Kon alegre bo ta den bo bida? Pa tristu ku e por zona, tin masha hopi hende ku ta kere firmemente ku kana kaminda di Dios ta igual na tene belorio. Nan ta kere ku biba segun Su boluntat ta nifiká eliminá tur sentido di humor, ta seku i sobrio den manera ku nan ta trata nan próhimo.Un aktitut di bida ku den realidat no tin nada di haber ku Dios, sino mas bien un shou pa otronan mira. Tin hopi ku ta biba konvensí tambe ku alegria, harimentu i ser kontentu no ta kos ku ta bini di Dios, no ta un kos divino. Nan por bai dje leu ei di bisa ku esun ku ta hari òf ta kontentu, ta pasobra un djis e ta yora. Ku otro palabra, ser kontentu i alegre ta loke ta yama ‘kastigu di Dios”. Un di e tragedianan di humanidat ta su kreensha ku Dios ta un poder dual, esta dos poder den unu, un Dios di amor ku alabes ta un Dios di kastigu. E pensamentu totalmente eróneo aki, pa siglo i siglonan a hasi di hende sernan spiritualmente dof, ku no ta den kondishon pa ‘claim’ nan derecho divino komo kreashon di un Dios ku ta stima nan. Realidat ta ku un Dios di amor inkondishonal, hamas por ta un Dios ku ta kastigá! Tur kos den universo ku ta kontradesí su mes, ta kanselá su mes. Dios, por lo tantu, hamas por stòp di eksistí, pues E hamas ta kontradesí Su mes. Prueba ku Dios a krea nos pa gosa di alegria ta palabranan di Kristu Hesus den Huan 16:24: “Pidi den mi nòmber i boso lo haña, ya asina boso alegria lo ta kompleto”. Ora bo ta alegre, kontentu i yena ku dicha, gradisí Dios p’esei pasobra ta E a generá e sentimentu ei den bo. Sa ku alegria, meskos ku amor, goso, pas, pasenshi, amabilidat, bondat i fieldat ta sentimentunan ku Spiritu di Dios ta generá den hende. Hasi loke Salmo 32: 11 ta bisabu: Alegrá bo mes den Señor i sea kontentu bosnan ku ta hustu; Kanta ku bos di hubilo, bosnan ku ta hustu di kurason. (Loke ami a siña di bida)
Posted on: Wed, 03 Jul 2013 02:52:41 +0000
Trending Topics
Recently Viewed Topics
© 2015