MORNING REPORT : 6th SEPTEMBER, 2013 ZIRTAWPNI (Zonet Zing Daifim, 7:30 a.m.) Police Report : Tukin hian Serchhip Police Station tih loh kan biak thin pangngai Police Station leh Out Post te chu kan be kim thei a. Kan hriat theih chinah nizan lamah thil thleng duhawm lo sawi tham a awm lova, Lock Up ruak 5 a awm a ni. Nizan chu Bawngkawn Police Station ten mipa 6 leh hmeichhia 2 kawlin tang an ngah ber a. A tam zawk khawm case a man an ni. Aizawl Police Station ah tang mipa 6 kawlin rinhlelh man leh traffic case a mante an ni hlawm a. Lawngtlai PS ah ruk ruk leh khawm case a man mipa 5 an kawl a. Saiha PS ah zuruih vanga man mipa 2 kawlin Kolasib PS ah mipa 2 an kawl a, 1 chu rinhlelh man niin 1 chu family case a ni. Lunglei PS ah mipa 2 kawlin 1 chu zuruih vanga man a ni a, pakhat zawk chu September ni 2 zana Tawipui North-II a chhungkaw member 3 te thihnaa rinhlelh man, an fapa C. Lalramzauva a ni a, tukin thlengin a hnen atanga thu hriat erawh a la awm lo. Vaivakawn PS ah mobile phone ruk vanga man mipa 1 an kawl bawk. Traffic Report : Nimina Aizawl a Traffic Rules bawhchhia man zat : Two Wheeler 13, Taxi 6, LMV 5, HMV 1, Bus 1, fine tlingkhawm Rs. 4,950/- Excise Report : Aizawl District Excise ten nimin leh nizante khan dawidim hmanga siam Apple Juice litre 660 leh Theiherawt zu litre 500 an man a, zu pangngai nen a chak dan a inang reng niin an sawi. Rakzu litre 20 man bawkin Lock Up ah tang mipa 2 leh hmeichhia 1 an kawl a ni. Hospital Report : Nimin tlai dar 5 atanga tukin dar 7 thleng Aizawl Civil Hospital Casualty ah emergency case 70 an nei a, mitthi an nei lova. Nizana Civil Hospital Casualty pantu zingah hian pumna an tam ber a. Parvon OD mipa 1 chu an chhan thei a. Zurui medical 3 an awm a, Khum ruak a awm lo. Labour Room ah nau piang 22 awmin, mipa 8 leh hmeichhia 14 an ni a, an zinga mipa 2 leh hmeichhia 6 chu zai chhuah an ni a, vawiina nei tur 4 an awm bawk. Synod Hospital Durtlang ah nizan khan emergency case 16 neiin heng zinga 13 chu admit an ni a, mitthi 1 an nei. Nizana Synod Hospital Casualty pantu zingah hian pumna leh khawsik an tam ber a, Ward thenkhatah khum ruak tlem an nei a, ICU ah na zual enkawl 1 an nei bawk. Lawmna Ward ah nau piang 17 awmin mipa 7 leh hmeichhia 10 an ni a, vawiina nei tur 10 an awm bawk. BN Hospital ah nau piang 1 an nei a, Care Hospital ah tukina nau piang tur 1 awmin khum an full a. Greenwood Hospital leh New Life Hospital ah te khum an full a. Nazareth Hospital Ramhlun North leh Grace Nursing Home ah te Cabin an full a. Bethesda Hospital ah te, Adventist Hospital leh Alpha Hospital ah te Cabin ruak an nei. Lunglei Civil Hospital ah nizan khan emergency case 15 neiin nau piang 2 an nei a, khum an full a ni. Power : SLDC atanga thu kan dawn danin nizan dar 7 a phai lam atanga power kan hmuh tam lai berin 67.7 MW kan hmu a, Serlui B Hydel Project atanga siam chhuah 7.8 MW nen kan load shedding ngai lovin kan eng kim thei a, line chhia report a awm lo a ni.
Posted on: Fri, 06 Sep 2013 02:10:55 +0000
Trending Topics
Recently Viewed Topics
© 2015