Kalay-Kabaw-Gangaw nelrawn i khua a sami Chinmi (Laimi) hna cu kum(80) len khua a sami kan si cang nain, a liam cangmi kum hna ah Laimi pumkhat kan sinak le miphun khat kan sinak hna kan rak i hrawm kho tawn lo. Kan i hrawmkhawm cemnak cu CBA lawng ah a si i kan zate a kan huap kho lo. Laimi miphun khat kan sinak i thei loin khua kan rak saknak a sau ngai cang i, Kan miphun lungput le kan nunphung cu kan rak thlau pah lengmang cang. Tihla bang in kan halmi miphun lungkhatte khuasakti hi kan chunmang lawng nih kan rak manh tawnmi a si. Hiti khua kan sak peng ahcun Kalay-Kabaw-Gangaw um Lami phun kan i thlau dih cang lai tiah Kalay valley ummi kan pa le hna nih khua an rak ruat i, December 2011 ah Chin Funtomnak Bu ( Kalay-Kabaw-Gangaw) timi Bu an rak dirh. Laimi fellowship Bu cheukhat nih an rak doh len ( atu tiang ah) nain a kau lei i khua a ruatmi Bu cu a hmemi Bu nih a thlu kho tak lo. Chin Funtomnak Bu ( Kalay-Kabaw-Gangaw) cu atu tiangah hin Office le riantuannak ding caah a herhmi thil ngei hlah hmanhsehlaw, Laimi phunkhat kan sinak kan thlau lonak ding caah tiin mah le chawva/caan sunglawi hna kaltak in rian a tuan cuahmah lio a si. Khawzei Bu sin hmanh ah bawmhnak a hal bal lo i, a thei cangmi Bu (GCCF, CACC le CBCUSA) hna nih cun CFB riantuan ning a zoh cuahmah lio a si. Atu ah CFB zong miphun ifuntomnak le lungrualnak ding caah dirhmi Bu a si caah, ke khat lawng in dir peng kho ding a si lo caah ramchung/ramleng um Laimi hna he riantuanti ding ah a ke a samh cuahmah lio a si. Laimi nih kan sunsak cemmi puai miphun puai a simi Chin Kum Thar zong Kalay-Kabaw-Gangaw ah rak tuah balmi a si lo. Chun Funtomnak Bu nih hruainak in a voi (1) nak Chin Kum Thar cu October 2012 ah Kyarinn khua ah hlunghlai ngain rak tuah a si i Kalay valley i Laimi minung thong li (4000) renglo nih rak zawh khawh a si. Hi puai tuahnak dingah chawva leiah chambaunak tampi a ngei ko nain, khuami hna nih Laimi phun an dawtnak a lang i tlamtling tein rak tuah khawh a si. CNF kan pa le a simi Dr. Sui Khar, Pu Ral Hnin, Dr. Lian Hmung Sakhong hna zong nih an rak kan telpi khawh. Cu hlei ah CACC kan pa le zong an rak ra kho hna. A Voi (2) Nak Chin Kum Thar zong tukum October 16-20 tiang Kalay valley i Laimi phun khupi pakhat a simi Khampat khua ah tuah ding a si. Chawnva leiah chambaunak tampi a um ko nain Laimi phun dawtnak thinlung cu Kalay-Kabaw-Gangaw Laimi hna cungah a um lai i kan tlam a tling kho te ko lai ti ruahchannak zong kan ngei. Khual lian sawm dingmi hna cu.... (1) Pu Zing Cung (2) Pu Zo Tum Hmung (3) C. Solomon (4) Rev. Dr. C. Duh Kam (CBCUSA) (5) CACC (6) Dr. Hlah Aung (GCCF) (7) Longtlai lei Laimi ( a tlawmbik minung 30) (8) Vuanci Van Thlawng (9) Pu Thang Lian a (10) Pi Za Tlem (11) P. Cung Lian Thawng (Singer) (12) Van