MIZORAM CHRISTIAN MP LEH HINDU FIRFIAKTE Dec 25 PM hlui Shri Atal Behari Vajpayee-a piancham. In hria nge hre lo ka hre lova kan Lok Sabha MP Pu C.L.Ruala hi Krismas nia piang ve bawk a ni a. BJP chu kan hre vek a. An support base chu firfiak tak an ni. Zep emaw thup theih a ni lova. Anmahni phei chu an in thup lo hle tih tun hnaia an pawl hrang hrang hruaitute tawngkam chhuak atangin kan hre theuh awm e. Kan Lok Sabha MP hian MP inthlan campaign lai khan thuchhuah a siam a. Chutah chuan sakhaw khawi thil heti hian a inziak a: “…Tunah hian India ram hmun hrang hranga Kristian te chuan Communal Force BJP kaihhruai a Sorkar loh nan nasa takin an tawngtai a... Pu Rualan heng Kristiante tawngtai a tih hi chiang fakin sawi tur a hre lo nain a en letin thu diklo hul hual a ni lovin a lang. Tin, Vanglaini phek hmaa campaign thlalak ah sakhaw tih bik nei party hlau tura ziak kha kan hmu bawk a. Khatih hun lai khan tuna Hindu rum rut hovin boruak an siam hi burning issue a ni lova, UPA sorkar corruption nasa lutuk leh rorel fello lutuk paihthlaka sorkar tha neih lam a ni tih kan hre theuh awm e. Amaherawhchu, UPA lam candidate atangin khatiang lam sawi a awm meuh lova. Sakhuana lam an vawrh nasa hle a nih kha. BJP hi sawi tawh ang khan an base chu Hindu ruh tak tak an ni. Kan PM hi a PM hmaa a tawngkam te leh a thil tih leh thil tihloh te en chuan Sonia Gandhi-in death merchant a tih te pawh kha thil awm lo niin a lang lo. Amaherawhchu, PM hlui Vajpayee anga ram rorelna lam a focus tha dawn a nih chuan a nunhlui hi mipuiin an theihnghilh ve tial tial a rinawm. MP inthlan lai khan Pa Ruala campaign thu hla (Vanglaini ami) kha India ram pum enin a fuh lo ka tih vangin ka sawi sel a. Amah ni lovin. A chhungte (ka chhungte) thenkhat chu an lo thinrim hle. Campaign laia amah leh a campaign pui ten an au chhuah pui Hindu kulmuk ho rilru hlauhawm tih chungchang hi tunah beih let ngei ngei ngaiin kan hmu a. Kristian ni lo opposition party dang te chuan BJP kaihhruai sorkar hi an dem hle. Accountability siam sak an tum tak zet. A theihna apiangah heng Hindu firfiak hote chet dan a diklohzia leh India ram dintute vision kalh a nih thu te, minority te rahbehna a nih thu te leh ram chhung mipui te inkara hem thlaktu an nih thu te an auchhuahpui nasa hle. Mizoram mipui zawng zawng leh Tripura transit camp-a Bru te aiawha MP kan neih Pu Ruala hian Hindu firfiak ten BJP kaihhruaina hnuaia an che na hi inthlan campaign laia a au chhuahpui ang khan kan zavaia aiawhin a au chhuah pui nasat lehzual a pawimawh. A staff ten Facebook account te hi siamsak se, khawvel hriata Mizo mipui aiawha kan ngaihdan te hi a auchhuahpui a tul hle. Twitter account te pawh hawngin a zau thei ang berin kan MP hian hma a lak a ngai. Engmah tilo chu a ni lovanga, mahse he issue serious tak kan tawh mek laia kan MP in hma a lakna hi Mizo mipui ten kan hriat a pawimawh hle a ni. Chutiang tur atan pawh chuan kan phut ngam tur a ni ang. Kan MP hian a birthday ah hian zirlaiten essay ziaka hun an hman nge tha a tih khawvel chhandam tura lo piang Isua Krista chanchin ngaihtuaha hun an hman tih te hi zawhna lian tak a ni. Dec 25 chungchangah hian kan MP official statement hi a awm a nih chuan mipui vantlang hian kan hmu lo phawt chu a ni a. Kristian state anga inchhal state MP auchhuahna hun tak a ni e. Au chhuak turin engmahin a dal lo. Hindu firfiak hovin an sakhuaa inleh letna chungchanga an hmalakna leh sorkar ber a ngawi titih ringawt phei hi chu MP hian na takin a tawngchhuak ngei ngei tur a ni ang. Ngawih chuhna hun niin a lang tlat lo. He thilah hian Mizo zawng zawng, Chakma leh Bru te pawn Pu Ruala hi kan thlawp ngei ang.
Posted on: Sun, 21 Dec 2014 23:38:59 +0000
Trending Topics
Recently Viewed Topics
© 2015