Kala Bag Ki Sakhi Kala bag ke raste me Kala bag ke najdik ek bahut khubsurat aur khusnivash jagah aayi. Hazur ji ki do motors thi, or bhi bahut se satsangiyon ki motors sath thi, jinme se Sardar Bahadur Narayansingh Delhi wale, Kulwant Roy Judge, Lekhraj etc., ki motors thi. Hazur ki sabse aage the, unhone motor waha roki, or bahar dari bichhakar beth gye, or farmaya Bibi Lajo se, "Kako, kuch lao, sangat ko khilae, bechare bhukhe honge.” Bibi Lajo pitari kholkar beth gayi. Hazur ne dya karke sabko apne hi hath se prasad bata. Sangat nihar ho gyi. Bibi Lajo thodi dur uthkar gyi, vaha bahut achha ek chasma dekha, hath muh dhokar pani piya. Pani bahut saf aur mitha tha. Bibi Lajo ko bahut achha laga. Unhone socha, pani satguru ke peene layak hai, so wo ek chandi ka gilas bharkar le aai or hazur ke aage pani rakh kar vinti ki, “hazur yaha bahut hi achha hai.” Hazur ne farmaya, “kako, yeh chasma mera hi bnaya hua hai.” Bibi Lajo ne unka matlab na samjha or kaha, “sache padshah, sab duniya hi aapki banai hui hai.” Kehne lage, “nhi kako, yeh chasma mere hath ka bnaya hua hai.” Fir dya kar apni naukari ke samay ki batein batane lage. “Kako, mene kala bagh, galiya, fashor, ebtabad, bahut din naukari ka kam kiya hai. Is chasme ko char angrej engineer banane lage, unse nhi bana. Fir yeh kaam mene liya or char mahino me yeh chasma bnaya.” Bibi Lajo ne kaha, “dhanya, sache padshah jo duniya ke kaam apne kiye hai, veh or koi nhi kar sakta. Parmarth ki to bat hi kya kahni hai.” Fir hazur satsang ki bat karne lage. Karib do ghante vaha jakar dera dala. Kala bagh ki sangat nihayat hi premi or satguru se prem karti thi. Bibi Lajo hairan hui ki hazur ne is pahadi me duniya ka kaam kiya hai. In logo ka to bda hi prem or bharosa hai. Unhone kaha ke bude stri purshon se hazur ki naukari ka haal puchha. Unhone bataya, “bibi hazur to janam se hi sant hai. Jaise vichar ab hai, vaise hi tab the, bahut hi dyantdar or nek the. Guru gharnth sahab sda hath me rehta tha. Hazur ke office se pach mile par ek jagah dikhai, ek chhoti si kothri thi. Ab to gir gyi par nishan baki hai. Yaha roj raat ko aakar bhajan karte the, din ko naukari ka kaam or raat ko bhajan. Hum bhi chhoti-chhoti thi, hame bhi kaha karte the, kakiyo pach naam ka simran kiya karo. Hazur se hamne puchhna, kaise kare, to unhone kehna, bahut achha batayenge. Hazur ji ki jindgi bahut hi pavitra thi.” Hazur kale bagh me 6 din rahe. Ek din sardi bahut thi so hazur bistar hi me bethe dhyan kar rahe the. Karib raat ke 8 baje ek premi, jiski aayu so saal ki thi, naam bhai chandasingh tha, garibnivaj ji ke pas pahucha. Baris bhi us samay ho rahi thi. Bibi Lajo ne kaha, “baba beth ja. Hazur dhyan me hai, abhi uthte hai.” Itne hi me garibnivaj uth gye or farmaya, “aa bhai chandasingh me teri hi paritksha kar raha tha.” Baba bahut kamai wala tha. Hazur ji ke charan kamalo par sir rakh gadgad ho prem se rone laga or bola, “shukar hai sache padshah, darshan to diye.” Deendyal ji ne uske sir par mehar ka hath rakha or farmaya, “me tere se bahut khush hu. Tum kamai