Komunikadu Imprensa 27 Juñu 2013 “Julgamentu Justu no Direítu ba Rekursu” Semináriu Nasionál iha 28 Juñu 2013- iha Delta Nova-Dili Iha 28 Juñu 2013 JSMP sei halo Semináriu Nasionál ho tema sentrál kona-ba “Julgamentu Justu no Direítu ba Rekursu” no sub titulu Julgamentu Justu & Papél Tribunál Rekursu iha Timor Leste. Semináriu ne’e ho nia alvu mak estudante direítu universitáriu sira iha Timor Leste inklui parseriu xave sira setór justisa. Alvu ne’ebé mai husi estudante universitáriu sira ne’e eskolla ho objetivu atu sira bele kontinua habelar/hatutan informasaun sira ne’ebé sira hetan durante semináriu ne’e ba sira nia soseidade ne’ebé sira partensia ba. Tuir Konstituisaun, Timor Leste iha komitmentu maka’as ba padraun direítus umanus internasionál no Estadu ne’ebé tuir Lei. Sistema judisiáriu ida ne’ebé independente no imparsiál mak sei asegura no mantein Estadu tuir Lei. “Julgamentu ne’ebé justu nu’udar direítu ema hotu nian no hanesan xave importante ba Estadu ne’ebé tuir Lei. Parte ruma ne’ebé iha problema ka disputa ruma iha direítu ba hetan julgamentu ne’ebé justu hosi tribunál ”, dehan Direítor Ezekutivu JSMP Luis de Oliveira Sampaio. JSMP kompriende katak nu’udar nasaun joven, Timor Leste kontinua hasoru dezafiu oi-oin iha sistema judisiáriu. Mesmu nune’e, JSMP enkoraza nafatin entidades judisiál tomak atu bele kontinua dezenvolve sistema judisiáriu ida ne’ebé transparante no efikaz, no fornese asesu justisa ba ema hotu. Hanesan nasaun joven, Timor Leste iha esperiénsia mós ba dezafiu lubuk ida kona-ba funsionamentu sistema judisiáriu ne’ebé fó impaktu ba direítu atu hetan julgamentu justu. Impaktu hirak ne’e bele mai husi órgaun justisa rasik tanba la iha rekursu ne’ebé natoon. Impaktu seluk bele mai mós husi órgaun seluk iha judisiáru liur ne’ebé sente iha kompeténsia atu bele determina kazu balun (interferénsia) hodi nune’e bele mós fó impaktu ba iha prosesu rekursu ne’ebé parte sira halo ba sira nia kazu. Tanba ne’e, ho orgullu tebes JSMP halo semináriu nasionál ida ne’e atu nune’e bele klarifika buat balun ne’ebé durante ne’e sai hanesan polémika no bele fó roman ba ema hotu iha asuntu ne’e. Semináriu Nasionál ne’e sei konvida entidades sira hanesan Ministériu Justisa, Tribunál, Prokurador Jéral Repúblika, Defensória Públiku, Amnesty International, PDHJ, reprezentante Akadémiku no reprezentante husi Sosiedade Sivíl. Semináriu Nasionál ne’e realiza ho suporta husi The United Nations Democracy Fund (UNDEF). Atu hetan informasaun kle’an liután favór kontaktu: Luis de Oliveira Sampaio Diretór Ezekutivu JSMP Diresaun e-mail: [email protected] [email protected] Telefone: 3323883 | 77295795 Website: jsmp.tl Facebook: facebook/timorleste.jsmp Twitter: @JSMPtl
Posted on: Thu, 27 Jun 2013 05:35:44 +0000
Trending Topics
Recently Viewed Topics
© 2015