Dawt Cin @ Moe Moe Hna hi an si. Pu Zo Tum Hmung, Pu Zing Cung, C. Solomon, Rev. Dr. C. Duh Kam, CACC le Dr. Hlah Aung hna cu sawmnak ca kuat dih an si cang i, Pu Zing Cung, C.Solomon le Dr. Hlah Aung nih cun atu tiang ah lehnak ca an van kua kho rih lo. Hmailei ahcun an van kuat te ko lai ti ruahchannak zong kan ngei. A dang a tangmi hna cu anmah lei zong an um lo caan le an i manh lo caan a si caah sawmnak ca kuat an si rih hna lo. Hi vial hi Chin Funtomnak Bu (Kalay-Kabaw-Gangaw) nih a voi (2) nak Chin Kum Thar tuah ding in saduhthah ai tinhmi a si. Ramchung/ramleng um Laimi zate nih nan rak kan tanpi/ thazang nan rak kan pek cio naklai zong kan in sawm hna. Laimi Phun Lungrualte kan si khawhnak ding caah, Za Bawi Thawng Kalaymyo Kalay –Kabaw-Gangaw Nelrawn Ummi Holh Aa Hrawmmi Laitlai Chin Miphun Alamkip In Thanchonak Kong He Pehtlai In Riantuan Tinak Le Bomhhalnak 1. Kalay-Kabaw -Gangaw nelrawn ummi holh aa hrawmmi kannih Chin miphun hna hi, kan holh kan caa, kan nunphung kan thlau cuahmah lengah, hmunkhatte ah tanrualtinak um loin kanmah le kan Biaknak chungah le miphun fate te tampi kan sinak chungah tanhnak faktuk in a um tawn caah, kan pawngkam ummi hna kan hawi le miphun dang karlak ah, zohchia ngai le kan nunzia hna niamngai in kan ummi hi, Biaknak lei in remhawk le ifuntom awk a that khawh ti lo caah, Khrihfabu kip thleidannak um loin “Chin Funtomnak Bu”(CFB) “Chin Civil Society” tiah min bunh in 2011 kum, December thla ah kan dirh khawh. Kan tinhmi, kan saduhthah le kan tuan khawhmi thil hna cu a tawinak tein a tanglei bantuk in kan hun langhter:- 2. Chin Funtomnak Bu i saduhthahmi rian hna:- (a) Kalay-Kabaw-Gangaw ramchung um Chinmi lungrualnak le hmunkhat ah riantuan tinak, Thanchoternak le Chin miphundang he lungrualnak fehternak (b) Zatlang nun (Social) lei he pehtlai in Kalay-Kabaw-Gangaw ramchung um Chin miphun a lamkip in thanchoternak- Ø Cacawnnak le fimthiamnak lei thanchonak caah ibomhnak Ø Laica, Laiholh thanchonak le fehternak Ø Mizapi kha an caah thiltha hngalhternak le tuanternak Ø Miphun le ram caah hmanawktlakmi minung sersiamnak. Ø Laimi nih kan herhmi zatlang(Social)lei thiltha le kan covo kha haltinak le runventinak Ø Laimi nih kan tonmi hmuhkhin(Legal case) le thilbuai kong he pehtlai in i tanpinak (c) Lai nunphung le nunzia dawh thanchoternak. (d) Buchungmi karah ihawikomhnak le pehtlaihnak thanchoternak. Tahchunnak ah-(a) Bawllung chuihnak,(b) Chin Kum Thar puai tuahnak (e) Remnak le miphun damnak rian tuantinak. (f) Vanchiat rawhralnak (Natural Disaster)a tongmi hna kha a bu in bomhnak 3. Kum khat le cheu chungah tuan khawhmi rian hna cu a tang lei bantuk in an si :- (a) Chin Kum Thar kan tuah kho (b) Laitlai khuate (13)Bawllung puai kan tuahpiak hna (c) Laica cawnnak