aron dili pud makuratan ang atong mga kaigsoonan kay mawala napud ang tubig, atong gihan-ay ang mga pamaagi mintras mag-hydro testing ang contractor. Ipatarong nato ilabina ang pagsumpay sa mga tubo nga dili na gayud mobuto," matud pa sa amahan sa siyudad. Matud pa ni Mayor Regencia nga paningkamutan sa iyang adminsitrasyon nga dili na mapurwesyo ang katahan sa Iligan kabahin sa hisgutanan sa patubig nga maoy gi-antus, matud pa, sa dugay nga panahon. Giklaro sa mayor nga mitumaw naman kini nga problema, pangitaan nalang kini og kasulbaran tungod kay dili matud pa masulbad ang suliran kung awayon ang kontraktor o kaha ang mga personahe nga maoy gitahasan nga mopatuman sa usa ka proyekto. "DILI NATO AWAYON ANG PROBLEMA. DILI NATO AWAYON ANG KONTRAKTOR. Atoa na silay giingnan nga testingan gyud ang tubo kung unsa gyud ang kapasidad aron dili na mangbuto. Aron inig turn-over na makit-an nato nga molungtad og dugay kay unsaon nalang nato pag-ayo kung wala na sila," giluwatang pamahay ni Mayor Celso G. Regencia sa interview sa DXRJ News.### (This news script was aired over Breakfast News of DXRJ Radio, July 12, 7:00am) Divina M. Suson, DXRJ News
Posted on: Fri, 12 Jul 2013 08:50:43 +0000
Trending Topics
Recently Viewed Topics
© 2015