LITERATURE Kei hi Literature-a mi thûk lo ber, mi ril phei chu sawi loh, Literature-a ka páwnlànzia hi a thûk vawng vawng hle a ni. Chutiang mi ka ni chung chuan Literature ka hmuh dan leh ka thlîr dan tlêm han tàr lan ve ka duh a ni! Literature hi, “Chemtâtrâwta’n Kaikuang tilah a chehsak pawh a remin a leng vek,” tih vêl kual ang mai mai; thil a dikna awm sâ pâwngsual kualna mai mai, facts leh truth kalha suangtuahna leh zêldin thil buaipuina huang satliah ngawt a nih chuan, kei chuan buaipui leh thu tak khûka khûkpui tlâkah ka ngai lo. Vawiin khawvêl, Shakespeare-a thû leh hla aia Mark Zuckerberg-a awká kan ngaihchan tawh zâwknaah hian; kan Ziak mi leh Literature lipuia liluh chin, a nâk zen chinte hian, hnam hmakhua leh hma bâk ngaiin Literature belh chian tlâk leh a tak rama chantîr theih, suangtuahna rama tham ral mai mai tur chi ni lo; tisa, rilru leh thlarauva hma kan sâwn theihna tur Literature țha min hlui țhîn se, kan hnam tân káwl a van êng lehzual dáwn êm. “Literature hian facts zawn chhuah hi a tum ber a ni lo,” an ti țhîn; mahse, facts erawh Literature zâr pêng pawimawh tak pakhat a ni thung. Mizo hnam—hman ni lawka thawnthu nuihzatthlâk tak tak hmanga inawm tlei inhlàn chhâwng țhîn—hian Literature chhût chet leh kèu chet chet dâwl kan mamawh a ni. Literature hi mihring nun siam țhatna, kawng dik kawhhmuhna leh zirtîrna țha pêk chhuah nâna hmanrua țha tak a ni a. A huang leh a kuang hi zauvin, thil tam tak huam mah se, kan Literature ngaihsàn leh ngaihhlut azir zêl hian kan hnam hmakhua hi a êngin a thim thei a ni. Literature lipuia zuang lût rau rau Pu Vanneihtluanga leh Mafaa Hauhnar te kuang, thu sûkthlêk leh kalhmang chu inang lo leh inpersan tak a ni. Kei chuan thumal leh thumal inbuan let satliah, lunglèn leh luanliamna, mihring nun kawng atâna zir tur leh zawm tur awm lêm lo thu chheh màm màwi naran ngawt ai chuan; nun țha, kawng dik leh kawng țha inkawhhmuha inzirtîrna, mimal mai ni lo khawtlâng, ram leh hnam tâna hma lam pan theihna thuchah keng Literature hi kan hnam mamawh niin ka hre țhîn. Literature hian pêng hrang hrang a nei a; kan Literature buaipui azir zêlin mimal, chhûngkua, khawtláng leh ram dinhmun a awm fo țhîn tih hriat reng a va’n pawimawh êm!
Posted on: Sat, 24 Jan 2015 05:48:07 +0000
Trending Topics
Recently Viewed Topics
© 2015