karte ho, tum sache premi ho. Yeh to batao tum 17-18 mile ki chadai kaise chalkar aaye, or tujhe sardi bhi lagi hogi.” Usne jawab diya, “sab aapki dya hai, me raat ke 2 baje ka chala hua hu.” Sache padshah yeh sun kar bole, “batao aise-aise premiyo ko malik kyo na dad deve.” Usne kaha, “satguru ji meri 2 baat man lijiye.” Hazur ne kaha, “jo mangega milega, jo kahega manenge. Tere liye kuch inkar nhi hai.” Usne arj ki, “ek to tera swarup mujhse alag na ho, dusra tera bharosa marte dam tak bna rahe, mujhe tere pyar ka bharosa hi chahiye me or kuch nhi mangta hu.” Deendyal ji ne kaha, “bhai tum thak gye honge.” Usne kaha, “sache padshah, me to aapke swarup ke sath lo lagakar chala tha, so me to nhi thka, aap hi thake honge.” Garibnawaj has pade. Fir data ji ne puchha, “bta bhai bhajan simran ka kya haal hai?” puchne laga, bta du? Hazur ne kaha, “jarur bta. Mujhe prasan karne wali cheej to bhajan hi hai.” Usne 10 ve darwaje tak haal bayan kiya. Jis samay baba batein kar raha tha us samay bibi lajo, mehta kashmir wale, shadi bhai etc. waha mojud the. Hazur ne prasan hokar uske kandhe par hath rakh use thapthapaya or kaha, “shabash! Jindgi ka labh tumhi ne uthaya hai. Lanat hai unki jindgi ko jinhone kha pee or so kar jindgi bita di.” Bibi Lajo se kaha, “kako, bhai ko aag sekne ke liye do or chaye pilao.” Bibi Lajo bhai ki batein sun bahut prashan ho gyi thi so wo jaldi se angithi, chaye or hazur wale biscuit lai. Hazur haskar kehne lage, “bhai pee lo lajo bibi dyal hai tumhare par.” Usko har cheej me hazur nazar aa rahe the. Veh bechara hath jodkar kehne lga, bibi ji aap kasht na kijiye. Badi bhagywan hai aap jo har samay santo ki sewa darshan karti hai. Bibi Lajo ne chaye or biscuit sache padshah ke pavitra hatho me de diye taki us bhajan premi ko prasad karke de. Deendyal ji ne kaha, “achha bibi. Premiyon ki sewa malik ki sewa hai, me bahut prashan hu, jo tumne is bhai ki khatir ki hai,.” Apni pavitra darishti dalkar hazur data ji ne use chaye biscuit ka prasad diya. Usne sar par rakh, fir sukar kar chaye pee, biscuit kaye. Hazur ne kaha, “ja bhai aaram kar fir bhajan bethna hai.” Veh satya vachan keh kar chala gya. Haur bhi dhyan me leen ho gye or sab premi bhi apni-apni jagah chale gye. Data ji ne pehle darshan diye fir snan aadi kiya. Kehne lage, “bibi bad me nahayenge pehle sangat se mil le. Bechare bachcho ko lekar sardi me khade hai.” Bibi Lajo ne kaha, “jo ichha sache padshah ki.” Kala bagh ki sangat bahut hi premi or hazur ki aagyakari thi. Garib bhi bahut tha. Jidhar hazur ungli kar dete vahi khade rehte the. Hazur kisi ka khate nhi the. Veh bechare, koi shahad, koi banfsha, koi frasbeen, koi aaloo le aate the. Jo kuch veh late the me hazur ke samne le jati thi. Hazur kehne lage, “bibi sab rakh lo, yeh log bahut premi hai, unka dil na todna. Jab jane lagenge sabko paise de jayenge.” Isi prakar 6 din program raha. Chalne se ek din pehle jo naam ke adhikari or premi se mangte the, unhe naam baksha. Ek din pahadi par beth kar koi sawa do so ko naam ki dat bakshi or nihal kiya. Hazur