MPL 3 AH AIZAWL FC CHAMPION 2014 Samsung 3:16 Plan Solution Mizoram Premier League-ah Aizawl FC an champion ta. Mizoram Premier League-ah hian league -a ti tha pahnih ten final an khel a, Final hi double legged system-a khelh niin, 1st leg-ah B Zoramthara goal hmangin Aizawl FC chuan hnehna an chang a. 2nd leg-ah Chanmari FC chuan 3-2 in hun pangaiah hnehna an chang ve leh a. Away goal rule hman a ni lova, aggregate chuan 3-3 in an inhnehtawk ta chiah mai. Tichuan penalty shootout hmanga chak zawk zawn a ni ta a. Penalty-ah hian Aizawl FC keeper T Mawia chuan vawi hnih save-in, 4-2 in Aizawl FC chuan hnehna an chang a, MPL 3 chamnpion an ni ta a ni. Chanmari FC 3-2 Aizawl FC (3-3 agg) (Dingngheta 31, Ruatdika 55 pen, C Lalrosanga 85) (Justice Morgan 13, Rozama 59 pen) Penalty Shootout-ah 4-2 in Aizawl FC an chak ta a ni. Chanmari FC : Lalawmpuia, Lalruatthara, Lalrinchhana Tochhawng, Zothanpuia, Jerry Lalrinzuala, Laldingngheta, Lalruatdika, Ricky Lallawmawma, H Lalmuankima, Lalruatfela, Joseph Lalnunpuia. subs : H Lalremruata, MS Dawngliana, C Lalrosanga, Lalhriatrenga, Zohmangaiha Ralte, Rochhingpuia, Vanlalthlamuana, K Lalchhanhima, Malsawmfela. Aizawl FC: Zothanmawia, Emmanuel Chigozie, Thomas Lalengkima, Lalramchullova, Lalrozama Fanai, H Lalbiakthanga, David Lalrinmuana, Reuben Zosangpuia, B Zoramthara, Albert Zohmangaiha, Justice Morgan Subs : Lalmalsawma, David Lalthansanga, Vanlalduatsanga, William Lalnunfela, Immanuel HS Lalthazuala, Brandon VL Remdika, Dinthangpuia, Rohmingthanga, Lalmuanzova. Final hmuhnawm tak a ni a, a khawi atangin nge sawi tan tur tih pawh hriatthiam a va har tak em. Second leg-ah goal 5 a lut, chutah final duhthusam penalty shootout hmangin chak zawk zawn a ni leh bawk. Penalty pet tu ten an pet out lo, penalty-a goal lut lo te hi goalkeeper te save a ni bawk. Hun pangaiah Chanmari FC 3-2 in an chak a, Aizawl FC hian Justice Morgan goal hmangin 13th mins-ah hma an hruai. David Rinmuana ball pek tha zet chu Justice hian veilam atangin a thuai a, Chanmari FC keeper Lalawmpuia a che hman lo, top corner-ah a thlawk lut mawi hle. He goal hi 31st mins-ah Dingngheta chuan Chanmari FC tan a rul a. Dingngheta hian box pawnah ball changin, 20 yards vel atangin kawh zetin a shot a, Aizawl FC keeper T Mawia chuan rang takin save tumin zuang mahse a beng hman lo ching hle. First half-ah 1-1 in an inhnehtawk. Second half-ah Chanmari FC chuan penalty hmangin hma an rawn hruai a. Mual dinglam sir atanga Ruatthara ball vawrh chu Rozama kutah a per a, assistant referee chuan handball a ham tlat mai. Chanmari FC chuan penalty an hlawh chhuak a. 55th mins-ah Ruatdika chu rawn pen chhuakin, cool takin a pet goal a, Chanmari FC 2-1 in hma a hruai pui. Mahse Aizawl FC-in penalty hmang bawkin goal an khung chhunzawm ve leh. 59th mins-ah Justice ball pet chu Ruatdika kutah a fuh tlat mai. Referee chuan handball a ham nghal vat a, Aizawl FC chuan penalty an hlawhchhuak. Rozama a rawn pen chhuak a, top corner-ah chiang em emin a chhuih goal. 2-2 in an inhnehtawk. Chanmari FC chuan 85th mins-ah free kick atangin C Lalrosanga hmangin goal an khung leh. David Rinmuana foul vangin Chanmari FC in mual dinglam sir 35 yards velah free kick an hlawh chhuak a. He free kick hi Rosanga chuan far post-ah thlawhin, Aizawl