MORNING REPORT : 02.11.2013 INRINNI (Zonet Zing Daifim, 7:30 a.m.) Police Report : Tukin hian kan biak thin pangngai Police Station 12 leh Out Post 1 te chu kan be kim thei a. Kan hriat theih chinah Mizoram chhung bikah chuan nizan lamah thil thleng duhawm lo sawi tham a awm lova. Lock Up ruak 4 a awm a ni. Nizan chu Bawngkawn Police Station ten tang an ngah ber a, mipa 6 leh hmeichhia 4 kawlin a tam zawk hi khawlaia zurui chunga an intihbuai vanga ‘Khawm’ an ni a, an zinga mipa 2 chu rukrua rinhlelh an ni. Aizawl Police Station ah tang mipa 6 kawlin Traffic case leh Khawm case a man an ni hlawm a. Vairengte Police Station ah mipa 3 leh hmeichhia 1 kawlin rinhlelh man leh khawm case a man an ni hlawm a. Vaivakawn PS ah rukruk thila rinhlelh man mipa 3 kawlin Lunglei PS ah mipa 3, zuruih vanga man 2 leh rinhlelh man 1 te an kawl a. Lawngtlai PS ah zuruih vanga man mipa 2 an kawl a; Kulikawn PS ten Champhai PS case nei mipa 1 manin tukinah Champhai Police ten an la a. Champhai PS ah rukrua rinhlelh man mipa 1 kawlin Saiha PS ah rukrua rinhlelh man mipa 1 an kawl. Traffic Report : Nimina Aizawl a Traffic Rules bawhchhia man zat : Two Wheeler 8, LMV 14, Taxi 8, HMV 3, fine tlingkhawm Rs. 5,450/- Excise Report : Aizawl District Excise ten nimin khan Tuirial ramah zu bilhlai tin 1780 tichhiain rakzu litre370 leh dawidim kg 10 an man a, Lock Up ah tang mipa 2 an kawl a ni. Hospital Report : Nimin tlai dar 5 atanga tukin dar 7 thleng khan Aizawl Civil Hospital Casualty ah emergency case 77 an nei a, mitthi 1 a awm a. Nizana Civil Hospital pantu zingah hian pumna leh naute kawthalo luak leh hritlang awmna an tam hle a, lirtheia chetsualna lama hliam nei an thahnem leh hle bawk. OD mipa 2 an hruaite chu an lo chhan thei a; zurui medical 10 chuang an awm bawk. Khum ruak a awm lo mai ni lovin corridor leh a tuala mut theihna pawh a full hneh hle. Labour Room ah nau piang 14 awmin mipa 7 leh hmeichhia 6 an ni a, an zinga mipa 5 leh hmeichhia 1 chu zai chhuah an ni a, vawiina nei tur 9 an awm bawk. Synod Hospital Durtlang ah nizan khan emergency case 17 neiin heng zinga 11 chu admit an ni a, mitthi 1 an nei a; nizana Synod Hospital pantu zingah hian naupang khawsik Awmna an tam hle a, naupang hi anmahni ward a an full vek bakah ortho leh eye ward ah te pawh an dah tam hle. Ward thenkhatah khum ruak tlem an nei a Lawmna Ward ah nau piang mipa 2 awmin vawiina nei tuer 2 an awm bawk. Kulikawn Hospital ah mitthi 1 leh nau piang 1 an nei a; Aizawl Hospital ah mitthi 1 neiin Cabin an full a. New Life Hospitalah nau piang 2 neiin khum an full a. Greenwood Hospital ah te, Care Hospital leh Alpha Hospital ah te khum an full a. Bethesda Hospital ah te, Nazareth Hospital Ramhlun North ah te, Grace Nursing Home ah te Cabin an full a. Lunglei Civil Hospital ah nizan khan emergency case 20 neiin nau piang 2 an awm a, khum an full a ni. Power : SLDC atanga thu kan dawn danin nizan dar 6 a phai lam atanga power kan hmuh tam lai berin 69.34 MW kan hmu a, tualchhunga siam chhuah 10.76 MW nen kan hman zawng zawng 80.08 MW a ni a. Load shedding siam lovin eng pek theihna chinah chuan an pe kim a, line chhia report a awm lo a ni.
Posted on: Sat, 02 Nov 2013 03:27:03 +0000
Trending Topics
Recently Viewed Topics
© 2015