bahut hi shobhagyman lagte the, jo log naam wale bethe the, veh devta se lagte the. Jab hazur ne farmaya, “tum sabko naam de diya, ab hum kal jayenge.” To sari premi sangat yeh sun jar-jar rone lagi or kaha, “satgur shenshah! Aapne itni jaldi kyo chale jana hai. Hamne to abhi ji bhar ke na to darshan kiye, nahi batein ki hai.” Hazur data ji ne farmaya, “aap to premi jeev hai, aapka man to abhi bhi nhi bharega. Bas khub bhajan karo. Hame abhi bda lamba safar karna hai. Sabko tarikhe de rakhi hai.” Jis din hame chalna tha, ek satsangi butasingh, 10-12 chhaliyan (Bhutte) naram-naram le aaya aur kehne laga, “bibi ji me jaldi se bhun lu aap hazur ko ek khila de aur 2-3 hazur ji ki motor me rakh do.” Chalne se 2 ghante pehle sab premiyon ko bithakar cheejo ke rupaye bate, dheeraj dilasha diya. Bhajan ki takid karte hue kehne lage, “bhai or bibiya aap shabad guru ka palla pakdo. Deh to hamari kisi ki bhi nhi rehni hai nahi meri, nahi aapki. Deh to kapda hai, na rehni hai na kisi ki rahi hai.” Sangat prem se ro rahi thi. Itne me butasingh bhun kar chhaliyan le aaya. Data ji us samay kapde pehen kar bilkul chalne ko teyar the, usne towel me lapet kar bibi lajo ke hath me pakda di, bibi lajo dar rahi thi ki bataya to kahi hazur naraz na ho ki ab chalte samay tum chhaliye de rahi ho. So bibi lajo dar se hath me liye khadi rahi. Hazur to antaryami the sab dil ka haal jante the. Kaha, “kako tu dya soch rahi hai, tere hath me chhaliyan to nhi hai? Kyo! Bhai butasingh chhaliyen tum laye ho?” butasingh hath jodkar bola, “jee sache padshah! Aapke liye laya hu.” Hazur mere se bole, “kako tu kyo darti hai.” Bibi lajo ne arj ki, “data ji aap chalne ko teyar khadi the or yeh bahut hi prem se laya tha, so mene na to ise hi jawab diya or na dar se aapse kaha.” Hazur deendyal has kar bole, “kako lao sare khayenge.” Bibi Lajo ne sab unke aage rakh di. Hazur ne kulwantray judge or jo log khade the sabko bati fir bhi 4 chhaliye bach gyi to bibi lajo se kaha, “kako meri motor me lapet kar rakh de main motor me beth kar khaunga.” Us premi ka dil bag-bag ho gya. Jab hazur ji kala bag se chale to kuch dur tak pedal chalna padta tha. Sangat bhi sath thi. Hazaro bibiyan-bhai pechhe-pechhe shabad padte or premi satgur ke viyog me jar-jar roto jate the, bache bude, jawan, sabhi ro rahe the. Raste me ek plot bahut khula sa aaya, vaha par garib nawaj khade ho gye. Sab sangat idhar-udhar khadi thi, beech me satgur bahut hi suhavne lag rahe the. Unke mukhde par noor hi noor tha. Sangat sari prem se behal ho rahi thi. Vaha sangat ne yeh shabad pda. Mere sachcheya guru meharbana Darda da daru de jana Mere sachcheya guru sardara Darda da daru de jana Hazur data ji ne chupchap antardhyan hokar sangat ka premgan suna. Fir farmane lge, “ab bibiyan chali jaye, bachchon ka sath chadai me thak jayengi. Kako! Putra! Aap jao. Me tumse bahut khush hu. Swami ji aap par dya meharbani rakhenge. Putra, bhajan simran karti rehna, malik ka pyar, dar, bharosa, har samay rakhna. Bharose se bhajan me tarakki, pyar se jaldi prapti hogi. Malik