MITTHLA A LANG HLIMTHLA (CFL-A NGHILHLOH NAN) (Re-post) Beiseina hian min tinui thei a. Min kawm hlim viau thin. Chu Beiseina chu engvang pawha lo awm thei a ni a. A bikin Nulat/Tlangval inngaihzawnna boruakah phei chuan a sosang thei ve viau mai. Engnge maw ti tak a ka sangawi zawnpui, thu, hlaa chantir thiamzet mai. CFL HMINGTHANGA hi ka thurualpui leh fo thin. A hmangaih, chumi kha mi hunah chuan Kan chun leh Zuate i bia ila; Rùn hmun lendun zai i rel ang aw.. tia, beiseina nen a chu Kawleng a lo nghahpui ve thin chu, a duhthusam nen a va pan ruak ruak a. Chu a zinkawngah chuan, Sikni ianga khello ten maw, Hun leh Ni kan tiam vawng zelin; Chun leh Zuaten min tuahrema, Runhmuna nangnen kan lendun ve hun chuan, Silhpuannem zawnin ka tangan: I bahsam chul leng siau siauin, Tawnmang ram nuama, chèn thlengin ka pawm nang che. Chu zinkawng chu duhthusam nen a han zawh tluang zel a. A hmangaih-i chu a mutthilh hma pawm vawng vawnga, chul heuh heuh tura inhuam ran chungin a Hmangaih-i te vangkhua chu a Arkhaw thim dai luh ve ta hmiah mai. Mikhual inthleng thei a ngem? tia a hriat ngai pawh ni hauh lo te kawngkapui ava kik dùk dùk laite chuan, Khawii laiah nge an in a awm ang? Zanin hian ka lèng lut rawih ang nge, Naktuk lamah zawk?? a ti rilru nauh nauh a. Min rawn tiam ang khan keichuan e, Mualzapui kardan atangin ka rawn pan che, In vangkhuaah; Ka hriatloh Zuapa rùn In chhungbelin maw! Biahthu Lèngtin kan sep dun a. Kawplai Di nei zawng hrilh chhuakin, I hmangaih ber pawn thai a chang min lo ti. Khualtha na nà na, Mizo khua ni bawk si-ah chuan thlen In tur a vai lo. A lut ve ta rawih mai le. Zan riah an han eikham a. Mei te zuin Pa ber nen chuan Thu khat an vaw dun ta melh melh mai. Nula hnahkhat, zawnglai chu chu mi kha mi chu an ni a. Chu Nula chu chutiang mizepù chu a ni, Mahse, chu mi kha mi chu Kawplai/Pawmlai nei a ni tawh a, tih thleng rak an sawi hnu chuan; Zep nak emaw, ankhuaa a zin chhan chu a bul atanga a tawp thleng rak a hrilh ve ta rawt mai a. Mahse, chu a Hmangaih-i chu Mita a ni tawh tih thu a thlenin pa in a hrilh chu awih loh chi a ni silo. A mit sulh a, sawi tur reng reng a hre mawlh lo. A khà a chih a. A leili te chuan hna a thawk tawh lo emaw tih mai tur khawp in Hmangaihna avanga hlim veng veng thin khan chham chhuah tur a hre tawh mawlh lo. An In lamah han haw leh sela, Tlangval Ranngo zawnga chhuak ve lèm, siruk la-in a haw ngei turah a chhungten an lo ngai si anga. Engtin nge a Nu leh Pa te bulah Report a pek tak ang le? A mah hrim hrim pawn a tuarzo a ngem? Lo tuarzo tehreng pawh nise, a tuarthiam kher lovang. Thlafam chang suntu iangin maw! Mahriaktea lamang letin, Biangah luaithli a lo luang a. Aw, athui ngei e. Lamang letna lamtluang; Kan Rùn lawi leh pawh ka zuam lo, Chun leh Zua engtin hrilh ang maw? A na lua ka ti, ka tuar chhuak zo long e. He hringnun hian Hmangaih a pe a. Mahse, chu Hmangaihna chuan a va diriam si em! Chu lamtluang, phur fahrana a lo zawh tak lamtluangah ngei khan, thihna avanga lusuntu ang mai MITTUI nen a kir leh ta hnak hnak a. Mahse, a phur lo kher mai. Chu lamtluang chu thui ta sawt te hian a hria a. Chuti chung pawh chuan an Rùn thlen hlan a nghakhlel mawlh lo. An khaw dai, chawlh hmuntlangah chuan thu in, a han hui-ha pap pap a. A beiseina chuti maia a han tlawlh ta chu lungawi har a va han ti tehlul em! Mahse, a demawm chuang silo. Mitthlaa lang hlimthla mai zawk em lo ni le? Ka thai changlo tur chuan, ka phal thei mawlh lo che. Han dawn ve thin che maw, nangnena kan tiamthudi?? Suihlungrualteakan lendun lai zawngte..! A beiseina piahlam ram, a duhthusam ni hauh lo kha a chantawk a ni miau a. Midang tana a phalloh a Duhlai Lèngi chu a phalloh midang ta a ni ta si. Dawn lem a nei lova, a chavai a. Hmangaihna meuh pawh a ringhlel hial mai. Rinawmnate hi a thu chauh nin a hre rum rum a. A nunin a tawn chu Phatsanna zawk a ni tlat sia lawm le! Keipawh nang iang hian maw CFL, hmangaihna avang hian ka na ve thin a. Tuarna phena Malsawmna dawng turin ka bei ve thin a sin. Mahse maw, atawpah chuan A mak, a na ka ti leh thin si zawng a nih hi..! Aw, he hringnun zet hi chu hriatthiam ahar teh e, tiraw? (Post leh Pic a inmil chiah lo mai thei, sawisel mai lovah ti ang aw :D )
Posted on: Mon, 28 Jul 2014 03:22:45 +0000
Trending Topics
Recently Viewed Topics
© 2015