FC keeper T Mawia a chesual ta tlat mai, ho angreng takin Rosanga hian a pet goal chu a ni chhunzawm a, 3-2 in Chanmari FC chuan hnehna an chang. Mahse aggregate-a lak a nih avangin 3-3 a ni a, penalty pet a ngai ta. Aizawl FC tan David Lalrinmuana, Immanuel HS Zuala, Chullova leh Emma ten penalty an pet goal a, T Mawia chuan Lallawmawma pet leh Lalrosanga pet te a dan avangin 4-2 in Aizawl FC chuan hnehna an chang ta a ni. Chanmari FC hian an defender tha Rinsanga an chhawr thei lova, a pa damloh avangin an khaw lamah a hawng. Hei hi nasa takin a tuar kan ti thei awm e. Aizawl FC in 1st leg-a Thakima red card vangin 2nd leg-ah an chhawr thei lo, mahse squad nei tha ber kan tih thin Aizawl FC an buai lo. Chullova a laiah pawh luh a ni a, Thomas chuan side a veng bawk a. Chullova a khel tha tak zet a, MPL Best player a ni ta hial bawk a ni. First half-ah Chanmari FC tan Dingngheta leh Fela Zote ten chance tha zet an nei a, mahse an hmang tangkai lova. B Zoramtharan box pawn atanga a shot Chanamri FC keeper Lalawmpuia lo save te kha pui tak a ni. Tin, hun tawp dawnah Chanmari FC defender an chesual a, Rinchhana chuan Awpa tan ball tauh letin, Awpa a lo up si a, ball chu goal lamah a lum a, Justice chuan umin, goal ruak a thun thelh a, goal post a pet per a ni. Kha kha chu khung selang chuan penalty shoot out neih a ngai hauh lovang. MPL 2-ah khan tuna Aizawl FC coach Mala hian Luangmual FC enkawlin, Final a luhpui a, mahse Chanmari FC coach Thlanga a ngam lo. MPL3-ah Aizawl FC hruaiin Mala hian Final a lut leh ngat a, tunah erawh Chanmari FC an hneh ta. League-ah Aizawl FC hian point 5 laiin Chanmari FC an tlanpel a, final-ah pawh an khel ropui zawk a, champion an phu hle a ni. Aizawl FC Academy te December ni 12, 2014 hian ADFA Mid Season 1st Division Tournament-ah an lo champion ve chiah bawk nen, top flight-ah senior team an champion a, 1st division-ah Junior an champion ve bawk a, an double ta a ni. Prize Distribution : 8. Lunglei FC - Rs. 50,000 7. Reitlang FC - Rs. 75,000 6. Bethlehem Vengthlang FC - Rs. 1,00,000 5. Dinthar FC - Rs. 1,25,000 4. Chanmari West FC - Rs. 1,50,000 3. Mizoram Police FC - Rs. 2,00,000 2. Chanmari FC - Rs. 3,00,000 1. Aizawl FC - Rs. 5,00,000 Best Goalkeeer - Lalawmpuia (CFC) Rs. 5,000 leh Samsung Smart Phone a dawng. (MPL 1 leh 3 a Best goalkeeper) Nominees Lalawmpuia, J Vanlalhriata, Liansangpuia, T Mawia Best Defender - Emmanuel Chigozie (AFC) Rs. 5,000 leh Samsung Smart Phone a dawng. Nominees Chigozie, Lalramchullova, Ronald Zothanzama, Lallawmzuala Best Midfielder- David Lalrinmuana (AFC) Rs. 5,000 leh Samsung Smart phone a dawng. Nominees David Lalrinmuana, Lalbiakthanga, Lallawmsanga, Lalbiakhlua Best Forward- Malsawmfela (CFC) Rs. 5,000 leh Samsung Smart Phone a dawng. Nominees Malsawmfela, Joseph Lalnunpuia, Malsawmdawnglina, B Malsawmzuala Top Scorer- Lalbiakhlua (MPFC) Rs. 5,000 leh Samsung Smart Phone a dawng. Lalbiakhlua leh Malsawmfela ten goal 9 ve ve an khung a. Game khel tlem zawk Mizoram Police FC winger Lalbiakhlua thlan a ni ta a ni. Fair Play - Aizawl FC Yellow card : 21, Red card: 1 Rs. 2,000 an dawng. Best Player - Lalramchullova (AFC) LED Samsung 32 inches TV a dawng.
Posted on: Sat, 13 Dec 2014 14:02:06 +0000
Trending Topics
Recently Viewed Topics
© 2015