ka dar rahene se jeev koi paap nhi kar sakta. Beti, yeh vachan aapke fayde ke liye hai.” Deendyal ji ke vachan sunkar sab bibiyon ne matha teka. Data ji ne sabko pyar dekar vida kiya. Ek bibi damodar ne arj ki, “sachche padshah! Mere koi bachcha nhi hai, me aapko motor par chada kar hi vapis aaungi.” Sachche padshah ne haskar kaha, “jaisi teri ichchha, me kisi ka dil nhi todta.” Jo bibiyan vapis gyi thi veh aagya mankar vapis to chali gyi, lekin thodi hi dur jakar prem vihval ho taktaki bande satguru sachche padshah ki or dekhkar bichhode ke dukh se jar-jar ro rahi thi. Satguru ji bhi unki or haskar dekhkar dya ki barkha kar rahe the. Farmaya, “me in bechariyon se bahut khush hu. Sidhi-sadi ladkiyan hai. Inke dil saf hai, isliye yeh bhajan me jaldi tarkki kar leti hai. Aurto ko jidhar lagao, ekdum udhar hi lag jati hai.” Sachche padshah amrit ki varsha karte, vachan vilas karte hue, chadai ka rasta chad rahe the. Us samay unki umar 27 varsh ki thi. Naam ki barkat, rabi jot sabse aage ja rahi thi. Sachche padshah dheere-dheere chal rahe the or sangat bhag rahi thi, lekin fir bhi sath nhi mil pa rahi thi. Premi sangat ne kaha, “sachche padshah! Jara bethkar dum le le.” Farmane lage, “na bhai me nhi thakta, mene sari naukari pahad hi me ki hai. Mujhe to sangat ki fikar hai, veh na thak gyi ho.” Sangat ne uttar diya, “nhi sachche padshah ji, hum to nhi thake. Hum to aapke dhyan me ja rahe hai, hum chahte he hey malik, rasta lamba ho jave or hum sachche padshah se na bichhde. Sachche padshah thak gye honge.” Hazur ek uchi jagah jakar 19 minutes khade hue. Charo or sangat thi. Sachche padshah ke mukh se noor hi noor baras raha tha. Kaise sundar lagte the, jaise taro me chand, mukh suhana, seb vilayati wala mukh nazar aata tha. Aakhon me rabi jot thi. Jab waha se chalkar motor me sachche padshah virajne lge to us premi ke dil ka hausla badane ke liye bibi lajo se puchha, “kako chhaliyan meri motor me rakh di hai na.” bibi lajo ne uttar diya, “ji sachche padshah! Rakh di hai.” Butasingh satguru ka yeh vachan sun jar-jar rone lga, “dhnay dhnay sachche padshah! Humne teri kadar na jani, par aap hamare dilo ko pehchante hai.” Sachche padshah haskar chup ho gye. Fir kehne lage, “bhai jab sant aate hai to koi kadar nhi karta. Jab chale jate hai tab pachhtate hai. Fir kya bne? Lekin agar koi sachche dil se pachhtava kare to veh bhi bhakti ke hi hisab me aata hai.” Fir sab veero ne aadarpurvak charno me matha nabaya, sachche padshah ne sabke sir par dya mehar bhara pavitra hath rakh kar khushi di or fir sabko bhajan simran ki takid ki. Fir satguru ka dhyan kar motor chala di or bibi lajo se kehne lage, “chad bibiye.! Motor me safar karna hai, pahadi rasta hai.” Bibi lajo ne satya vachan kaha or hazur chal pade. Sangat prem se bharkar motor ki dhul dekh rote hue vapis hui. ............./)( .........../)....( ........./)........( ........(.....)(.....) ..............|..../ ........./..../.... RADHA SOAMI JI…
Posted on: Wed, 31 Jul 2013 07:21:39 +0000
Trending Topics
Recently Viewed Topics
© 2015