CACC he i bawm in hmun (17) ah kan tuah kho (d) Laiholh tein The Chin Time Journal thlakhat ah voi hnih in (28)nak tiang kan chuah khawh. (e) Khua kip le sang kip Committee (30) tiang kan dirh khawh. (f) CACC (Silver Jubilee) Hakha ah CFB nih Lai nunphung in laamnak kan ngeihpiak khawh hna. (g) Gangaw peng Daidin khua ah Miphun funtomnak kong cawnpiaknak le Lai nunphung laampiaknak kan ngeih khawh hna. (h) Gangaw peng Laimi (22) hrawng he ipehtlainak le riantuantinak, kan holh, kan caa, kan nunphung kilvengtinak ding caah kan tawlrel cuahmah lio a si. (i) Ramleng/ramchung ummi Laimi kan upa te hna he CFB riantuannak kong biaruahtinak le ruahnak halnak le bomhhalnak zong kan ngei kho lengmang. (j) Global Chin Conference (Malaysia) ah Delegate pakhat kan thlah khawh i GCCF he pehtlaihnak kan ngei kho. (k) Mizoram Lawngtlai Khrihfabu he pehtlainak kan ngei kho. 4. Tuanding rian hna:- (a) Kan i tinhmi rian hna tuanding le tuanciami rian hna kumchiar pehzulh khawh ding in kan i tim. Tahchunnak:-Laica cawnnak, nunphung cawnnak, bawllung puai, Chin Kum Thar ... tbk.. (b) Tinhmi rian a tlam a tlin khawhnak ding caah ramleng hawikom hna, bu hna he ipehtlaihnak le bomhhalnak rian (c) Ramchung bochanawk tlakmi hna sinah bomhhalnak le ipehtlahnak rian. 5. Herh mi thilhna:- (a) Chiatnak ton tikah Laitlang lei le Kalay-Kabaw-Gangaw i a ummi kan miphun hawi hna tawlrelpinak ah Mawtaw pakhat kan herh ngai ko (b) Fimthiamnak le caa le holh i thanpinak ding caah The Chin Times jounal pehzulh tein kan chuah khawh nakhnga Computer, Printer, Copier te hna kan herh ngai ko. (c) Nihlawh/thlahlawh pek in caantling riantuantu Staff chiahkhawhnak ding caah phaisa thazaang kan herh ngai ko. (d)CFB zung hlannak caah phaisa kan herh ngai ko. (e)CFB a thancho khawhnak ding caah ruahnak peknak tampi kan herh ngai ko. (f) A dangdang riantuan khawhnak ding caah phaisa thazaang tampi kan bau ngaingai ko rih. Acung lei bang in a si caah CFB ,Kalay –Kabaw-Gangaw nelrawn ah a ummi holh aa hrawmmi Laitlai, Chin miphun al amkip in a thancho khawhnak ding caah, ramchung/ramleng in thimmi upa hna, Khrihfabu hna le Civi Society hna nih chawva in siseh, thinlung ruahnak cheuhnak in siseh bomh le tanpiawk ah upatnak he zaangfah kan nin nawl hna. CHIN FUNTOMHNAK BU (CFB) OFFICERS COUNCIL (0C) PAWL President - Pu Enoch (096472139) Vice President (1) - Dr Sang Hlei (09400308881) Vice President (2) - Pu Steven Tha Bik (0943010126) Secretary - Pu Chan Lian (22595) Asst Secretary (1) - Pastor Siang Bawi (0947080322) Asst Secretary (2) - Pu Cung Nawl (22004120) Treasurer - Pu Thang Zung Assist Treasurer - Pu Ma Naw (09400308915) Members - (1) Pu Tun Naing, (2) Pu Phun Ceu (3) Saya Lian Cung
Posted on: Sun, 11 Aug 2013 16:30:47 +0000
Recently Viewed Topics
© 2015