KA PU, KHAWNGAIHIN I THUSAWI KHA LAMLET THEI LA KA VA TI EM!! Pu Zahawm, he thu hi, a Politics zawnga lak kawi atan ka ziak lova, Eng Party Mi leh Sa ma ka ni lo, tih ka sawi hmasa duh a ni. Zirna Manto zia hre vetu ka ni avanga he thu hi ziak ka ni tih min hriatsak hram ang che. Tin, kan District hnufual tak hmangaih ve thintu nia ka hriat avang che a he thu hi ziak ka ni bawk, tih pawh min hriatsak hram ang che. Nang chu, he ram mipuite tana pa ber, an harsatna leh manganna pawh hrethiam tura mipuiten, an duhtaka an thlantlin che i ni si a... Awle, kapu, Mizorama District hnufual ber pakhata zirlai rethei te te ten thiamna, a neih zawk leh hausa zawk faten sum leh pai thiltihtheina hmanga hmun hla zawk atanga an neih thei, an neih ve thei dawn lo avanga i khawngaihna an lo ngen hnu pawh a ti hlawhtlinsak ahneka, SAIHA COLLEGE ZIRLAITE CHU AN PEI CHEN CHEN LO NUAR MAI RAWH SE tih hawia tawngkam i lo chhuah mai hi, Saiha District mipui, a bikin, Mara fate hian na kan tiin, Min va hmusit em! kan tih asin!! I tawngkam hian mi tam tak rilru a hliam a, zirlai rilru, thiamna leh finna, an thiante, India ram hmuntha zawka zir theite anga zawng ve mekte a tina in, beidawnna ruamah i hruailut ang tih kan hlau hlelh ta love..!!Mizoram mipui thlamuantu tur in, zirlai rual rilru tina zawnga tawngkam i chehta mai hian he District, Saiha District, Mara ram hi i hnuchhawn ta tihna a ni mai em? I hnuchhawn dawn a ni chuan he District thalaite hnenah hian sawi chiang lawh lawh la, kan va tih tak em!! He District zirlaite hian, Thiamna, finna zirchhuakin, an theina zawn theuh ah he ram tan hian ke pen ve tumin, duhthu an sam ve thin asin. A ram neihtu, a ram hmahsawnna duhtu vek an ni ve asin!! Central sawrkara innghata, sawrkar chawmhlawm nih reng pawh hi an zak a, thiamna finna zirchhuak a, an puitlin ve huna, Central sawrkar chawmhlawm mai mai ni lova, state intodelh ni ve ngei tura he State hmasawntir ve hi an tum, an duhthusam a ni ve asin. Mahse, hetiang tawngkam, mangan lai leh lungngaih laia inhnemna atana tawngkam na ber i lo sawichhuah khum tak si a chuan, an duhthusam chu, duhthusam letlingah a chang palh ang tih a va hlauhawm ta em!! Athei fate leh aneih fate anga khawpui zawk, zirna thazawk awmna hmuna kal chu an duhthusam, an mangphan thin a ni tak meuh mai...mahse, mahse, thingtlang atanga neih thinglung khawng tak meuh a Saiha khawpuia sawrkar College rawn pan ve tang tang zirlai rethei te te hian, an duhthusam chu hai luiin, Govt Saiha College hi an lo pan ve asin... Zirtirtu awm lohna College-ah hian, an lehkhabu chhah pui pui hian awmzia a neih lova, finna pawhchhuak tura kaihhruaitu, finchhuahtu tur Zirtirtu an mamawh asin...chutiang a ni lai a, an nei chhun takngial pawh laksawn sak a, an mamawh ngawih ngawih pawh lakbo saka an han awm mai hi an tan chuan, hnual takzetna tham a ni a, lungawihlona lantir a, an manganna leh an mamawhna san zia an thiam dan anga rawn lantir mai hi an tihtur a ni ve asin... Faten pa te hnena engemaw ngen an neih hian, An rilru tina thei ang ber tur leh, an ngeng chhun thei ang ber turin lo chhang ta se, a fate rilru chu eng tlukin nge a nat ang? Faten chaw an nghei laiin pa berin In duh chen chen nghei mai teh u a tih dawn em ni? Kapu, engpawh ni se, he i tawngkam hi chu khawngaih takin lamlet la, hei aia beiseiawm deuh tur, a chhan leh vang diktak hrilh zawk la ka va ti em!! Vawiina zirlaite hi naktuka ram hruaitu tur an ni si chuan, Vawiin a hruaitu chhanna hian naktuka hruaitu turte rilru a va tichhe nasa dawn em!!
Posted on: Sun, 21 Sep 2014 11:47:24 +0000
Trending Topics
Recently Viewed Topics
© 2015