Kuerpo Polisial ta hasi un último yamada na tur hende ku tin un vehíkulo pará riba tereno di Polis na Rio Canario pa pasa hasi trámite pa tuma nan vehíkulo bai ku n’e ya ku Polis ta limpiando su terenonan. E último chèns aki lo ta di djamars 17 pa djaweps 19 di sèptèmber 2013. Riba e dianan aki lo entregá na e doñonan: vehíkulonan ku tabata envolví den un aksidente di outo i ku tin mas ku un (1) luna pará riba e terenonan di polis; vehíkulonan ku a wòrdu kitá pa polis pa motibu ku e vehíkulo tabata falta un ke otro dokumento. Den e kaso aki polis lo evaluá huntu ke doño bou di kual kondishonnan e lo por haña e vehíkulo bai ku n’e. Ta dependé por ehèmpel ku e doño ta bai drecha e vehíkulo, areglá tur su papelnan nesesario p’e vehíkulo kore bèk despues o e doño ta disidí di bendé òf di distansiá su mes for dje vehíkulo. Tin sierto dje vehíkulonan aki ku lo wòrdu traspasá pa “Kurá” wardando e doño regla su papelnan. Tene kuenta ku na kurá si e doño mester paga pa kada dia ku e vehíkulo para eiden. Tene kuenta ku pa dia Beveiliging na porta lo parti maksimal 15 number i e funkshonarionan Anches i Schorea ta atendé solamente e 15 personanan ei entre 8.30 pa 10.30, pasobra mester di tempu pa wak tur detaye dje vehíkulo. E doño ta obligá di bai ke vehíkulo riba un kran, eksepto si e vehíkulo ta den bon estado p’e por kore i tur su papelnan ta na òrdu . Polis ta rekomendá e doñonan dje vehíkulonan pa usa mesun kran ku a trese e vehíkulo n’e terenonan na Rio Canario. Si e doño tin debe n’e kran ei, tambe e tin ku kumpli ku esei. Vehíkulonan ku ta tumá den beslag pa un òf otro motibu di krímen lo no wòrdu atendé ainda. Pues pa eseinan no molestiá bini aworakí ainda. Doñonan di vehíkulo tin nada di paga polis pa e dianan ku e vehíkulo a para riba e tereno di polis, solamente ta paga e kran ku a trese e vehíkulo i esun ku ta bai kuné awor. Polis ta atvertí tur hende ku despues di dia 20 di sèptèmber Polis no ta responsabel mas pa vehíkulonan ku doñonan no a bin buska i lo deshasí di esakinan pa medio di “crush”. Den kaso ku duna un doño su vehíkulo i polis topa esaki atrobe riba kaya sin ku e doño a regla por ehèmpel dokumentonan, e vehíkulo aki lo wòrdu hibá derechitu kurá pa wòrdu di “crush”.
Posted on: Fri, 13 Sep 2013 01:50:31 +0000