MORNING REPORT : 25.9.2013 NILAINI (Zonet Zing Daifim, 7:30 a.m.) Police Report : Tukin hian Champhai, Kolasib, Mamit leh Vairengte Police Station te kan be thei lova. Kan hriat theih chinah chuan nizan lamah thil thleng duhawm lo sawi tham a awm lova, Lock Up ruak 4 a awm a ni. Aizawl Police Station ah tang mipa 10 neiin zurui, kawngsira buaina siam vanga man an ni deuh vek a. Bawngkawn PS ah tang miap 2 leh hmeichhia 1 kawlin mipa 1 leh hmeichhiate hi ruk ruk vanga man an ni a, mipa 1 chu family case a hren a ni. Bawngkawn Police Station huam chhung, Durtlang a DDK tlangchhip quarter ah nizan khan nupui then lai mipa, fa la nei lo chu inawkhluma hmuh a ni a, lehkha hnutchhiah a neih hriat a ni lo. Lunglei PS ah mipa 2 kawlin pakhat chu rukru a ni a, pakhat dang chu family case a hren a ni.Serchhip PS ah family case a hren mipa 2 an kawl bawk a. Vaivakawn PS ah ruk ruk vanga man mipa 1 an kawl bawk. Traffic Report : Nimina Aizawl a Traffic Rules bawhchhia man zat : Two Wheeler 19, Taxi 11, LMV 11, HMV 2, fine tlingkhawm Rs. 6,800/- Hospital Report : Nimin tlai dar 5 atanga tukin dar 7 thleng khan Aizawl Civil Hospital Casualty ah emergency case 80 vel an nei a, mitthi an nei lova; nizana Civil Hospital Casualty pantu zingah hian pumna an tam deuh ber a, two wheeler a accident-na lama hliam tenau nei an awm nual bawk. OD hruai an awm lova, zurui medical 5 an awm. Khum ruak a awm lova. Labour Room ah nau piang 27 awmin, mipa 17 leh hmeichhia 10 an ni a, an zinga mipa 2 leh hmeichhia 3 chu zai chhuah an ni a, vawiina nei tur 9 an awm bawk. Synod Hospital Durtlang ah nizan khan emergency case 13 neiin heng zinga 7 chu admit an ni a, mitthi an nei lo. Medical ward, naupang ward leh Ortho ward ah te khum ruak tlem an nei a. Khum 6 awmna ICU ah na zual enkawl lai 5 an nei. Lawmna Ward ah nau piang 9 awmin mipa 5 leh hmeichhia 4 an ni. Greenwood Hospital ah mitthi 1 neiin khum an full a. New Life Hospital ah nau piang 1 neiin khum an full a. Bethesda Hospital ah nau piang 1 neiin Cabin an full a. BNJ Hospital ah nau piang 1 an nei a, Care Hospital ah khum an full a. Nazareth Hospital Ramhlun North ah Cabin an full a. Adventist Hospital ah Cabin ruak pahnih khat an nei a; tukin hian hospital biakpawh theih loh kan nei nual. Power : SLDC atanga thu kan dawn danin nizan dar 6 a phai lam atanga power kan hmuh tam lai berin 66.22 MW kan hmu a, Serlui B Hydel Project atanga siam chhuah 7.8 MW nen kan hman zawng zawng 74.02 MW a ni a. Nizan lamah load shedding ngai lovin kan eng kim thei a, tukin hian Shillong lamah an shutdown vangin load shedding siam a ni mek thung. Line chhia report a awm lo.
Posted on: Wed, 25 Sep 2013 02:09:19 +0000
Trending Topics
Recently Viewed Topics
© 2015