KOMUNIKADO DI PARTIDO LABORAL 1 Shut Down na Merka 2 Intenshon di Hulanda pa ku kompanianan Estatal na Hulanda. Ku hopi interes nos a sigui e desaroyonan di e situashon polítiko finansiero na Merka. E asina yama shut down komo medida drástiko a ser tuma I awor aki ta e konsekuenshanan ta na kaminda. Rònt mundu paisnan atraves di gobièrnu I ekspertonan a duna nan opinion I a ekspresá nan opinion pa konsekuenshanan di e shutdown. Aki na Kòrsou gobièrnu no a duna ningun ekspreshon riba esaki miéntras ku minister di Finansa a keda ketu ketu , miéntras ku nos florin ta kologá na e dòler merikano. Ta interesante pa sa si minister di finansa òf konseho di minister a papia riba e situashon mes. Òf nan tambe ta kere ku nos pais ta un isla isolá for di desaroyonan internashonal. Un konsekuensha direkto pa nos ku ta kologá na e dòler ta ku nos bida ta bai bira mas karu I nos forsa di kompra ta sigui baha. Esaki pa motibu di e bahamentu di balor di e dòler I naturalmente nos florin ku ta mara na dje. Esaki ta nifiká ku nos florin ta baha tambe ku relashon ku Euro. Pues tur produkto I servisio I debe ku nos tin na euro ta subi. Esaki ta inkluí e debe ku nos tin na Hulanda I pa ku Hulanda. Kombiná esaki ku un situashon di krísis na Europa i ku euro mes ta den diskushon, ta opvio ku nos tambe mester ta preokupá òf a lo ménos analisá e konsekuenshanan di shut Down pa ku Kòrsou. Pa kolmo China ku kuantitativamente ta e pais mas poderoso na mundu a deklará ku mester los ekonomia di mundu for di dòler. I e manera ku e la bisa esaki no ta solamente un menasa , pero tambe un atvertensia pa tur pais na mundu i spesialmente esnan ku ta kolega na dòler I nos no mester lubidá , mirando e relashon di China ku e paisnan latino merikano I Caribe, ora pa ora e influensha chines ta serka di nos kura di kas. Loke si mester opservá ora bo ta kologá na e dòler merikano, ta e hecho ku e debe nashonal di Merka ta inkreiblemente haltu. I manera na Merka mes nan ta bisa e subimentu di e plafon di debe no ta bai solushoná e problema finansiero Merikano. Nan a pone un fecha nobo, pa loke ta subimentu di e plafon di debe ku ta 15 di febrüari 2014, pero tambe a pone un fecha pa loke ta e shut down , ku ta aki 3 luna. Tur eksperto merikano ta konvensí ku lo no yega na un akuerdo polítiko pa loke ta e aspekto aki. Kon nos pais ta bai atendé ku e menasa finansiero I monetario aki.? Di otro banda Hulanda tambe ta pasando den un situashon polítiko finansiero hopi pèrta. Un desishon I ekspreshon di minister di finansa Hulandes sr. Deyselbloem , a kapta nos atenshon masha. E Minister importante aki a duna un opinion di gobièrnu riba funshonamentu di empresanan di gobièrnu di Hulanda. E Minister aki a bisa, ku awor lo bai “kijken mee”, ku e maneho finansiero di e kompanianan estatal. Kiko esaki ke men . Ku gobièrnu Hulandes no por laga kompanianan di gobièrnu tuma desishonnan mas riba e aspekto finansiero sin gobièrnu mes. Ta nifiká ku gobièrnu ta pone hinter e konsepto di dirigí NV nan op afstand, pues na distansha den diskushon. He He porfin esnan ku a obligá Kòrsou , pa pone maneho di gobièrnu op afstand awe nan mes ke drai koroto bek. Nos di Laboral , for di tempu ku Hulanda tabata obligá di privatisá I pone maneho di NV leu na distansia a duna nos opinion kontra di esaki. Na Kòrsou nos a yega di bisa kaba , ku privatisashon di sierto tareanan di gobièrnu , no a trese e efisiensia I efikasia I sakamentu di politikeria for di NVnan. Todo lo kontrario, defisiensia I falta di efikasia , ta ser pone riba tarifa di konsumidó I ta komplasé polítikonan ku pone kompinchinan na trabou. E úniko kos ku a sosodé konsekuentemente ta ku gerentenan a kere ku empresanan ta di nan personalmente , nan a bira arogante i segun nan ,ta nan so por disidí. Un kos si nan salarionan a subi un kantidat di biaha loke e tabata, promé ku privatisashon. Es mas salario di minister ta ñaña banda di nan. Awor ku na Hulanda nan a ripará ku nan mester drai kos bek, kiko ta para di maneho di nos NVnan aki na Kòrsou. Nos ta spera ku e hendenan klave I konsùltantnan ku a pusha den direkshon di privatisashon awor lo sigui nan maestronan hulandes I akseptá e frakaso di privatisashon di empresanan di gobièrnu. Partido Laboral Errol Goeloe
Posted on: Wed, 23 Oct 2013 01:49:28 +0000
Trending Topics
Recently Viewed Topics
© 2015