KORSOU: KOMUNIKADO DI POLIS: Tópiko: Hòmber detené na Brionweg pa maltrato serio i intento di homisidio. Djarason 21 di ougùstùs 2013 THT (Tim di Mantenshon i Supervishon) di Warda di Polis Otrabanda riba òrdu di Fiskal di Ministerio Públiko a detené alrededor di 21.40’or na Brionweg, Otrabanda na altura di un hotèl e hòmber, C.M.A.P., nasé na Kòrsou, di 27 aña di edat, pa un kaso di maltrato i intento di homisidio kometé dia 6 di ougùstùs último na un kas den Brionweg, Otrabanda. Riba e dia en kuestion e sospechoso den oranan lat di anochi a bai pidi sèn na un kas den Brionweg. Ora ku no a habri porta pe el a kibra porta di e kas, drenta paden i ku un tubu el a maltratá e habitante di e kas, un hende hòmber di 65 aña di edat, kousando leshonnan serio na su kabes, kákunbein i pèrdida di dos djente, pa despues e bandoná e sitio. E hòmber, seriamente heridá, a bai pidi yudansa di personanan den besindario ku a transport’é pa poliklínika na unda despues di a tratamentu el a keda interná den hospital St. Elisabeth. E investigashon ta kontinuá.
Posted on: Fri, 23 Aug 2013 02:34:32 +0000
Trending Topics
Recently Viewed Topics
© 2015