Malo Tokelau i tenei itula o te afiafi, e fakamalulu atu ki te mamalu o koulua nae fakalogologo ki te NIU FM i te po o na ai e heki kavatua na tala fou mai Nukunonu ona ai foki lava ko te he tala feagai o na taimi ma na tuatuagia nae fakafeagai ai ma te aho ananafi. Ke tuku uma atu na tala fou i luga o te laupepa tenei i te aho taeao kae maihe ai foki ma te tatou polokalame leitio Tokelau i Auhetalia. Ko he tama update tenei ki na vaega nae tutupu i te aho nei. Ko te taeao nei i te 10 na fai ai na kilikiti ate nuku te kau kua tofilia mo na kilikiti a Tokelau ma te kau mai te nuku. Ko te vaiaho nei e fakamoemoe ka taunuku mai ai na malo ki luga o te tatou kauafua tenei ma ka fakatumulia ai te fenua. Ihe fakamoemoega ko te kaitagi o te fanoanoa o te tamana kia Kulima e tatala i te aho taeao e katoa kiei tona po tolu, ona ai ko te pihi ma te gaea o te fenua ki na taliga malo e talia nei kua mafaufau ai te kaiga fakanoanoa ka tatala lele te kaitagi o te tamana tenei i te aho taeao. Ko te toe vaiaho tenei o te akoga a Matiti oi kua tukua ai a latou akoga ki te tukuaga o lototonuga o te tauhaga, e tapenapena ai nei na faiakoga ki te haoniga o na lipoti o na fanau kae maihe ai a latou tapenapenaga mo te Director of Education e taunuku mai i te vaiaho nei tana ahiahiga ki te akoga ko te taimi muamua foki tenei ka ahiahi mai ai ia ki te akoga a Matiti. Litia Maiava mo na tala fou. NUKUNONU TOKELAU tautuaga a te TE MANA
Posted on: Mon, 08 Jul 2013 03:27:31 +0000
Trending Topics
Recently Viewed Topics
© 2015