Kan sorkar sum dinhmun siamthat dan tur awlsam takin an han sawi ang a. Kan leibat chu a vaibelchhe zabiin min han hrilh zuah zuah ang a. Chumi chinfel ngaih thu chu kan hria ang a, kum nga hnuah a lo pung ang a, a bat belhtuten a hmaa mite thiam lohvah an puh ang a. Keinin kan inhnuai chei mamna tur cheng nuai hnih khat pawh kan neih loh laiin vaibelchhe chungchang kan ngaithla leh ang. Kan tihtur awm ve miah lo, kan tih theih awm bawk lo chungchang min hrilh hrep ang a. Lo sorkar mah se kan leiba chu a tlahniam chuang lovang. Kuthnathawktute changkanna tur scheme lianpui, vaibelchhe tam tak hmanga siamthatna tur an sawi leh ang a. Chu Scheme hnuaiah chuan Mizoram kuthnathawktute chu an hlawk ang a, an ding chhuak ur ur dawn angin an sawi ang. Mahse a semdan thuah an fimkhur leh lo ang a, vawilehkhata mi harsa tam tak, za chuang te, sang chuang te chawikan thut dan hi a awm a nih pawhin khawvelin a la hre chhuak lo a nih hmel a, mahse keini chuan kan theih kan la inring - zu khap rem theih ang bawkin. Mizo hnam tihdan leh hnam zia te leh kan ram humhalh a tulzia te an sawi leh ang a. Mahse Pawlkut te, Mimkut te thlauthlain Anthurium kut te, Vangpui kut te kan hmang leh ang. Vairengte thlanga kan ramri anga lang, a phaikin chin leh a tlangram chin takngialah pawh tan khawh ngam lovin chhak feah Assam Police te lo ding mahse buaina duh loh hmachhuanin kan dawh leh mai mai ang. Thalai hmasawnna kan ngai pawimawh ang a, mahse fair taka hna lak chu a awm leh chuang lovang. Sawipuitu nei tha apiang lak an ni leh bawk ang. ACB te an chak leh tak tak lovang a, Entrepreneur taima leh tumna nei te tanpuina dan a awm lovang a, pawisa hmang dik lo te pawh hrem mumal tak tak an ni leh lovang. Kan kalphung ngai rengin kan kal ang em aw?
Posted on: Wed, 30 Oct 2013 07:42:28 +0000