MIZORAM DEMOCRATIC ALLIANCE IN SORKARNA AN SIAM NGEI AN INRING (28/11/2013) Mizoram Democratic Alliance (MDA) chuan, Mizoram inthlanpui neih zawh takah sorkar an siam theih ngei an rin thu an sawi. Hetih lai hian, MNF chuan, electronic voting machine (EVM) chu rin tak tak harsa an la tih thu an sawi. MDA-te hian nimin khan Hnam Runah thuthar thehdarhtute an kâwm a; MDA election campaign chairman, K Vanlalauva chuan, inthlan laia mipui sûkthlêk dan hrethiam bik sorkar mithiamte thu rawlhrûk aṭangtea an chhûtin, Pathian leh mipui zarah sorkarna an chang ngei dawn nia an hriat thu a sawi a, Kan thu dawnte hian vote chhiar hun pawh mi tinghakhlel hle a ni, a ti. K Vanlalauva chuan, sorkarna an chang a nih chuan, mipuite chhawr tlak, taima leh mi dikte din channa, ṭhalaite dinhmun ṭha leh Zofate leh Kristian sakhaw himna sorkar an siam ngei ang tih an intiam thu a sawi. Inthlan campaign chhung leh vote thlak zawh tawh hnu thleng pawhin party ṭhenkhat hruaituten ṭawngkam mawi lo leh hawihhâwm lo tak an la cheh khum thu sawiin, K Vanlalauva chuan, Ṭawngkam mawi lo tak tak an dawng chunga ṭawngkam mawi lo hmang let ve ngai lo hruaitu kan nei hi lawmawm kan ti hle a ni, a ti a; an party worker-te pawhin inchirhthehna politics an kal kân tawh niin a sawi. K Vanlalauva chuan, inthlan neih zawh takah thil duhawm lo lian tham a thlen loh thu sawiin, Boruak muanawm lo lek lekten min tlakbuak karah harsatna lian tham awm loa inthlan kan zo thei hi NGO te, sorkar hnathawkte leh mipuite inpekna rah a ni. He kan ram leh hnam himna tiderthawng thei, eng thil pawh lungrual taka do zel turin mipuite kan sawm a ni, a ti. Zawhna chhangin, MNF party hruaitute chuan, EVM chu an rin tâwk loh thu hmun hrang hrangah an thlen avangin VVPAT siam a nih thu an sawi a, Rin tak tak chu a harsa a ni. Mahse, beisei aiin sawiselna a tlem a, chu chuan min tithlamuang deuh, an ti a; strong room aṭanga tihchingpen tum an awm em tih an vil reng tur thu an sawi. MDA hruaitute sawi danin, Lawngtlai West constituency-a Chhemdurtlanga polling booth pakhata EVM chu vote thlak zawh a ni veleh presiding officer-in chàr (seal) loin Lawngtlai a panpui a, strong room pan loin PWD IB-ah a chàr chauh a ni. Hemi chungchangah hian election observer ngenna angin vote thlak hun MDA-te chuan nghah phawt a, vote tla 251 leh EVM a lo inmil lo a nih chuan a ṭul anga hmalak an tum a ni.
Posted on: Thu, 28 Nov 2013 03:04:17 +0000
Trending Topics
Recently Viewed Topics
© 2015